Espesial nga Aldaw ti Panangitukon iti Panangyadal iti Biblia
1 Mangrugi inton Enero, mangilatang ti tunggal kongregasion iti maysa a ngudo ti lawas iti kada bulan, nalabit ti umuna a ngudo ti lawas, agpaay iti naipamaysa a panangitukon iti panangyadal iti Biblia. Mabalin a Sabado wenno Domingo dayta, depende iti no ania ti kasayaatan para iti kongregasionyo. No kas pagarigan ta iti dayta nga aldaw ket agkedked dagiti bumalay nga agpayadal iti Biblia, mabalin nga itukon latta dagiti agibumbunannag ti libro nga Isursuro ti Biblia wenno ti kabaruan a ruar ti magasin. Makipaset koma a naan-anay ti amin a panglakayen ken ministerial nga adipen iti daytoy nga urnos ken tulonganda dagiti agibumbunannag a mangirugi kadagiti panangyadal iti Biblia.
2 Ikeddeng ti Komite ti Serbisio ti Kongregasion no ania a ngudo ti lawas ti mausar para iti panangitukon iti panangyadal iti Biblia. Pasaray mangipaayda kadagiti palagip tapno makapagsagana dagiti agibumbunannag ken tapno manayonanda ti panagreggetda a mangitukon iti panangyadal iti Biblia no mapanda mangasaba iti binalaybalay ken no mapanda sarungkaran dagidiay nangipakita iti interes.
3 Panagsagana: Masarakantayo dagiti singasing iti panangirugi kadagiti panangyadal iti Biblia iti suplemento ti Enero 2006 a Ti Ministeriotayo iti Pagarian ken iti panid 12 ti libro a Pannakirinnason. Nalabit kaykayat ti dadduma nga usaren ti tract a kas iti Kayatmo Kadi a Maammuan ti Kinapudno? Ti panid 4 ti Abril 2007 a Ti Ministeriotayo iti Pagarian ket mangipaay met kadagiti singasing no kasano ti mangirugi kadagiti panangyadal iti Biblia no sarungkarantayo dagidiay napaimaantayo iti magasin. Addanto eskediul dagiti panglakayen ken ministerial nga adipen a mangidaulo iti 10 agingga iti 15 a minuto a taripnong sakbay ti panangasaba, a sadiay ket mapagsasaritaan wenno maidemostra ti maysa wenno dua a praktikal a singasing iti panangirugi kadagiti panangyadal iti Biblia.
4 Siempre, saan nga amin ket mayat nga agpayadal iti Biblia wenno agtultuloy nga agadal. Ngem saan koma a dayta ti mangupay kadatayo a mangitukon iti panangyadal yantangay ni Jehova ti mangyad-adani kadagiti marakarnero a tattao iti organisasionna. (Juan 6:44) Saan laeng nga agimula iti bin-i ti responsabilidadtayo. Nasken met a sukayen ken sibugantayo dagidiay bin-i a nagtubo, ket ramanen dayta ti panangyadaltayo kadagidiay nalinteg ti panagpuspusona a tattao. No aramidentayo dayta, agserserbitayo kas katrabahuan ti Dios.—1 Cor. 3:9.