Regtaanyo ti Agaramid iti Naimbag!
1 Bayat a sumrektayo iti panawen ti Memorial iti 2003, adu ti rasontayo nga ‘agregta iti naimbag.’ (1 Ped. 3:13) Kangrunaan kadagitoy ti daton a pangsubbot ni Jesu-Kristo. (Mat. 20:28; Juan 3:16) Maipapan iti daytoy, insurat ni apostol Pedro: “Saan a babaen iti agrupsa a bambanag, iti pirak wenno balitok, a naispalkayo iti awanan bunga a kita ti panagbibiagyo. . . . No di ket babaen iti napateg a dara, a kas iti dara ti awan pakapilawanna ken di namulitan a kordero, ti mismo a dara ni Kristo.” (1 Ped. 1:18, 19) Ti panagyaman iti daytoy naisangsangayan nga ebkas ti ayat tignayennatayo nga agbalin a naanep nga agaramid iti naimbag, ta ammotayo nga inyawat ni Jesus ti “bagina maipaay kadatayo tapno maispalnatayo iti tunggal kita ti kinakillo ket dalusanna a maipaay iti bagina ti maysa nga ili a naisangsangayan a kukuana, naregta iti nasayaat nga ar-aramid.”—Tito 2:14; 2 Cor. 5:14, 15.
2 No aramidentayo ti makaay-ayo iti imatang ti Dios, matagiragsaktayo ti nasayaat a relasion kenkuana ken sidudungngo nga aywanannatayo. Kinuna pay ni Pedro: “Ti agtarigagay nga agayat iti biag ken makakita iti naimbag nga al-aldaw, . . . umadayo koma iti dakes ket aramidenna ti naimbag; sapulenna koma ti talna ket surotenna dayta. Ta dagiti mata ni Jehova addada kadagidiay nalinteg, ket dagiti lapayagna situturong iti ararawda.” (1 Ped. 3:10-12) Kadagitoy napeggad a tiempo, anian a nagsayaat a maammuan nga ay-aywanannatayo ni Jehova ken madadaan nga agtignay maipaay kadatayo, “tapno saluadanna[tayo] kas iti alintatao ti matana.”—Deut. 32:10; 2 Cron. 16:9.
3 Nupay naipasangoda kadagiti suot, dagiti nagkauna a Kristiano a sinuratan ni Pedro nalapunosda iti regta a di madepdep, ken naan-anay nga insaknapda ti naimbag a damag. (1 Ped. 1:6; 4:12) Pudno met dayta iti ili ti Dios ita. Nupay agbibiagtayo kadagiti “napeggad a tiempo a narigat a pakilangenan,” ti panagyaman iti kinaimbag ni Jehova tignayennatayo a mangaramid a sireregta iti pagayatan ti Dios. (2 Tim. 3:1; Sal. 145:7) Usigentayo ti dadduma kadagiti naimbag nga aramid a pakakumikomantayo iti panawen ti Memorial.
4 Awisenyo Dagiti Dadduma a Tumabuno iti Memorial: Maipakitatayo ti panagyaman iti subbot, a maysa a naisangsangayan a sagut, babaen ti itatabuno iti tinawen a pananglaglagip iti ipapatay ni Jesus, a marambakan ita a tawen inton Mierkoles, Abril 16, kalpasan ti ilelennek ti init. (Luc. 22:19, 20) Idi napan a tawen, iti 94,600 a kongregasion iti sangalubongan, agdagup iti 15,597,746 ti timmabuno! Ad-adu dayta iti nasurok a 220,000 ngem idi 2001.
5 Mano ti tumabuno ita a tawen? Agpannuray unay dayta iti panangikagumaantayo a mangawis kadagiti dadduma a makitaripnong kadatayo. Irugiyo babaen ti panangilista kadagiti amin a kayatyo nga awisen. Iyun-unayo nga ilista dagiti mismo a kapamiliayo. No di manamati ti asawayo, iyebkasyo ti naimpusuan a tarigagayyo a kaduaennakayo koma a tumabuno. Maysa a di manamati nga asawa a lalaki ti nagkuna a timmabuno iti Memorial idi napan a tawen agsipud ta makitana a napateg ken baketna ti itatabunona. Isarunoyo nga ilista dagiti kabagian, kaarruba, katrabahuan, wenno kaeskuelaanyo. Siguraduenyo nga awisen dagiti iyad-adalanyo iti Biblia.
6 No nakaaramidkayon iti listaan, mangyeskediulkayo iti panawen a mangawis a personal iti tunggal maysa. Usarenyo dagiti nayimprenta nga imbitasion ti Memorial. Tapno nalaka a matandaanan dagiti tattao no kaano ken sadino a maangay ti Memorial, imakinilia wenno saysayaatenyo nga isurat ti oras ken pakaangayan ti Memorial iti baba ti imbitasion. Bayat nga umas-asideg ti Abril 16, palagipanyo dagidiay adda iti listaanyo, personal man wenno babaen ti telepono. Tulongantayo dagiti amin a mabalintay nga awisen a tumabuno iti daytoy kasasagraduan nga okasion.
7 Tulonganyo Dagidiay Tumabuno iti Memorial: Kanayon a makaparagsak nga okasion ti Memorial. Addaantayo iti gundaway a mangabrasa kadagidiay saan a kadawyan a tumabtabuno kadagiti gimongtayo. No ipalubos dagiti kasasaad, nasapakayo koma a sumangpet ken saankayo nga agawid a dagus. Asitgan ken am-ammuenyo dagiti damoda ti tumabuno. Nabara ken manangsangailikayo koma.—Roma 12:13.
8 Matulonganyo kadi nga ad-adda a rumang-ay iti naespirituan ti dadduma kadagiti timmabuno iti Memorial babaen ti panangyadal iti Biblia iti pagtaenganda? Ikagumaanyo nga alaen dagiti nagan ken address dagiti bisita a saan pay a masarsarungkaran tapno agtultuloy a matulonganyo ida. Babaen ti naayat a tulong, mabalin a rumang-ay ti dadduma kadagitoy agingga a kualipikadodan nga agbalin a di bautisado nga agibumbunannag sakbay ti Memorial iti sumaganad a tawen. No sarungkaranyo dagiti timmabuno iti Memorial, awisenyo ida a dumngeg iti espesial a palawag inton Abril 27.
9 Makapag-Auxiliary Pioneer-kayo Kadi Ita a Kalgaw? Kada tawen, ti regtatayo maipaay ken ni Jehova tignayennatayo a makiraman a naan-anay iti ministerio kadagiti bulan ti naisangsangayan a teokratiko nga aktibidad. Iti Pilipinas idi napan a tawen, 9,515 ti nag-auxiliary pioneer idi Marso, 15,458 idi Abril, ken 12,652 idi Mayo. Kadagitoy a tallo a bulan, agdagup iti 1,528,501 ti oras a nabusbosda iti ministerio ken agpromedio iti 13,836 a panangyadal iti Biblia ti naikonduktada. Nasayaat dagiti resulta ti panagbibinnulig dagiti amin a kongregasion a mangikasaba a sireregta iti naimbag a damag iti panawen ti Memorial.
10 Impadamag ti maysa a kongregasion nga addaan iti 107 nga agibumbunannag ken 9 a regular pioneer a “naisangsangayan a bulan” kadakuada ti Abril idi napan a tawen, ta 53 ti nag-auxiliary pioneer, a pakairamanan dagiti amin a panglakayen ken ministerial nga adipen. Kasano nga imparegta dagiti panglakayen ti panag-auxiliary pioneer iti dayta a bulan? Nasapada nga inaramid dayta, a pinaregtada nga agpayunir dagiti amin a makabael. Naangay dagiti taripnong para iti serbisio iti tay-ak iti nadumaduma nga oras ti aldaw tapno makaruar dagiti amin iti kongregasion. Naipaganetget la unay ti panangasaba babaen ti telepono, nangruna para kadagiti nakapuy ti salun-atda.
11 Nag-auxiliary pioneer ti maysa a kabsat a baket nga agtawen iti 86 ken saan a makapagna gapu ta nakapuy ti salun-atna. Iti agsapa, irugina ti mangasaba babaen ti telepono iti dua nga oras bayat a nakatugaw iti abay ti lamisaan iti kosina, aginana iti sumagmamano nga oras, sana ituloy. Nakasaritana ti maysa a tao a natay ti lakayna ken dua nga annakna a lallaki iti napalabas a dua a tawen. Di maawatan daytoy a tao no apay nga ipalubos ti Dios a mapasamak dagiti kasta a dakes a banag. Kinasabaan a naimbag ti kabsat, ket nairugi ti panagadal iti Biblia. Ti panangasaba babaen ti telepono iti rabii ken iti dadduma pay a tiempo ket epektibo a wagas tapno makasarita dagiti tattao nga agnanaed kadagiti pasdek wenno lugar a narigat a serken. Babaen iti dayta, makasarita met dagiti agibumbunannag dagiti tattao nga awan iti pagtaenganda no aldaw.
12 Iti pagnguduan ti report dagiti panglakayen, kinunada: “Nagsayaat ti nagapuananmi ket agyamankami kadagiti pribilehio ken bendision nga impaay ni Jehova iti tunggal maysa kadakami.” Babaen ti umiso a panagplano, mabalin a masagrap met ti kongregasionyo dagiti kasta a bendision.
13 Ikagumaanyo ti Makiraman a Naan-anay iti Ministerio: Ti panagayattayo iti Dios ken iti kaarruba tignayennatayo a manggundaway iti tunggal bulan a mangiranud iti naimbag a damag kadagiti dadduma. (Mat. 22:37-39) Dagiti manangaywan iti Panagadal iti Libro ti Kongregasion ken dagiti katulonganda ikagumaanda koma a tulongan dagiti kagrupoda a makiraman iti ministerio iti kada bulan. Ti maysa a nasayaat a pamay-an tapno maaramid daytoy ket babaen ti antemano a pannakitulag a makipagtrabaho iti ministerio kadagiti espesipiko nga indibidual iti grupoyo. Sapaenyo nga aramiden daytoy imbes nga iyurayyo iti ngudo ti bulan. Iti kasta, ad-adu ti gundawayyo a mangipaay iti naayat a tulong.
14 Adda kadi dagiti nakapuy ti salun-atda nga agibumbunannag iti grupoyo a marigatan unay a makiraman iti ministerio? No addada kadagiti balay a pagtaraknan wenno saanda a makaruar iti pagtaenganda, nalawag a limitado dagiti gundawayda a mangasaba. Ngem no aprobetsarenda ti limitado a gundawayda a mangisilnag iti lawagda, dagidiay makapaliiw kadagiti nasayaat nga aramidda mabalin a matignayda a mangipakita iti napaypayso nga interes iti kinapudno. (Mat. 5:16) Siguraduen koma dagiti manangaywan iti panagadal iti libro nga ammo dagita a kakabsat a mabalinda nga ireport ti nagapuananda iti tay-ak ti serbisio iti sag-15 a minuto. Makaparegta kadagitoy a matalek nga agibumbunannag no mabalinda nga ireport ti panawen a mabusbosda iti panangasaba, ken mangyeg dayta kadakuada iti rag-o ken pannakapnek. Makatulong met dayta tapno masigurado nga umiso ti maaramid a report maipapan iti sangalubongan nga aktibidad ti ili ti Dios.
15 Dagiti Agtutubo a Naanep nga Agar-aramid iti Naimbag! Anian a makaay-ayo a makita dagiti Kristiano nga agtutubo a mangus-usar iti kired ken pigsada nga agserbi ken ni Jehova! (Prov. 20:29) No maysaka nga agtutubo, kasanom a maipakita ti regtam maipaay ken ni Jehova kadagitoy a naisangsangayan a bulan ti teokratiko nga aktibidad?
16 No saanka pay a di bautisado nga agibumbunannag iti kongregasion, maikagumaam kadi a ragpaten dayta a pribilehio? Isaludsodmo dagitoy iti bagim: ‘Addaanak kadi iti pamunganayan a pannakaammo iti kinapudno a linaon ti Biblia? Kayatko kadi ti makiraman iti ministerio? Mapagulidanan kadi ti konduktak? Kabaelak kadi nga iyebkas ti pammatik babaen ti panangisarsaritak iti naimbag a damag kadagiti dadduma? Naimpusuan kadi ti panangaramidko iti dayta?’ No wen ti sungbatmo kadagita a saludsod, ibagam kadagiti dadakkelmo a kayatmo ti agbalin nga agibumbunannag. Mabalin nga asitgan dagiti dadakkelmo ti maysa kadagiti panglakayen iti komite ti serbisio.
17 No maysakan nga agibumbunannag iti naimbag a damag, mabalinmo kadi a gundawayan ti bakasionyo idiay eskuelaan tapno ad-adda a maiwayaam ti makiraman iti ministerio? Babaen ti nasayaat nga eskediul ken tulong dagiti nagannak ken dadduma pay, adu a bautisado nga agtutubo ti nakapag-auxiliary pioneer bayat ti bakasion iti kalgaw. No saanka a makapagpayunir, iyad-addam pay ti makiraman iti ministerio iti tay-ak. Mangaramidka iti kalatmo. Malaksid iti kaadu ti oras a busbosem, mangaramidka iti sabali pay a kalat a mainaig iti kalidad ti ministeriom. Nalabit mabalinmo nga ikagumaan ti mangibasa iti maysa a teksto iti tunggal bumalay, pasayaaten ti kalidad ti isasarungkarmo, mangirugi iti panangyadal iti Biblia, wenno palawaen ti ministeriom babaen ti panangasaba iti telepono wenno dadduma pay a benneg ti ministerio. Ti ngay kalat a panangawis iti kaarruba, kaeskuela, wenno kabagiam a tumabuno iti Memorial ita a tawen? Makagunggona ken sigurado a makaparegta kadagiti dadduma iti kongregasion ti naan-anay a pannakiraman kadagiti teokratiko nga aktibidad.—1 Tes. 5:11.
18 Tulonganyo Dagiti Kabbaro a Rumang-ay: Iti napalabas a tawen serbisio, agpromedio iti 97,456 a panangyadal iti Biblia iti pagtaengan ti maikonkondukta kada bulan iti Pilipinas. Inton agangay, adu kadagitoy a mayad-adalan ti rumang-ay agingga nga agdedikar ken agpabautisarda. Nupay kasta, sakbay a maragpatda dayta a kalat, nasken a tulongantay ida nga agbalin a kualipikado kas agibumbunannag iti naimbag a damag. Napateg daytoy nga addang iti panangisuro kadagiti kabbaro tapno agbalinda a pasurot ni Jesu-Kristo. (Mat. 9:9; Luc. 6:40) Adda kadi iyad-adalanyo iti Biblia a nakasagana a mangaramid iti dayta nga addang?
19 No diyo masinunuo ti irarang-ay ti iyad-adalanyo, agpatulongkayo iti manangaywan iti panagadal iti libro wenno iti manangaywan iti serbisio. Mabalinyo nga awisen no mangyadalkayo. Addaan dagitoy a kakabsat iti napateg a kapadasan a pangtingitingan iti naespirituan nga irarang-ay ti iyad-adalanyo. Mabalin nga adda dagiti singasingda a makatulong iti iyad-adalanyo nga agtultuloy a rumang-ay iti naespirituan.
20 No tarigagayan ti iyad-adalanyo ti agbalin a di bautisado nga agibumbunannag ken makitayo a kualipikadon, kasaritayo ti mamangulo a manangaywan. Mangtuding iti dua a panglakayen a makisarita kadakayo ken iti iyad-adalanyo tapno matingiting no kualipikadon, nga usarenda ti impormasion iti panid 98-9 ti libro a Ministeriotayo. (Kitaenyo Ti Pagwanawanan, Nobiembre 15, 1988, panid 17.) No maanamongan nga agbalin nga agibumbunannag ti iyad-adalanyo, masapul nga irugiyo a dagus a sanayen. Apaman a naitednan ti reportna iti serbisio iti tay-ak, maipakaammo iti kongregasion nga isu ket maysan a di bautisado nga agibumbunannag. Namnamaentayo a rinibu a kabbaro nga agibumbunannag, agtutubo man wenno nataengan, ti makaragpat iti daytoy napateg nga addang kadagitoy naisangsangayan a bulan ti teokratiko nga aktibidad.
21 Nasayaat ti Magapuanan No Agplano: Ti antemano a panagplano dakkel ti maitulongna iti panagballigi dagiti teokratiko nga aktibidadtayo iti daytoy panawen ti Memorial. (Prov. 21:5) Adu dagiti banag a nasken nga asikasuen dagiti panglakayen.
22 Tapno nasayaat ti magapuanan ti kongregasion iti ministerio, mangyurnos koma dagiti panglakayen kadagiti taripnong para iti serbisio iti tay-ak iti las-ud ti makalawas ken iti ngudo ti lawas. Ti manangaywan iti serbisio ti mangidaulo a mangaramid kadagita nga urnos. Mabalin kadi ti mangyurnos kadagiti kanayonan a taripnong iti bigbigat, mumalmalem, wenno sardam? Mapakaammuan koma ti kongregasion maipapan kadagiti urnos. Makatulong no maipaskil ti eskediul iti information board.
23 Masapul a siguraduen dagiti panglakayen a nasapa a maaramid dagiti urnos para iti Memorial sakbay ti Abril 16. Ramanen dagitoy ti pannakitulag iti dadduma a kongregasion a mangusar met iti Kingdom Hall, panangdalus iti Kingdom Hall, panangpili kadagiti attendant ken mangipasa kadagiti emblema, ken pananggun-od kadagiti emblema. Mapakaammuan koma ti kongregasion maipapan iti oras ken pakaangayan ti Memorial ken aniaman a panagbalbaliw ti eskediul dagiti gimong iti lawas. No maasikaso a naimbag dagitoy a banag, ti Memorial ket ‘maaramid a sitatakneng ken sigun iti urnos.’—1 Cor. 14:40.
24 Mabalin a kayat dagiti ulo ti pamilia a pagsasaritaan kabayatan ti panagadal ti pamiliada no kasano a maiwayaan ti pamiliada ti makiraman iti naganetget nga aktibidad iti panawen ti Memorial. Makapag-auxiliary pioneer-kayo kadi a sangapamiliaan? Wenno mabalinan kadi ti pamiliayo a suportaran nga agpayunir ti maysa wenno ad-adu pay a kameng ti pamiliayo? No saan a posible dayta, mangaramidkayo kadagiti espesipiko a kalat kas pamilia tapno ad-adu a panawen ti mabusbosyo iti ministerio. Adda kadi ub-ubing a kameng ti pamiliayo a makualipikar nga agbalin a di bautisado nga agibumbunannag babaen ti pammaregta ken pannarabayyo? Mano ti maawis ti pamiliayo a tumabuno iti Memorial ita a tawen? Ti nasayaat a panagplano mangyeg iti adu a bendision ken rag-o iti pamiliayo.
25 Naan-anay nga Aprobetsarenyo ti Natda a Tiempo: Iti suratna kadagiti Kristiano idi umuna a siglo, pinalagipan ida ni apostol Pedro maipapan iti kinaganat ti tiempo agsipud ta asideg idin a manungpal ti sistema ti bambanag dagiti Judio. (1 Ped. 4:7) Iti kaaldawantayo, ipakita ti amin a pammaneknek nga asidegen a manungpal ti agdama a sangalubongan a sistema ti bambanag. Iti tunggal aldaw, mayanninaw koma iti wagas ti panagbiagtayo ti kasta a pammati. Kas nareregta nga adipen ni Jehova, ipamaysatayo koma nga aramiden ti naganat a trabaho a panangiwaragawag iti naimbag a damag.—Tito 2:13, 14.
26 Panawen daytoy ti panagregta ken panagtignay! Utobenyo ti naaramidan ni Jehova para kadakayo, iti pamiliayo, ken iti kongregasion. Nupay ditay pulos masubadan dagiti adu a paraburna kadatayo, kabaelantayo ti agdayaw ken ni Jehova iti amin a kararuatayo. (Sal. 116:12-14) Bendisionan ni Jehova ti napasnek a panagreggettayo. (Prov. 10:22) Sapay koma ta ‘regtaantayo amin ti agaramid iti naimbag’ iti daytoy naisangsangayan a panawen ti naganetget nga aktibidad, “tapno iti amin a bambanag maipadayag koma ti Dios baeten ken Jesu-Kristo.”—1 Ped. 3:13; 4:11.
[Kahon iti panid 3]
Timmabuno iti Memorial iti Sangalubongan
1999 14,088,751
2000 14,872,086
2001 15,374,986
2002 15,597,746
[Kahon iti panid 4]
Siasino Dagiti Awisem a Tumabuno iti Memorial?
□ Dagiti kapamilia ken kabagian
□ Dagiti kaarruba ken am-ammo
□ Dagiti katrabahuan ken kaeskuelaan
□ Dagiti sarsarungkaran ken iyad-adalan iti Biblia
[Kahon iti panid 5]
Panangtulong Kadagidiay Tumabuno iti Memorial
□ Naimpusuan nga abrasaenyo ida
□ Sarungkaranyo ida
□ Itukonyo kadakuada ti panagadal iti Biblia
□ Awisenyo ida a dumngeg iti espesial a palawag
[Kahon iti panid 6]
Ania Dagiti Kalatmo iti Panawen ti Memorial?
□ Tumabuno iti Memorial daydiay inawismo
□ Agbalin a kualipikado nga agibumbunannag iti naimbag a damag
□ Ikeddeng no mano nga oras ti busbosem iti ministerio
□ Rumang-ay iti maysa a benneg ti ministerio
□ Agserbi kas auxiliary pioneer