Agbalinkayo a “Naregta iti Nasayaat nga Ar-aramid” Bayat ti Abril!
1 Idi Abril ken Mayo, 1995, naipaay ti di pay naartapan a panangsaksi idi naibunong ti minilion a kopia ti Kingdom News No. 34 iti intero a lubong. Sireregta a nakiraman iti daytoy makatignay a trabaho, agpadpada dagiti agibumbunannag ken payunir ti kongregasion. Maysakayo kadi kadakuada? No wen, awan duadua a naan-anay a tinagiragsakyo ti nakiraman iti daydi di malipatan a kampania. Ita maisaludsodyo, Ania a ‘nasayaat a trabaho’ ti agur-uray kadatayo iti daytoy a tawen?—Tito 2:14.
2 Bayat ti Abril ken nasapa a paset ti Mayo, maragsakantayo a mangiwaras iti espesial nga edision, a ruar ti magasin nga Agriingkayo!, ti Abril 22, 1996, a mangitamtampok iti “Inton Awanen Dagiti Gubat.” Tangay makaawis daytoy a tema iti adu a bumalay, ikagumaantay nga ipaayan ti magasin iti posible a kasaknapan a pannakaiwaras. Gapu iti pateg ti impormasion a linaonna, rebbeng a maitampok daytoy a ruar ti Agriingkayo! bayat ti Abril ken Mayo agingga a maibus dagiti abasto.
3 Ti Kalattayo—Pannakipaset ti Amin nga Agibumbunannag: Pudno a makaparegta unay no makipaset koma iti panangasaba ti tunggal agibumbunannag iti daytoy a pagilian bayat iti Abril. Gaput’ pannakarambak ti Memorial ti ipapatay ni Kristo iti di pay nabayag, sigurado a kayattay nga ipakita ti panangipategtayo iti kinaimbag ti Dios babaen ti panangipaay iti direkta a “sakripisio ti panagdaydayaw” iti tay-ak ti ministerio.—Heb. 13:15.
4 Reggetantay koma nga ammuen ti kasapulan ti tunggal kameng ti kongregasion tapno amin ket mabalin a sireregta a maaddaan iti naregta a pannakipaset iti ministerio bayat ti Abril. (Roma 15:1) Naan-anay koma a sipupuot dagiti konduktor ti panagadal iti libro iti kasasaad dagidiay adda iti grupoda ket itukon ti praktikal a tulong no kasapulan. Adda kadi agkasapulan ti transportasion? Siasino ti makaipaay iti dayta? Adda aya managbabain wenno nerbioso? Mabalin kadi a kuyogen ida dagiti ad-adut’ kapadasanna nga agibumbunannag? Kasano ngay dagidiay naidalit iti balayda wenno masaksakit? Mabalinda aya ti mangasaba babaen iti telepono, iti surat, wenno iti dadduma a nabunga nga aramid?
5 Masansan a regular a maparparegta iti naespirituan ti dadduma kadagiti nagbalin a di aktibo, ket mabalin a matignayda manen a makiraman iti trabaho a panangasaba. Mangted kadakuada iti ekselente a gundaway ti kampania iti espesial nga Agriingkayo! nga agbalin manen nga aktibo.
6 Sanayen Dagiti Agtutubo a Makipaset: Adu nga annak dagiti Saksi ni Jehova ti makikuykuyogen kadagiti nagannakda iti panagbalaybalay iti adu a tawen, nupay saanda pay nga agserserbi kas di bautisado nga agibumbunannag. Ita kadin ti tiempo a mangrugida? Nakasaganadan aya a maaddaan iti adda kaipapananna a pannakiraman iti trabaho a panagbalaybalay? Mangusar koma dagiti ulo ti pamilia iti tiempo bayat ti panagadal ti pamilia iti Biblia tapno matulongan dagiti kualipikadon nga annakda nga agsagana iti presentasion a maibagay iti edad ken abilidad ti tunggal maysa. Mabalin a mangpili dagiti natataengan nga annak iti makatukay-panunot a saludsod a mangriing iti interes ti bumalay ken maitudona ti sungbat idiay magasin. Makaited iti epektibo a panangsaksi dagiti babbabassit nga annak babaen iti sumagmamano laeng a sasao. Kas ehemplo, mabalinda a paregtaen ti bumalay a “mangbasa iti espesial a magasin a maituktukon iti sangalubongan iti daytoy a bulan.” Kas paset ti panagsagana ti pamiliayo, siguraduenyo nga iraman dagiti singasing a mangparmek kadagiti gagangay a pangontra. Masarakanyo dagiti sumagmamano a nasayaat nga ideya iti libro a Panakirinnason. Kadagiti pannangan ken dadduma a maiparbeng nga okasion, paregtaen dagiti miembro ti pamilia a mangestoria kadagiti kapadasanda iti tay-ak ti serbisio.
7 Aramiden Dagiti Kualipikado nga Estudiante ti Biblia ti Trabaho nga Inaramid ni Jesus: Saan laeng nga impatingga ni Jesus ti pannursurona iti panangisuro kadagiti doktrinal a bambanag. Kinuyogna dagiti estudiantena iti ministerio ket insurona ida no kasano ti mangasaba. (Luc. 8:1; 10:1-11) Ania ti kasasaad ita? Nasurok a 95,000 a panagadal ti Biblia ti maidadaulo ditoy Pilipinas. Awan duadua, a babaen ti maitutop a pammaregta adu kadagitoy nga estudiante ti nakasaganan iti sumaruno nga addang ti panagsanayda ket makualipikar nga agserbi kas di bautisado nga agibumbunannag iti Abril.
8 No mangidadaulokayo iti panagadal ti Biblia, usigenyo dagitoy a saludsod: Agprogprogreso aya ti estudiante, a mayataday iti edad ken abilidadna? Inrugina kadin nga iranud nga impormal ti pammatina iti sabsabali? Ikawkawesnan aya “ti baro a personalidad”? (Col. 3:10) Maragpatna kadin dagiti kualipikasion iti di bautisado nga agibumbunannag, a naibalabala idiay pinanid 98 ken 99 iti libro a Ti Ministeriotayo? No patienyo a kualipikadon, apay a dikay makisao kenkuana maipapan iti daytoy? Kasapulan laeng dagiti dadduma nga estudiante ti direkta nga awis a makiraman iti trabaho. Siempre, no umanamong ti estudiante, kasapulan pay nga umuna nga iyurnos ti mamangulo a manangaywan ti gagangay a pannakisarita dagiti dua a panglakayen kenkuana. Iti sabali a bangir, nalabit nga adda mangigawgawid iti estudiante. Mabalin a kaduaannaka ti maysa kadagiti panglakayen iti panangyadal ti Biblia ket ammuenyo ti rikna ti estudiante maipapan iti kinapudno. Kalpasan a mangngegan no ania ti makuna ti estudiante, mabalin a mangipaay ti panglakayen kadagiti praktikal a singasing, agraman Nainkasuratan a tulong.
9 ‘Gatangen ti Tiempo’ Tapno Makapag-Auxiliary Payunir: Kada tawen bayat ti tiempo ti Memorial, tignayen ti panagyaman iti subbot a ‘gatangen’ dagiti rinibu ti tiempo tapno makapag-auxiliary payunirda. (Efe. 5:15-17) Nupay adda masapul nga isakripisio, nawadwad ti magunggona. Gundawayan dagiti mapadayawan a bilang dagiti agtutubo ti bakasion manipud eskuelaan tapno ag-auxiliary payunir. Ginundawayan a naan-anay dagiti adulto a mangmangged iti amin a tiempo nga usaren dagiti rabii ken ngudo ti lawas ti isu met laeng nga aktibidad. Iti kasta, ginundawayan ti intero a pamilia ti nag-auxiliary payunir a sangsangkamaysa! Iti dadduma a kongregasion nag-auxiliary payunir ti kaaduan kadagiti panglakayen ken ministerial nga adipen ken dagiti assawada. Natignay babaen ti naregta a panangidauloda, tinulad dagiti dadduma ti ehemploda, iti kasta dakkel a porsiento iti kongregasion ti nakapag-auxiliary payunir iti Abril.
10 Makapag-auxiliary payunirkayo man wenno saan, ipamuspusanyo a pawadwaden ti serbisioyo iti tay-ak bayat ti Abril. Mangituyangkay iti bukodyo a kalat, daytay kasapulanna ti pinget tapno maragpat ngem kabaelan a gun-oden. Ti tarigagayyo a “mangbusbos ken naan-anay a mabusbos” iti serbisio ni Jehova, a maitunos iti sasaadenyo, mabendisionanto.—2 Cor. 12:15.
11 Dagiti Taripnong Sakbay ti Panagserbi iti Tay-ak: Inaldaw koma a mayurnos dagiti taripnong sakbay ti panagserbi iti tay-ak tapno masapa a mairugi ti ministerio iti kampania ti Agriingkayo! Adda koma met mayurnos a panangasaba iti sardam. Makiraman ti kaaduan nga agibumbunannag iti tay-ak ti serbisio iti ngudo dagiti lawas, isu nga iyeskediul koma dagiti kongregasion ti taripnong sakbay ti panangasaba kadagiti Sabado, iti agsapa ken malem, kabayatan ti espesial a panagiwaras ti Agriingkayo!
12 Siguraduen koma dagidiay mangidaulo ti taripnong sakbay ti panangasaba nga adda nakasagana a nawadwad a teritoria. Masapul a mawanas nga umuna dagiti teritoria a saan a natrabaho iti kallabes. No mawanasen ti kongregasionyo ti amin a teritoria ket agkasapulan ti tulong ti kabangibang a kongregasion, mabalin a makiuman dagiti panglakayen kadakuada sa itukonda ti tulong a mangwanas ti teritoriada bayat ti kampania. Awan duadua nga apresiarenda ti maibadang ket tagiragsaken dagiti agibumbunannag ken payunir iti kongregasionyo ti agtrabaho iti sabali a teritoria. Siempre, maaramid koma laeng daytoy no adda pammalubos ti kongregasion a makinteritoria.
13 Mano a Magasin ti Maipaimayonto? Sungbatan ti tunggal maysa dayta a saludsod. Tapno maikeddeng no mano a magasin ti maipaimayo bayat ti kampania, panunotenyo ti klase ti teritoria a trabahuenyo, ti edad ken salun-atyo, ti tiempo a mausaryo nga agipaima, ken dadduma pay a kasapulan. Nupay kasta, siputanyo ti palagip a naited iti Enero 1, 1994, a ruar Ti Pagwanawanan: “Kas singasing, mabalin a mangikeddeng dagiti agibumbunannag iti kalat, ikabiltayon, 10 a magasin iti kada bulan, depende iti kasasaadda; mabalin a pagreggetan dagiti payunir ti 90.” Maitutop aya kadakayo ti umasping a kalat? Nagpedidokayon aya iti ekstra a kopia iti Abril 22 nga Agriingkayo!? Usisaenyo tapno masigurado nga umdas ti pedidoyo. No matakuatan ti kongregasion a saan nga umdas ti espesial a pedido iti kanayonan a magasin, mabalinda ti mangipatulod iti maikadua a pedido iti sanga nga opisina ket ikagumaan ti Sosiedad a punnuan ti pedido agingga nga adda abastomi.
14 Papanglakayen—Masapul ti Naannad a Panagplano: Imatonan ti bagi dagiti panglakayen ti lokal nga urnos ti kampania para iti Abril. No mabalin, siguraduenda koma, a matrabaho ti amin a teritoria ti kongregasion iti espesial a ruar ti Agriingkayo! Maipaayan koma iti naannad a pannakaasikaso no trabahuen dagiti teritoria ti negosio a naituding iti kongregasion. Masapul koma a nakasagana a naimbag ken nakakawes a natakneng dagidiay mangtrabaho iti dayta. Saan a nesesita ti atiddog a presentasion. No kasaoyo ti maysa a negosiante, mabalinyo a kunaen a masansan a diyo madandanon dagiti negosiante idiay balayda, gapuna a sarsarungkaranyo ida iti mismo a lugar ti negosio tapno mangiparang iti maysa nga artikulo a sigurado a paginteresanna. Kalpasanna, mabalinyo nga ilawlawag iti apagbiit ti maysa nga espesipiko a punto iti magasin. Nasayaat koma met ti pannakaorganisar ti panag-magasin no mangasaba iti lansangan iti uneg ti teritoria ti kongregasion. Ti kaepektibuan a wagas a panagtrabaho iti lansangan isut’ panangigay-at ken iyaasideg kadagiti aglabas, imbes nga urayen ida nga umasideg kadakayo. Tangay ta palpaliiwennakayo ti publiko, masapul a laglagipenyo ti natakneng a langayo. Nalabit nga adda pay sabali a luglugar ti teritoriayo a masapul a matrabaho bayat ti kampania, kas kadagiti airport, ospital, paradaan, ken parke. Ikeddeng koma ti bagi dagiti panglakayen no ania ti maiparbeng nga urnos a maipaay iti panangasaba kadagitoy a lugar iti teritoria ti kongregasionyo.
15 Ni Jehova ket trabahador a di mabannog. (Juan 5:17) Pinarsuana ti langlangit ken ti daga agraman dagiti mula ken animal; ngem nagtultuloy a nagtrabaho agingga a naparsuana ti balangat ti gapuananna ditoy daga—ti tao. Ti kinapudno nga adda biagtayo ti direkta a resulta ti kinatulok ti Dios nga agtrabaho. Kas “tumutulad iti Dios,” matignaytayo koma babaen ti ayattayo kenkuana nga agbalin a “naregta iti nasayaat nga ar-aramid.” (Efe. 5:1; Tito 2:14) Tangay maikari ni Jehova nga umawat iti kasayaatan a magapuanantayo, ken tangay pakakitaan iti naregta a tao ti tarigagay nga maaddaan iti resulta, interesadotay koma a mangitungpal iti de kalidad a trabaho iti ministerio. Siempre, ipateg ni Jehova ti aniaman a sakripisio nga idatagtay kenkuana, ket kaanoman saanto nga ubbaw ti trabahotayo. (1 Cor. 15:58) Gapuna, buyogen ti managyaman a puspuso, regtaantay nga ipaay dagiti bagitayo iti aktibidad bayat ti Abril, nga agtalektayo iti anamong ken bendision ni Jehova ken ti nabaknang a balligi!