Abril—Tiempo Tapno ‘Agtrabaho a Sipipinget ken Umagawatayo’
1 Dagiti lawas sakbay ken kalpasan ti Memorial ket panawen tapno agmennamenna ti ili ni Jehova. Tiempo dagitoy tapno usigen no ania ti naaramidan ti ipapatay ni Kristo ken utoben ti inted-Dios a namnama a pinagbalin a posible ti naiparukpok a dara ni Jesus. No lagipenyo ti Abril 19 idi napan a tawen, ania ti umuneg iti panunotyo? Malagipyo pay kadi dagidi timmabuno iti dayta a rabii? ti narayray a naespirituan a kasasaad kabayatan ti Memorial? ti serioso a pannakailawlawag ti Biblia ken dagiti napasnek a kararag? Nalabit inkeddengyo nga ad-adda nga iparangarangyo ti napalalo a panagyaman iti ayat nga impakita kadakayo ni Jehova ken ni Jesus. Ania ti epektona kadakayo ita ti kasta a panangusig?
2 Nalawag a saan la nga iti sao a nagyaman ti ili ni Jehova. (Col. 3:15, 17) Idi napan nga Abril, nagreggetantayo nga impakita ti apresasion kadagiti probision ni Jehova mainaig iti pannakaisalakan babaen ti pannakiramantayo iti Nakristianuan a ministerio. Adda 19,704 a nag-auxiliary pioneer. Gapu iti panagreggetda, agraman ti dadduma a manangiwaragawag iti Pagarian, naragpat ti baro a kangatuan a bilang dagiti agibumbunannag. Nanayonan ti rag-otayo gapu iti nasurok a 100,000 a nagpayadal iti Biblia iti dayta a bulan ken baro a kangatuan a bilang ti timmabuno iti Memorial!
3 Pudno a natignaytayo iti natalged a namnamatayo. Kas iti insurat ni apostol Pablo: “Iti daytoy a panggep agtartrabahotayo a sipipinget ken umag-agawatayo, agsipud ta insadagtayo ti namnamatayo iti sibibiag a Dios, a Manangisalakan iti amin a kita ti tattao, nangnangruna kadagidiay matalek.”—1 Tim. 4:10.
4 Kabayatan ti panawen ti Memorial, kasanoyo a maipakita ti pammatiyo kadagiti probision ni Jehova maipaay iti biag? Idi napan nga Abril, adda baro a kangatuan a bilang ti agibumbunannag ditoy Pilipinas, sa ngimmato manen iti 136,396 idi Mayo. Kabaelantay kadi a lab-awan dayta a bilang iti umay nga Abril? Posible a maragpattay dayta. Ngem masapul a makiraman ti tunggal agibumbunannag, bautisado ken di bautisado. Mabalin met a makualipikar a makiraman ti adu a kabbaro. No kasta, bayat nga iplanoyo ti agtrabaho a sipipinget ken umagawa iti Abril, usigenyo no kasanoyo a magutugot a makikadua kadakayo dagiti dadduma, agraman dagiti kabbaro ken saan pay unay a nairuam iti tay-ak.
5 Tulonganyo ti Dadduma nga Agregta Manen: No adda ammoyo a saan pay a rimmuar iti tay-ak ti serbisio iti maysa wenno dua a bulan, mabalinyo a paregtaen ida ket awisenyo a kumuyog kadakayo a mangasaba. No addada naginaktibo iti kongregasion, ikagumaan dagiti panglakayen a sarungkaran ida ken paregtaen a mangrugi manen iti Abril.
6 Nasken nga itultuloytay amin a kiddawen ken Jehova ti espirituna a mangpabileg kadatayo nga agserbi. (Luc. 11:13) Ania ti rumbeng nga aramidentayo tapno magun-odtayo dayta nga espiritu? Basaen ti naipaltiing a Sao ti Dios. (2 Tim. 3:16, 17) Masapul met a ‘denggentayo koma ti kunaen ti espiritu kadagiti kongregasion’ babaen ti itatabuno iti amin a lima a linawas a gimong. (Apo. 3:6) Itan ti kasayaatan a tiempo a tulongan dagidiay iregular ken inaktibo a rumang-ay iti personal a panagadalda ken agbalin a regular kadagiti gimong. (Sal. 50:23) Aramidentayo daytoy bayat a ditay baybay-an ti naespirituan a pagimbagantayo. Ngem adda pay nasken nga aramiden.
7 Kinuna ni apostol Pedro nga ipaay ti Dios ti nasantuan nga espirituna “kadagidiay agtultulnog kenkuana kas agturay.” (Ara. 5:32) Ti kasta a panagtulnog iramanna ti panangipangag iti bilin a ‘mangasaba kadagiti tattao ken mangipaay iti naan-anany a panangsaksi.’ (Ara. 1:8; 10:42) No kasta, nupay pudno a kasapulantayo ti espiritu ti Dios a mangpabileg kadatayo a mangasaba, pudno met nga ad-adda a tulongannatayo ni Jehova no iparparangarangtayo ti tarigagay a mangay-ayo kenkuana. Ditay koma pulos tagibassiten ti kinapateg ti panangaramid kadagita a pangrugian nga addang ti sitatallugod a panagtulnog!
8 Panangtulong Kadagiti Agtutubo: Dakayo a nagannak, makitkitayo kadi kadagiti annakyo a tarigagayanda ti makisarita kadagiti dadduma maipapan iti kinapudno? Kumuykuyogda kadi kadakayo a mangasaba? Mapagulidanan kadi dagiti konduktada? No wen, apay a bumdengkayo? Asitganyo ti maysa a miembro ti Congregation Service Committee, ket ammuenyo no makualipikar ti anakyo nga agbalin nga agibumbunannag iti daytoy nga Abril. (Kitaenyo ti libro a Ti Ministeriotayo, panid 99-100.) Bigbigenyo a dakkel ti maitulong dagiti annakyo a mangidaydayaw ken ni Jehova kabayatan ti panawen ti Memorial.—Mat. 21:15, 16.
9 Maysa a Kristiano nga ina a taga Georgia, E.U.A., ti kanayon a mangiparegta iti balasitangna nga isaritana iti dadduma ti maipapan ken Jehova. Itay napan a tawen, bayat a mangaskasaba daytoy a balasitang a kadua ni nanangna, naipaimana ti broshur a Kalikaguman iti maysa a lalaki ket inlawlawagna iti apagbiit ti linaon ti broshur. Insaludsod ti lalaki: “Mano ti tawenmon?” Simmungbat: “Pito.” Nasdaaw ti lalaki ta kabaelan ti balasitang ti mangiparang iti kasta kabagas a presentasion. Dati gayam a nakipagad-adal iti kinapudno daytoy a lalaki idi kaub-ubinganna pay, ngem dina pinagbalin dayta a wagas ti panagbiagna. Di nagbayag, nayadalan iti Biblia ti lalaki, ti asawana, ken ti anakna a babai.
10 Adu ti agibumbunannag nga agtutubo, ket maragsakantay ta kaduatay ida a mangaskasaba. Magutugot ken maparegta dagitoy nga agtutubo dagiti kasadarda. Ngem ita nga Abril, gundaway met ti tunggal pamilia a palagdaen ti relasionda ken pabilgen ti espiritualidadda babaen ti sangsangkamaysa a panagtrabahoda iti sagrado a panagserbi. Dagiti ulo ti pamilia koma ti mangyun-una iti daytoy.—Prov. 24:27.
11 Panangtulong Kadagiti Kabbaro: Komusta met dagiti kabbaro nga iyad-adalanyo iti Biblia? Mabalinda kadi ti tumulong iti daytoy naisangsangayan nga aktibidad iti Abril? Nalabit inyebkasda ti tarigagayda a mangisarita kadagiti dadduma ti maipapan kadagiti maad-adalda bayat nga us-usigenyo ti kapitulo 2, parapo 22, wenno kapitulo 11, parapo 14, iti libro a Pannakaammo. No malmalpasyon ti libro, pagsaritaanyo a naimbag daytoy a banag inton adalenyo ti kapitulo 18, parapo 8, a kunana: “Nalabit magagarankay a mangibaga kadagiti kakabagian, gagayyem, ken dadduma pay maipapan iti maad-adalyo. Kinapudnona, mabalin nga ar-aramidenyon daytoy, kas iti panangiranud ni Jesus iti naimbag a damag kadagiti sabsabali iti impormal a kasasaad. (Luc. 10:38, 39; Juan 4:6-15) Ita mabalin a kayatyo a nayonan ti ar-aramidenyo.” Pudno kadi daytoy iti iyad-adalanyo?
12 Patien kadi ti iyad-adalanyo ti Sao ti Dios? An-annurotenna kadin dagiti prinsipio ti Biblia? Intunosna kadin ti biagna kadagiti pagalagadan ti Dios? Makigimgimong kadin? Kayatna kadi a pagserbian ni Jehova a Dios? Apay a diyo ngarud paregtaen a makisarita kadagiti panglakayen tapno matingitingda no makualipikar met laeng nga agbalin a di bautisado nga agibumbunannag ket mabalin a kumuyog kadakayo inton Abril? (Kitaenyo ti libro a Ti Ministeriotayo, panid 97-9.) Iti kasta, makitana a mismo no kasano a suportaran ti organisasion ni Jehova ti panagreggetna nga agserbi ken Jehova.
13 Pudno, adda dagiti estudiante a naparpartak a rumang-ay ngem iti dadduma. Maitunos ngarud iti instruksion ti Hunio 2000 a Ti Ministeriotayo iti Pagarian, panid 4, parapo 5-6, adu ti nangyadal iti maikadua a libro kadagiti tattao a nangipakita iti interes idi damo ngem agkasapulan iti kanayonan a tulong tapno agbalinda nga aktibo a maitimpuyog. Ditay pulos maawanan iti namnama a dagitoy a nasingpet panagpuspusoda a tattao agbalindanto a pudpudno nga adalan ni Kristo, “iti ababa a tiempo wenno iti atiddog a tiempo.” (Ara. 26:29) Ngem no iti panagkunayo ket “atiddog a tiempo” ti sumagmamano a bulan a panangyadalyo kadagiti kasta a tattao, saan ngata a nagsayaat a gundaway ti panawen ti Memorial tapno maipakita ti iyad-adalanyo ti kadakkel ti apresasionna iti pangsubbot ni Kristo?
14 No Kasano a Matulongan Ida a Makiraman: Adu ti masursurotayo no kasano a matulongan dagiti kualipikado a mangasaba babaen ti panangusigtayo iti wagas a panangsanay ni Jesus kadagiti dadduma. Saan a basta nangbirok iti maysa a tallaong sana imbilin a kasabaan dagiti apostolna. Impaganetgetna nga umuna ti kinapateg ti trabaho a panangasaba, indagadagna ti kanayon a panagkararag, sana inted kadakuada ti tallo a kangrunaan probision: kadua, teritoria, ken mensahe. (Mat. 9:35-38; 10:5-7; Mar. 6:7; Luc. 9:2, 6) Maaramidyo met ti kasta. No ti tultulonganyo ket anakyo, baro nga estudiante, wenno maysa a naginaktibo, nasayaat no ikagumaanyo nga aramiden dagiti sumaganad.
15 Ipaganetget ti Kinapateg: Igunamgunam iti tao ti kinapateg ti trabaho a panangasaba. Positibokayo koma iti dayta. Mangisalaysay kadagiti kapadasan a mangipakita no ania dagiti maar-aramidan ti kongregasion iti ministerio. Iparangarang ti espiritu nga impakita ni Jesus iti Mateo 9:36-38. Paregtaenyo ti potensial nga agibumbunannag wenno ti inaktibo nga ikararagna ti pannakiramanna iti ministerio agraman ti panagballigi ti trabaho iti intero a lubong.
16 Paregtaenyo nga Agbalin a Sipapanunot iti Adu a Gundaway a Mangasaba: Dakamatenyo a mabalinna ti makikuyog iti grupo ti panagadal iti libro tapno mangasaba iti binalaybalay. Paregtaenyo a kasabaanna dagiti kabagianna ken am-ammona, katrabahuan wenno kaeskuelaanna kabayatan ti pangngaldaw. No agbibiahe, nalaka a mairugi ti pannakisarita babaen laeng iti panangipakita iti personal nga interes kadagiti pada a pasahero. No datayo ti mangyun-una, masansan a marugian ti maysa a nasayaat a panangasaba. Talaga nga adu ti gundaway a mairanud iti dadduma ti namnamatayo ‘iti inaldaw-aldaw.’—Sal. 96:2, 3.
17 Ngem kasla nasaysayaat no iti kabiitan a panawen a dakayo ken ti baro nga agibumbunannag ti agkadua a mangasaba. No inkeddengyo a parayrayen ti panagserbiyo kabayatan ti Abril, saludsodenyo iti mangas-asikaso iti teritoria no adda kombiniente a teritoria. No adda, gundawayyo a trabahuen a naimbag dayta. Kas pagarigan, no nalpas ti panangasaba wenno agbiahekayo a mapan makigimong wenno iti sabali a lugar, mabalin a madlawyo nga adda tao iti balay nga awan nadanonyo idi wenno awan nangipakita iti interes. No maitutop, dumaw-askay iti kasayaatan a tiempo. Iti kasta, mangted daytoy iti pannakapnek ken rag-o iti ministerio.
18 Mangisagana iti Makaallukoy a Mensahe: Sabali a banag ti pannakaadda iti tarigagay a mangiranud iti mensahe ti Pagarian. Sabali met a banag ti pannakaadda iti kompiansa a mangiranud iti dayta, nangnangruna no isut’ kabbaro wenno nabayagen a di mangaskasaba. Saan a sayang ti oras a mabusbos iti panangtulong kadagiti kabbaro wenno inaktibo nga agsagana. Dagiti Gimong iti Serbisio ken dagiti taripnong sakbay ti panangasaba ket makaipaayda kadagiti makatulong a punto, ngem dakdakkel ti maaramidan ti personal a panagsagana.
19 Kasanoyo a tulongan dagiti kabbaro nga agsagana a mangasaba? Rugianyo nga isuro no kasano ti mangipaima iti magasin, ket aramidenyo a simple ken ababa! Kiddawenyo nga agpanunotda kadagiti agdama a damdamag a pakaseknan dagiti tattao iti teritoria, sa mangbirok iti maysa nga artikulo iti agdama a magasin a mainaig iti dayta. Ensayuenyo a dua ti presentasion, ket usarenyo dayta iti ministerio iti kabiitan a panawen.
20 Sukayen ti Potensial Para iti Masanguanan nga Irarang-ay: Itay napan a tawen, nasurok a 14.8 milion ti timmabuno iti Memorial iti intero a lubong. Nasurok laeng nga innem a milion ti nagreport kas agibumbunannag. Ipakita daytoy nga agarup 8.8 milion a tattao ti addaan interes ta uray la immayda iti daytoy espesial nga okasion a nakangngeganda iti pannakailawlawag ti maysa kadagiti kangrunaan a sursuro ti Biblia. Naam-ammoda ti dadduma kadatayo, ket mabalin a naparegtada iti dayta. Adu kadakuada ti mangap-apresiar kadatayo, tumultulong iti sangalubongan a trabahotayo, ken mangidepdepensa kadatayo. Daytoy a dakkel a grupo ket potensial para iti masanguanan nga irarang-ay. Ania ti maitulongtayo kadakuada a rumang-ay?
21 Kaaduan kadagiti kabbaro a timmabuno iti Memorial ket personal nga inawis ti maysa kadatayo. Daytoy ti mangipakita nga am-ammoda ti maysa kadatayo. No adda tumabuno gapu iti awistayo, responsabilidadtayo a pagbalinen a natalged ti riknana ken tulongan a magunggonaan a naan-anay iti programa. Yantangay mapnonto ti pagtataripnongan, ibirokanyo iti pagtugawanna. Pabulodanyo iti Biblia, ket awisen a makipagkanta iti bukodyo a pagkantaan. Sungbatanyo ti aniaman a saludsodna. Ti naayat a panangasikasoyo ket dakkel a banag a mangtukay iti interesna. Siempre, rebbengentay amin daytoy—no adda makita a baro a rupa, sibabara nga abrasaen, ken makisarita uray apagbiit laeng tapno maam-ammotayo ida.
22 Ti itatabuno iti Memorial ket makaipaay iti dakkel nga epekto iti pampanunot ti maysa a tao. Ti laengen pannakigimongna ket mabalin a mangipakita a dina pay nasarakan ti birbirokenna iti sabali a pammati ket adda kadatayo ti banag a mariknana a nasken nga usigenna nga ad-adda pay. Para iti maysa nga awanan pannakaammo maipapan iti aglaplapusanan nga ayat ni Jehova, mabalin a naisalsalumina a pannakaipalgak kenkuana ti pannakailawlawag ti probision a naisangsangayan a subbot. Mabalin a madlawna a dagus a naidumatayo—napudno, nainggayyeman, naayat, ken nadayaw. Ti paggigimongantayo ket naiduma iti nakitana kadagiti simbaan nga addaan kadagiti ladawan ken ubbaw a ritual. Sigurado a madlaw dagiti kabbaro a dagiti agdengdengngeg ket buklen ti nadumaduma a kita dagiti tattao ken awan ti panagur-or. Dagitoy a makitada ti mabalin a nabileg a rason tapno umaydanto manen.
23 Kalpasan ti Memorial, masapul a masarungkaran a dagus ti tunggal kabbaro a timmabuno. No adda kabbaro a naawisyo, dakayo ti kangrunaan a makinrebbeng. Sakbay nga agawidda, siguraduenyo nga ammoda ti maipapan kadagiti dadduma a gimong iti Kingdom Hall. Dakamatenyo ti tema ti sumaruno a palawag publiko. Ipakaammo kadakuada ti lugar ken oras ti Panagadal iti Libro ti Kongregasion a kaasitgan iti pagtaenganda. Kalpasanna, ikkanyo ida iti kopia ti libro a Kinaragsak ti Pamilia, ket ibagayo kadakuada a ti maadal iti lawas ti Abril 30 ket “Salaknibanyo ti Pamiliayo Kadagiti Makadadael nga Impluensia.” Ilawlawagyo no apay nga agplanplano ti intero a kongregasion a tumabuno iti asamblea sirkito wenno espesial nga asamblea, no adda ti nakaeskediul iti mabiit.
24 Mangyurnos iti makapabileg a panagbisita iti pagtaenganda. Siguraduenyo nga adda kopiada iti broshur a Kalikaguman ken libro a Pannakaammo, a mangiwardas kadakuada kadagiti napateg a sursuro ti Biblia. No saanda pay nga agad-adal, itukonyo ti panagadal iti Biblia. Isingasingyo a basaenda ti baro a broshur a Jehovah’s Witnesses, a silalawag a mangyilustrar no kasano nga agan-andar ti organisasiontayo. Awisenyo a buyaenda dagiti video-tayo, kas iti Our Whole Association of Brothers. Iyam-ammoyo ida kadagiti kakabsat iti kongregasion. Kadagiti sumaganad a bulbulan, itultuloyyo a sarungkaran dagiti kabbaro; awisenyo ida a makigimong inton bumisita ti manangaywan ti sirkito wenno no adda asamblea sirkito wenno espesial nga asamblea. Ipaayanyo ida iti amin a gundaway tapno paneknekanda a “siuumiso a maikari[da] iti agnanayon a biag”!—Ara. 13:48.
25 No Ania ti Maaramidan Dagiti Panglakayen: Nangnangruna nga agpannuray kadagiti panglakayen ti panagballigi ti narayray a ministerio iti daytoy nga Abril. No maysakayo a konduktor iti Panagadal iti Libro ti Kongregasion, ilistayo dagiti mabalinyo nga itulong iti tunggal kameng ti grupoyo tapno makiramanda iti naisangsangayan nga aktibidad. Adda kadi asinoman a kameng ti grupoyo nga agtutubo, kabbaro, iregular, wenno inaktibo? Ammuenyo no tultulongan ida dagiti nagannakda, dagiti payunir, wenno dadduma nga agibumbunannag. Aramidenyo ti amin a kabaelanyo a tumulong. Maysa a kabsat a babai a nagbalin nga iregular iti panangasaba kadagiti naglabas a dua a tawen ti nangbusbos iti nasurok a 50 nga oras iti ministerio idi napan nga Abril. Apay a naaramidanna dayta? Kinunana a maigapu dayta iti makapabileg a panangipastor nga isasarungkar dagiti panglakayen.
26 Nasken nga agtitinnulong dagiti panglakayen ken dagiti ministerial nga adipen tapno masiguradoda nga adda umdas a teritoria, magasin, ken literatura para iti umay a bulan. Mabalin kadi a mangyurnos kadagiti kanayonan a taripnong sakbay ti panangasaba? No wen, ipakaammoyo dagita nga espesial nga urnos. Kangrunaan ti amin, iti personal ken publiko a kararagyo, dawatenyo ti panangbendision ni Jehova iti bulan ti naparayray a panagserbi mainaig iti Pagarian.—Roma 15:30, 31; 2 Tes. 3:1.
27 Idi napan nga Abril, iti maysa a kongregasion idiay North Carolina, talaga nga indagadag dagiti panglakayen ti narayray a pannakiraman iti ministerio. Iti gimong kada lawas, imparegtada kadagiti agibumbunannag ti sikakararag a panangusig no kabaelanda ti ag-auxiliary pioneer. Iti kada gundaway, siraragsak a dinakdakamat ti amin a panglakayen ken ministerial nga adipen ti maipapan iti panamagbalin iti Abril kas ti kasayaatan a bulan. Kas resultana, nagpayunir iti dayta a bulan ti 58 porsiento kadagiti agibumbunannag, agraman ti amin a panglakayen ken ministerial nga adipen!
28 Ti Rag-o ti Naan-anay a Pannakiraman: Ania dagiti pagimbaganna no ‘agtrabaho a sipipinget ken umagawatayo’ iti ministerio? (1 Tim. 4:10) No maipapan iti kinaregta ti kongregasionda idi napan nga Abril, kinuna dagiti nadakamat a panglakayen: “Masansan nga estoriaen dagiti kakabsat no kasano nga ad-adda a nariknada ti ayat ken kinasinged iti maysa ken maysa sipud idi kanayon a nakipagtrabahoda iti tay-ak ti ministerio.”
29 Maysa nga agtutubo a kabsat a lalaki a di unay makagunay ti nagtarigagay a makiraman iti espesial nga aktibidad idi napan nga Abril. Babaen ti nasayaat a panagplano ken tulong ni nanangna ken dagiti kakabsat iti naespirituan, nagbalin a nabunga ti bulanna kas auxiliary pioneer. Kasanot’ panagriknana iti kapadasanna? Kinunana: “Damok daydi a narikna a kaslaak nakasalsalun-at a tao.”
30 Awan duadua a sibabaknang a bendisionan ni Jehova dagidiay mangipateg unay iti pribilehioda a mangideklara iti kinaarina. (Sal. 145:11, 12) Bayat a rambakantayo ti ipapatay ti Apotayo, ammotayo nga iti masanguanan addadanto pay aglaplapusanan a bendision para kadagidiay addaan iti nadiosan a debosion. Inil-iliw la ketdi ni apostol Pablo ti gunggona a biag nga agnanayon. Kaskasdi, ammona a saan a basta urayen ken namnamaen lattan dayta. Insuratna: “Gapu itoy a panggep pudno unay nga agtartrabahoak a sipipinget, nga umag-agawaak maitunos iti panagtignayna ken isu agar-aramid kaniak buyogen ti pannakabalin.” (Col. 1:29) Ni Jehova, babaen ken Jesus, pinabilegna ni Pablo tapno mairingpasna ti makaispal-biag a ministerio, ket mabalinna met nga aramiden ti kasta kadatayo ita. Kasta kadi ti aramidenyo iti daytoy Abril?
[Kahon iti panid 3]
Siasino ti Mabalinyo a Paregtaen a Mangasaba Bayat ti Abril?
Ti anakyo?
Ti iyad-adalanyo iti Biblia?
Maysa a naginaktibo?