“Aduankayo ti Aramiden iti Trabaho ti Apo”
1 Sigurado a kupadotayo iti iskediul dagiti teokratiko nga aktibidad bayat ti Abril ken Mayo! Iti Abril 14 rambakantayo ti Memorial ti ipapatay ni Kristo. Adu a tattao agingga ti mabalin ti masapul a maparegta a tumabuno iti dayta nasken nga okasion: dagiti kanegosio, di manamati a kabagian, kaeskuelaan, agdadamo nga interesado a tattao, ken dagiti estudiante ti Biblia. Ilistayo dagidiay planoyo nga imbitaran tapno awan ti malipatan.
2 Iti sumaruno a lawas paregtaentayo dagiti amin a timmabuno iti Memorial a dumngeg iti espesial a palawag publiko iti Abril 23, iti suheto nga “Asidegen ti Panagpatingga ti Ulbod a Relihion.” Manamnama nga adu nga interesado a tattao a makangngeg iti daytoy diretsa a mensahe ti agmayatto a makitimpuyog iti kongregasion iti regular a wagas, saan laeng a kadagiti espesial nga okasion.
3 Espesial a Kingdom News a Mairuar: Ti maysa a tampok a paset ti miting inton Abril 23 isut’ pannakairuar ti naintiempuan nga uppat-pinanidna a Kingdom News a maipaayan ti nalawa a pannakaiwaras agingga ti Mayo 14. Dikay kadi umanamong nga “aduankayo ti aramiden iti trabaho ti Apo” bayat daytoy panawen ti Memorial?—1 Cor. 15:58.
4 Maysa nga abasto ti Kingdom News ti maipatulod iti kada kongregasion. Dagiti pakete a naglaon ti Kingdom News masapul a maipempen iti natalged a lugar ken saan koma a maluktan agingga iti ngudo ti programa inton Abril 23. Iti dayta a tiempo, ti Kingdom News ti maipaay kadagiti kakabsat ken iti publiko. Iti ngudo dagiti gimong ti kongregasion, asamblea sirkito, wenno programa ti espesial nga aldaw ti asamblea iti Abril 23, dagidiay timmabuno ti umawat iti kopiada tapno makabisadoda dayta ken makabalanda a maipaay ti pannakaiwarasna.
5 Aduan Dagiti Panglakayen iti Aramiden: Iti nasapa a paset daytoy a bulan, ti bagi dagiti panglakayen ti agtataripnong tapno pagsasaritaanda dagiti detalye ti espesial a kampania. Ikagumaan koma ti kongregasion a wanasen ti amin a naituding a teritoriada. Sakbay nga agngudo ti kampania, aramiden ti naiduma a regget a matrabaho dagidiay teritoria a saan pay a nawanas iti napalabas nga innem a bulan. Maigapu iti pateg ti trabaho, awan duadua nga adu dagiti agpalista kas auxiliary payunir. Adu nga estudiante ti Biblia ti makikuyog met kadatayo kas di bautisado nga agibumbunannag. Anian a makaparag-o a tiempo ti adda kadatayo bayat nga agbannogtayo a sangsangkamaysa iti trabaho ti Apo!
6 Dagiti konduktor iti Panagadal iti Libro ti Kongregasion masapul a mangaramidda kadagiti masinunuo nga urnos agpaay iti grupo a panangasaba bayat ti ngalay ti lawas ken kadagiti Sabado ken Domingo. Mainayon pay, ti panangasaba iti sardam ti masapul a mayiskediul iti uray maminsan laeng kada lawas bayat iti kampania.
7 Dagiti taripnong a maipaay iti tay-ak ti serbisio ti masapul a mayiskediul tapno dagiti agibumbunannag ken payunir makapagsapada a mangrugi iti ministerio iti kada aldaw. Ababa laeng dagitoy a taripnong. Tunggal maysa ti mangaramat iti simple a panangiparang iti Kingdom News. Mangitugot met dagiti agibumbunannag iti agdama a ruar dagiti magasin nga ipaima kadagidiay mangipakita ti interes. Dagiti taripnong ti malem a maipaay ti serbisio ti mangiraman iti maysa wenno dua a singasing a maipaay ti panagsarungkar kadagidiay nangawat iti Kingdom News. Nupay kasta, dadduma nga agibumbunannag kaykayatda ti makiraman iti panagiwaras agpada iti agsapa ken malem. Maipaay iti dayta a panggep, kayat ti manangaywan ti serbisio nga isiguro nga adda umdas a teritoria. Ti nagan ken taeng ti kada mangipakita iti interes ti masapul a mainotar iti house-to-house record.
8 No ti maysa a kongregasion tumulong iti sabali a mangwanas iti teritoriada, dagiti nagan ken taeng dagiti interesado a tattao ti masapul a maited iti kongregasion a makinteritoria.
9 Nagannak, agprogprogreso aya dagiti annakyo nga agbalin a di bautisado nga agibumbunannag? Napaliiw nga iti dadduma a kongregasion, dadduma nga ubbing ti nakikuykuyog kadagiti dedikado a nagannakda iti ministerio iti adun a tawtawen, ket naimbag ti naaramidan dagiti ubbing, nupay saanda pay nga agibumbunannag. Rebbeng nga usigen dagiti nagannak no dagiti annakda ket pudno a maikaridan iti daytoy a pribilehio. Dua kadagiti panglakayen ti mangilawlawag ti amin a banag iti ulo ti pamilia ket ikeddengda no ti ubing ket maibilangen kas di bautisado nga agibumbunannag.—om p. 99-100.
10 Adda kadi dagiti agibumbunannag iti teritoria ti kongregasionyo a saanen nga aktibo a mangituktukon iti daton ti panagdayaw ken Jehova? (Heb. 13:15) Dadduma a saanen nga aktibo ti mabalin a pinarukma iti pannakaupay wenno dandanag ti panagbiag, nupay agtultuloyda a mangannurot kadagiti moral a pagalagadan ti Biblia. Ti nainggayyeman nga ibibisita ti maysa kadagiti panglakayen ti mabalin a mangtignay kadakuada nga agsubli iti regular a pannakitimpuyog iti kongregasion ken, iti maitutop a tiempo, mapabaro ti aktibidadda iti ministerio.
11 Amin a Kualipikado Mabalinda ti Makiraman iti Daytoy Naragsak a Trabaho: Dadduma kadi kadakayo nga ubbing wenno agtutubo ti marigatan a makiraman iti panagbalaybalay a ministerio? Dakayo met ngay nga agdadamo a limitado ti kapadasanna iti panangasaba a trabaho? Masarakanyonto a daytoy espesial a trabaho ti Kingdom News ti karagsakan! Kasapulan laeng ti simple a panangiparang.
Mabalinyo a kunaen ti kastoy:
◼ “Iti daytoy a bulan agiwarwaraskami iti maysa a napateg a mensahe iti 232 a dagdaga iti intero a lubong. Ti mensahe ket napateg agsipud ta mangted kadatayo iti solido a rason a mamati nga adda solusion dagiti problema a sangsanguentayo ita. Kayatmi a maaddaankayo iti bukod a kopia.”
Wenno ipadasyo daytoy:
◼ “Iti daytoy a bulan gistay lima a milion a boluntario ti agiwarwaras iti napateg a mensahe iti adu a pagsasao. Daytat’ naisagana nga agpaay iti tattao nga agngayangay a kumita iti panagpatingga dagiti problema a sangsanguentayo amin ita. Daytoy ti personal a kopiayo.”
Daytoy simple a panangiparang ti mabalin a tumutop kadakayo:
◼ “Parparegtaenmi ti tunggal maysa a mangbasa iti daytoy napateg a mensahe a napauluan [basaen ti paulo ti Kingdom News]. Siputanyo no ania ti kunana ditoy panid 2 maipapan kadagiti dumegdegdeg a problema ti . . . [basaen ti napili a sasao manipud Kingdom News]. Masiguromi a pagragsakanyo a basaen ti natda pay a paset daytoy naintiempuan a mensahe. Daytoy ti kopiayo.”
12 Maaddaankayo ti personal nga interes iti kada umawat ti Kingdom News. Kayattayo a masiguro nga amin dagidiay mangipakita ti interes maikkanda iti personal a kopia. No awan ti madanon iti pagtaengan, markaanyo ti house-to-house recordyo tapno masublianyo kalpasanna sa itukon ti Kingdom News iti bumalay. Dagitoy Kingdom News a tract ti mabalin a mausar iti panangasaba iti lansangan no interesado ti tao, ngem saan dagitoy a maipaima kadagiti amin a kas kadagiti handbill. Imbes ketdi, asitgan dagiti aglabas, ken ilawlawag ti pateg ti mensahe a nailanad. Usaren ti Kingdom News iti impormal a panangasaba, bayat ti panagbiahe, wenno no kasabaanyo dagiti katrabahuanyo bayat ti pangngaldawyo. Dagidiay masakit wenno naidalit ti mabalin a mangitukon kadagitoy kadagiti sangaili, kadagiti doktor ken nars, agtagilako, wenno dadduma pay a sumangbay iti pagtaenganda.
13 Mano ngata a panagsarungkar ti maaramidyo bayat ti kampania? Awan duadua a nawadwad, idinto ta amin dagidiay nangipakita ti interes iti Kingdom News ti masapul a mabisita. Iti umuna a dupag, nasayaat no madakamat ti Kingdom News laeng. Kalpasanna, inton sumarungkarkayo, agkomentokayo iti sumagmamano maipapan ti kinanaintiempuan iti mensahe ti Kingdom News. Imdenganyo a siaannad bayat a yebkas ti bumalay ti opinionna iti nabasana. Ti komentona ti tumulong kadakayo a mangammo no ania ti maitukon kadagiti kaudian a magasin ken nalabit no kasano a maisagana ti kanayonan a diskusion. No magun-odyo ti maikari a sungbat iti panagsarungkar, padasenyo nga irugi iti panagadal ti Biblia.—1 Cor. 3:6, 7.
14 “Ti Panagbannogyo Saan nga Ubbaw”: Amin kadi dagitoy a trabaho ket addanto kaes-eskanna? Impasiguro ni Pablo kadagiti taga Corinto: “Ti panagbannogyo saan nga ubbaw mainaig [iti] Apo.” (1 Cor. 15:58) Kadagiti naglabas a tawen, ti reggettayo a nagiwaras ti Kingdom News ket pudno a nabendisionan. Maysa a pagassawaan nga immakar iti bakante nga apartment ti nakasarak iti daan a kopia ti Kingdom News iti maysa a drawer. Dayta laeng ti nabati iti intero nga apartment. Kalpasan a nabasada, sinapulda ti lokal a kongregasion ken nagkiddawda iti panagadal ti Biblia. Nangrugida a timmabuno iti amin a gimong ket kalpasanna inyebkasda ti tarigagayda nga agpabautisar. Nalabit a ti maysa a kopia a maibatiyo ket mangyeg iti umasping a resulta!
15 Addaantayo iti nawadwad a tamingen iti masanguanantayo. Ti kalattayo isut’ panangwanas ti kada kongregasion iti naituding a teritoriana inton Mayo 14 wenno iti ngudo ti bulan no kasapulan nga ibennat ti tiempo a maipaay iti pannakaiwaras ti Kingdom News. Naaramid ti panangipatulod tapno, kadagiti kongregasion ti siudad wenno dagidiay aduan ti teritoria, kada regular payunir ti makaawat iti agarup 250 a kopia ti Kingdom News ken kada agibumbunannag ti kongregasion makaala iti agarup 50 a kopia. Dagiti kongregasion a basbassit ti teritoriada ti umawat iti agarup kagudua iti kaadu ditoy ngato. Maisingir iti kuenta ti kongregasion iti gatad a 20 sentimos iti kada kopia ti Kingdom News, ngarud dagidiay mangala ti abastoda ti agmayat nga agkontribusion iti daytoy a kantidad a mangsulnit iti nagastos. No gapu iti kalawa ti teritoria a naituding ket dadduma kadagiti kongregasion ti saan a nakawanas iti teritoriada iti ngalay ti Mayo ken adda pay laeng dagiti nabati a kopia, praktikal unay no maawis dagiti asideg a kongregasion a tumulong. Kadagiti dadduma a kongregasion, ti kasapulan ket malitupan iti lokal no dagiti agibumbunannag ket pawadwadenda ti aktibidadda babaen ti panagpalistada kas auxiliary payunir wenno babaen ti pannakiramanda a masansan iti ministerio.
16 Ti amin-kararua a debosion ken Jehova ti kasapulan tapno mairingpas ti trabahotayo. (Col. 3:23) Nairaman dagiti biag. Saan koma a di italtalek dagiti tattao ti kaipapanan ti kasasaad ti lubong kadagitoy nga aldaw. Aggibusen ti tiempo. Masapul a sanguenda ti kinapudno a ti tao ket awanan iti solusion kadagiti problema daytoy a lubong. Ti Dios laeng ti addaan iti solusion. Dagidiay agngayangay a gumun-od iti bendision ti Dios masapul nga agtignayda a madagdagus, nga awanan taktak, maitunos kadagiti pagalagadanna.
17 Iti ngudo ti espesial a kampania inton Mayo 14, agsarimadengtayo kadi iti aktibidadtayo? Saan! Itultuloytayo ti aggaget maitunos iti naipaltiing a balakad ni Pablo.