Mapagbalintayo Kadi ti Abril 2000 a Kasayaatan a Bulantayo?
1 Ti rabii ti Mierkoles, Abril 19, isunto ti tampok ti tawen serbisiotayo. Bayat nga in-inut a lumnek ti init iti intero a daga iti dayta nga aldaw, tunggal kongregasion ken grupo dagiti Saksi ni Jehova iti sangalubongan rambakandanto ti Memorial ti ipapatay ni Kristo. Sadinoman a time zone ti pagnanaedantayo, ti pananglaglagip iti daton ni Jesu-Kristo isunto ti kapatgan a pasamak iti tawen. Namarkaan ti petsa ti Memorial iti nairagpin a “Teokratiko a Kalendario Para iti Abril 2000,” a masarakan iti panid 6 daytoy a suplemento.
2 Ipaayannatayo ti intero a bulan ti Abril iti nagsayaat a gundaway a mangipakita iti amin-kararua a panangapresiartayo iti di kaikarian a kinamanangngaasi ni Jehova a nayebkas babaen ti pannakaidaton ti Anakna. Kasano a kasta? Nagsurat ni apostol Pablo: “Ti ayat nga adda ken Kristo pilitennakami, agsipud ta isu daytoy ti impatomi, a ti maysa a tao natay maipaay iti isuamin; no kasta, ngarud, natay ti isuamin; ket isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken napagungar.” (2 Cor. 5:14, 15) Wen, kabayatan ti Abril maipakitatayo a saantay nga agbibiag a maipaay iti bagitayo no di ket agpaay kenkuana a natay gapu kadatayo, a pagbalinentayo daytoy a kasayaatan a bulan kas ministro ti Pagarian!
3 Ag-auxiliary Pioneer iti Abril: Nangipaay ni apostol Pablo iti makatukay a pagulidanantayo idi kinunana: “Diak ilalaen ti kararuak a kas napateg kaniak, maturposko la ketdi ti tarayek ken ti ministerio nga inawatko ken Apo Jesus, tapno naan-anay a mangipaayak ti pangsaksi iti naimbag a damag ti di kaikarian a kinamanangaasi ti Dios.” (Ara. 20:24) Addaantayo iti umasping a pribilehio a mangsaksi a naan-anay ken Jehova a Dios. Gapuna, kayattayo a pagbalinen ti Abril a kasayaatan a bulantayo iti trabaho a panag-auxiliary pioneer!
4 Yantangay addaan iti kompleto a lima a ngudo ti lawas, nasayaat unay a bulan ti Abril 2000 a panagpayunir dagiti adu. Idi Abril 1997, idi naabuttayo ti kangatuan a bilang dagiti auxiliary pioneer, dagiti 22,410 a nakiraman ket inrepresentarda ti 18 porsiento iti dagup dagiti agibumbunannag. Kalpasan ti dua ket kagudua a tawen, ngimmato iti gistay 6 a porsiento ti dagup dagiti agibumbunannag a nagreport idi Oktubre 1999. Kayat a sawen daytoy a talaga nga adda pangnamnamaantayo a manglab-aw iti dati a kangatuan a bilang dagiti auxiliary pioneer. Mainayon pay, bimmassiten ti makalikaguman nga oras, isu a nalaklakan a maragpat dagiti ad-adu pay iti kongregasion daytoy a paset ti serbisio. Buyogen ti kararag usigen koma ti kada nabautisaran nga agibumbunannag no mabalinna ti ag-auxiliary pioneer iti daytoy nga Abril.
5 Babaen ti panangusaryo iti “Teokratiko a Kalendario Para iti Abril 2000” iti daytoy a suplemento, iplanoyo itan ti eskediulyo iti sumaganad a bulan. Ikeddengyo dagiti aldaw a mabalinyo ti makiraman iti tay-ak ti serbisio, sa dagupenyo amin ti oras a pagarupenyo a mausaryo iti trabaho a panangasaba iti dayta a bulan. Iramanyo ti oras a mabusbosyo a mangasaba kadagiti sabsabali iti pormal ken di pormal. Ti kadi pakadagupanna ket asidegen iti makalikaguman a 50 nga oras para kadagiti auxiliary pioneer? No agkurangkayo iti kasapulan nga oras, mabalinyo kadi nga aturen pay ti eskediulyo tapno magatangyo ti tiempo iti panag-auxiliary pioneer? Kasapulanyo laeng ti promedio a maysa nga oras ken 40 a minuto iti kada aldaw tapno maabutyo ti 50 nga oras iti makabulan.
6 Ita ta napabassit metten ti oras a makalikaguman kadagiti regular pioneer, pinampanunotyo kadin ti sumrek iti amin-tiempo a ministerio? Apay nga urayenyo pay ti Setiembre? Nasayaat ti mangrugi iti bulan ti Abril! No pagarupenyo a kasla diyo kabaelan nga abuten ti 70 nga oras a makalikaguman kadagiti regular pioneer, apay a dikay ag-auxiliary pioneer iti Abril ket pagbalinenyo a kalatyo ti 70 nga oras? No makitayon a kabaelanyo dayta, mabalin a tarigagayanyo ti ag-regular pioneer iti kabiitan a tiempo.—Kitaenyo ti Ministeriotayo, panid 113-14.
7 Makiraman a Naan-anay kas Agibumbunannag iti Naimbag a Damag: Datayo amin, agibumbunannag man ken payunir, ti napaypayso nga ayattayo iti Dios ken iti kaarruba tignayennatayo a naimpusuan a mangaramid iti amin a kabaelantayo nga agserbi ken Jehova sigun kadagiti personal a sirkumstansiatayo. (Luc. 10:27) Iti kasta, ipakpakitatay nga “agtartrabahotayo a sipipinget ken umag-agawatayo, agsipud ta insadagtayo ti namnamatayo iti sibibiag a Dios, a Manangisalakan iti amin a kita ti tattao, nangnangruna kadagiti matalek.” (1 Tim. 4:10) Dayta ti gapuna a namnamaentayo koma ti 100-porsiento a pannakipaset iti Abril, a makiraman a naan-anay ti tunggal maysa iti trabaho ti Pagarian.
8 Ditay koma liplipatan ti patigmaan ni Jesus: “Ti anien dakkel, ngem bassit dagiti managobra. Ngarud, ipakaasiyo iti Apo ti panagani a mangibaon kadagiti managobra iti panaganina.” Madagdagus kalpasan ti panangibagana iti dayta, inayaban ni Jesus dagiti 12 nga apostolna sana imbaon ida a mangasaba. (Mat. 9:37, 38; 10:1, 5, 7) Kalpasan ti agarup makatawen, idi nasanayen a naan-anay dagiti 12 iti trabaho a panangasaba, “nangdutok [ni Jesus] iti pitopulo a sabsabali ket imbaonna ida,” nga impaayanna ida iti isu met laeng nga instruksion: “Kinapudnona, dakkel ti anien . . . Gapuna ipakaasiyo iti Apo ti panagani a mangibaon kadagiti managobra iti panaganina.” (Luc. 10:1, 2) Ipadamag ti libro ti Biblia a Dagiti Aramid no kasano a sinungbatan ni Jehova dagidiay a kararag. Idi Pentecostes 33 K.P., immadu dagiti adalan a nagbalin nga agarup 120. Kalpasanna, nagsaruno a naragpatda dagiti kangatuan a bilang dagiti adalan a 3,000 ken 5,000. (Ara. 1:15; 2:41; 4:4) Kalpasan dayta, “ti bilang dagiti adalan nagtultuloy nga umadu.” (Ara. 6:7) Kasta met, iti moderno a panawen, masapul nga itultuloytayo ti agkiddaw iti Apo iti ad-adu pay a manangikasaba iti Pagarian! Maitunos iti karkararagtayo, adda koma masnup nga urnos ti kada agibumbunannag iti kongregasion a makipaset iti ministerio iti kada bulan.
9 Pangngaasiyo ta kitaenyo manen ti nairagpin a “Teokratiko a Kalendario Para iti Abril 2000.” Yantangay Sabado ken Domingo dagiti umuna a dua nga aldaw ti bulan, maiplanoyo kadi ti makiraman iti serbisio iti dayta a ngudo ti lawas, tapno nasapa ti panangrugiyo iti dayta a bulan? Masuportaranyo kadi ti kada “Panagiwaras iti Magasin” iti dayta a bulan iti grupoyo iti Panagadal iti Libro ti Kongregasion? Ti ngay panangbusbos iti maysa wenno ad-adu pay nga oras kada Domingo iti ministerio? Mayurnosyo kadi ti makiraman iti panangasaba iti rabii? Ken diyo liplipatan ti mangaprobetsar iti amin nga oportunidadyo a mangasaba iti di pormal iti pagtrabahuan, idiay eskuelaan, wenno bayat nga ar-aramidenyo ti dadduma pay a trabahoyo iti inaldaw. Markaanyo no aniada nga aldaw ti mabalinyo nga usaren iti ministerio, ket usarenyo ti kalendario a pangisuratan iti oras a panagserbiyo iti dayta a bulan.
10 Ti Abril ket maitutop a tiempo para iti amin a kualipikado ken inaprobaran dagiti panglakayen a mangrugi nga agserbi kas di nabautisaran nga agibumbunannag. No adda iyad-adalanyo iti Biblia, rimmang-ay kadin dayta a tao ken mabalinnan ti umasideg iti mamangulo a manangaywan tapno kiddawenna no makapagserbin a kas agibumbunannag iti naimbag a damag? No adda annakyo a di pay nabautisaran, impakaammoyo kadin kadagiti panglakayen ti naespirituan a panagrang-ayda? Saan ngata a daytoyen ti nasayaat a tiempo a panangrugida a mangasaba?—Kitaenyo ti Ministeriotayo, panid 97-100.
11 Iti panangikagumaantayo a mamagbalin iti Abril 2000 a kasayaatan a bulantayo, nasken a makiramantayo amin iti ministerio sa itedtay ti reporttayo iti tay-ak ti serbisio iti ngudo ti bulan. (Idiligyo ti Marcos 6:30.) Paregtaentayo koma dagiti kabbaro a di nabautisaran nga agibumbunannag a damo a makiraman iti tay-ak ti serbisio nga ireportda a dagus ti nagapuananda. Babaen ti panangaramidtayo iti pasettayo, adda nasayaat a maitulongtayo iti report iti Abril ken iti naindaklan a dir-i ti panangidayaw a maipaayto ken Jehova babaen kadagiti panagreggettayo a mangasaba.
12 Agawiskayo Kadagiti Kaduayo iti Memorial: Ditay kadi maragsakan nga addanto baro a kangatuan a bilang dagiti tumabuno kabayatan ti tawen 2000 a Pananglagip iti ipapatay ni Kristo? Wen, maragsakantayo! Kayatna a sawen a daytanto pay laeng ti kaaduan a tattao a nagtataripnong tapno iparangarangda ti apresasionda kadagiti kadakkelan nga ebkas ti ayat nga inaramid ni Jehova a Dios ken ni Jesu-Kristo nga agpaay kadatayo! (Juan 3:16; 15:13) Aramidenyo amin a kasapulan nga urnos tapno awanto ti makalapped kadakayo ken ti pamiliayo a tumabuno iti Memorial.
13 Tiempona metten tapno rugiantayo nga awisen dagiti sabsabali iti Memorial. Ilistayo amin a kayatyo a makita a tumabuno. Iramanyo ti asinoman a nagadal idin iti Biblia, dagidiay agad-adal ita, ken amin a sarsarungkaranyo. Ilistayo met dagiti gagayyemyo iti pagtrabahuan, idiay eskuelaan, ken iti sangakaarrubaan, kasta met ti asinoman a kanegosioyo. Diyo liplipatan nga iraman dagiti sabsabali pay a gagayyem ken kakabagianyo. No mailistayon, rugianyon nga awisen a sipapasnek ti tunggal maysa. Ibatadyo no kaano ken sadino ti pakaangayanto ti Memorial. Bayat nga umas-asideg ti Abril 19, palagipanyo dagidiay nailistayo, personal man wenno iti telepono. Ibagayo nga agkuyogkayo a mapan iti Memorial iti dayta a rabii.
14 Maitunos iti napalabas nga instruksion manipud iti Sosiedad, pagreggetanto ti bagi dagiti panglakayen a paregtaen dagiti amin a di aktibo nga agibumbunannag iti teritoria tapno tumabunoda iti Memorial. (Mat. 18:12-14) Kayatto a repasuen dagiti panglakayen ti surat ti Sosiedad a Pebrero 2, 1999. Ilista ti sekretario ti kongregasion amin a di aktibo nga agibumbunannag, sa mangdutok ti manangaywan ti serbisio kadagiti panglakayen a mangsarungkar ken mangawis kadakuada iti Memorial. Nalabit babaen ti makaparegta a panangsarungkar kadakuada dagiti papastor iti kabiitan a panawen, mabalin a matulongan dagitoy a di aktibo tapno agaktiboda manen iti tay-ak ti ministerio, uray iti Abril. Mapabilegdanto no maawisda a makikadua iti aduan kapadasan nga agibumbunannag iti tay-ak ti serbisio.
15 Iparegta ti Nasayaat a Panangsuporta iti Abril! Kasapulan ti nasayaat a panagtitinnulong dagiti amin a panglakayen, ministerial nga ad-adipen, ken dagiti ulo ti pamilia tapno mapagbalintayo ti Abril 2000 a kasayaatan a bulantayo. Ganetgetanto dagiti panglakayen ti nasayaat a panangorganisarda iti amin a banag ken ti panangidauloda. (Heb. 13:7) Nasken ti panangaramid kadagiti praktikal nga urnos para kadagiti taripnong a maipaay iti serbisio iti tay-ak kadagiti ordinario nga aldaw ken ngudo ti lawas. Mabalin a mayurnos dagiti kanayonan a taripnong a maipaay iti serbisio para iti panangasaba iti mumalmalem ken iti sardam. Maipaskil koma iti information board ti kompleto nga eskediul dagiti amin a naiplano para iti Abril. Nasken nga adda matudingan a mangidaulo iti kada nayeskediul a taripnong para iti serbisio. Adda koma mayeskediul nga umdas a teritoria a trabahuen ti tunggal grupo.
16 Maitampok iti Abril dagiti magasin a Pagwanawanan ken Agriingkayo! Iti panangikagumaan a mangirugi kadagiti panangyadal iti Biblia, itukon koma ti broshur a Kalikaguman iti amin a mangipakita iti interes. Gapuna, masapul nga adda nawadwad a suplay a magasin ken broshur.
17 Iti ngudo ti bulan, amin a konduktor ti panagadal iti libro ken dagiti katulonganda paregtaenda ti tunggal maysa iti grupoda a mangited a dagus iti reportda iti serbisio apaman nga agngudo ti bulan. Nalabit maaramid pay ketdi daytoy iti Domingo, Abril 30. Kalpasanna, inton kuentaen ti sekretario dagiti report, no makitana nga addada agibumbunannag a di pay nagreport, siaanus a palagipanna ida nga agreport sakbay ti Mayo 6, nga isu dayta ti masapul a panangipatulodna iti report ti kongregasion iti Sosiedad. Mabalin nga idawatna kadagiti konduktor ti panagadal iti libro a tumulongda a mangpalagip iti tunggal agibumbunannag nga agreport.
18 Ti tiempo ti Memorial isu ti kapatgan a periodo ti tawen para iti ili ti Dios. Rumbeng nga okupadotayo amin iti panagserbi ken Jehova iti dayta a tiempo. Kastanto no tunggal maysa ket makiraman a naan-anay kas agibumbunannag iti naimbag a damag, no ag-auxiliary pioneer dagidiay makabael, ken no naaneptayo nga agawis kadagiti sabsabali iti Memorial ti ipapatay ni Kristo. Ipasnektayo koma nga ikararag ti nabaknang a pamendision ni Jehova bayat nga ikagumaantayo a pagbalinen ti Abril 2000 a kasayaatan a bulantayo, nga agpaay a pakaidayawan ken pakaitan-okan ti Dios!—Heb. 13:15.
[Kahon iti panid 3]
Auxiliary Pioneer
Ti Kangatuan Pay Laeng a Bilangtayo: 120,979
(Abril 1997)
[Kahon iti panid 4]
Dagup ti Agibumbunannag
Ti Kangatuan Pay Laeng a Bilangtayo: 133,297
(Nobiembre 1999)
[Kahon iti panid 5]
Timmabuno iti Memorial
Ti Kangatuan Pay Laeng a Bilangtayo: 407,094
(1999)