‘Naan-ay a Panangsaksi’—Babaen ti Panangasaba iti Apartment
1. Ania ti ramanen ti ‘naan-anay a panangsaksi iti naimbag a damag’?
1 Kas ken apostol Pablo, tarigagayantayo ti mangipaay iti ‘naan-anay a panangsaksi iti naimbag a damag.’ (Ara. 20:24) No kasta, pagreggetantayo nga iranud ti mensahe ti Pagarian iti adu a tattao iti teritoriatayo aginggat’ mabalin. Ramanen daytoy ti panangdanon iti adu nga agnanaed kadagiti apartment. No dadduma, saan a kaskarina ti sumrek kadagiti kasta a pasdek. Ngem yantangay adu a tattao ti aggigian kadagiti apartment, ipaayannatayo dayta iti adu a gundaway a mangirakurak iti naimbag a damag.
2. Apay a nagpateg ti panagbalin a naannad ken ti panangtingiting a naimbag kadagiti bambanag no mangasabatayo iti apartment?
2 Gapu iti panagraira ti krimen ken kinaranggas, umad-adu nga apartment ti nakakandado ken addaan iti guardia wenno kadagiti kamera a pagsiput. (2 Tim. 3:1, 2) Nalabit adda paglintegan ti makinkukua a saan a maipalubos a sumrek dagiti estranghero. Mabalin a paruarendatayo ti katalek wenno ti makinkua iti apartment nangruna no agreklamo ti maysa kadagiti agup-upa. Ngarud, napateg ti panagbalin a naannad ken ti panangtingiting a naimbag kadagiti bambanag.
3. Kaano ti kasayaatan a panangasaba kadagiti apartment, ken apay?
3 No Kaano ti Panangasaba: Kas iti dadduma a teritoriatayo, nasaysayaat no mapantayo kadagiti apartment iti tiempo nga adda dagiti agindeg. Mabalin a pagsuspetsaandatayo no sumrektayo kadagiti apartment bayat nga awan ti kaaduan kadagiti agindeg. Natakuatan ti adu nga agibumbunannag nga ad-adda a madanonda dagiti agindeg no sumarungkarda iti sardam wenno kadagiti malem ti Sabado ken Domingo. No mangasabatayo kadagiti apartment iti bigbigat, nangruna kadagiti ngudo ti lawas, mabalin nga ireklamodatayo dagiti agindeg kadagiti makinkukua iti apartment.
4, 5. Kasanotay a makasarita dagiti aggigian kadagiti sumagmamano nga apartment a nakakandado dagiti ruanganna?
4 Iseserrek Kadagiti Apartment: Saan a nasken a kauman dagiti agibumbunannag ti katalek wenno ti dadduma pay nga empleado iti apartment sakbay a mangasabada iti dayta. No adda intercom iti pagserkan ti maysa a nakakandado a pasdek, mabalintay nga usaren dayta a makisarita iti asinoman a mayat a mangpastrek kadatayo. Depende iti kita ti apartment, mabalintay met ti agtuktok kadagiti dadduma pay a ruangan kalpasan a makasaritatayo daydiay nangpastrek kadatayo. Ngem adda met dagiti kasasaad a nasaysayaat no rummuartayo pay iti pasdek kalpasan a makasaritatayo daydiay nangpastrek kadatayo satay usaren manen ti intercom a mangkontak iti sabali pay nga aggigian iti dayta nga apartment. Masapul a tingitingentayo a naimbag no mano ti mabalintay a kasabaan iti maymaysa nga isasarungkar.
5 Adda dagiti agindeg a kaykayatda nga iti intercom lattan ti pangibagaam iti gagaram. No kasta ti kayatda, naingayyeman nga iyam-ammom ti bagim. No adda iti directory iti abay ti intercom ti nagan ti bumalay, usarem dayta bayat ti pannakisaritam kenkuana. Ibagam iti apagbiit no ania ti gagaram. Nagballigi dagiti dadduma babaen ti panangibasada iti maysa nga introduksion manipud iti libro a Pannakirinnason.
6. Ania ti aramidentayo no mangasabatayo kadagiti apartment nga addaan iti guardia?
6 No adda guardia iti maysa nga apartment ket saannatay a palubosan a makisarita kadagiti aggigian iti dayta, isu ti ikagumaantayo a kasabaan. Adu a guardia ti maragragsakan a mangbasa kadagiti literaturatayo. Mabalin a pastrekennatay pay ketdi iti lobby tapno iyadalantayo iti Biblia. No ipalubos ti guardia a sarungkarantayo ti maysa nga agindeg a nangipakita iti interes, kaaduanna a nasaysayaat no ditay gundawayan ti agtuktok kadagiti dadduma a ruangan iti apartment.
7. Ania ti laglagipentayo no agusartayo iti bag no mapantayo mangasaba?
7 Panaglanglanga ken Nadayaw a Kababalin: Mabalin a pagduaduaandatayo no agawittayo iti dadakkel a portpolio. Isu a nasaysayaat no bassit laeng a bag ti awittayo wenno uray saantayon a mangitugtugot iti bag. Ti dadduma nga agibumbunannag ikabilda dagiti literatura nga awitda iti naingpis a folder sa ibolsa wenno iggemanda lattan ti Bibliada.
8. Kasano ti pannakaorganisar ti grupo a mangasaba iti apartment?
8 Nasaysayaat no ditay aguummong nangruna kadagiti lobby wenno kadagiti paradaan tapno saantayo a mangawis iti atension. Agbalintay koma a naannad no mangaskasabatayo kadagiti apartment iti lugar a masansan a pakapasamakan ti krimen. (Prov. 22:3) Kas pagarigan, uray dua wenno tallo a paris laeng ti mangtrabaho iti maysa a kadsaaran. Saanda koma nga agiinnadayo ken nalabit agsisinnublatda a makisarita iti tunggal ruangan ken urayenda ti paris a makimbatang a makisarita.
9. Kasanotay a maipakita ti nadayaw a kababalin, ken apay a napateg dayta?
9 No sumrekkayo iti maysa nga apartment, agpigadkayo ken irikepyo ti ruangan apaman a makastrekkayo. No ipakitatayo ti kasta a konsiderasion, awan ti maireklamo kadatayo dagiti agindeg. No nakaunegtayon, agdiretsotayo a dagus iti elebeytor wenno iti kadsaaran a nakaitudingantayo imbes nga agpagnapagna wenno agtaliataliawtay pay laeng iti pagserkan. Iti kasta, saan nga agsuspetsa ti asinoman a makakita kadatayo.
10. Kasanotay a maliklikan ti agaariwawa no addatayo iti pasilio ti apartment?
10 Kadagiti adu nga apartment, mangngeg iti pasilio ti ariwawa. Ngarud, ti kapigsa ti timekyo ket umdas laeng koma a mangngeg ti kasarsaritayo a bumalay. Diyo met pigpigsaan ti makisarita kadagiti padayo nga agibumbunannag tapno didakay pagsuspetsaan dagiti agindeg. Tapno saan a maisturbo dagiti agindeg, ti dadduma nga agibumbunannag agsisinnublatda a makisao iti tunggal ruangan agingga a maungpot ti tunggal kadsaaran, imbes a paggigiddanenda a trabahuen amin a kadsaaran. Maysa pay, liklikantay koma ti agtuktok iti nakapigpigsa a mabalin a mangpabuteng iti bumalay.
11. Ania dagiti singasing a makatulong no adda pagsiripan iti ruangan a pagtuktuktokantayo?
11 No adda pagsiripan iti ruangan, agtakderkayo tapno ti bumalay ket makitanakayo ken ti kaduayo. Kumitakayo iti pagsiripan, ket no madlawyo nga adda tao, kablaawanyo ida ken irugiyo a dagus ti presentasionyo. No saludsoden ti bumalay no asinokayo, nasaysayaat no ibagayo ti naganyo ken ti nagan ti kaduayo. Mabalin nga ad-adda a komportable ti bumalay a mangilukat iti ridaw no ibagayo ti naganyo. No bilang ta saan a manglukat, mabalin a kasabaanyo lattan iti ruangan.
12. No saantayo a madanon ti bumalay, kasanotayo a maliklikan ti problema no agibatitayo iti literatura?
12 No Awan ti Tao: Masansan nga irekreklamo dagiti katalek nga isu pay a pidpidutenda dagiti publikasiontayo a naitayab kadagiti pasilio wenno iti dalan. No ibatitay lattan dagiti literatura iti ruar ti ridaw, nalaka laeng a maitayab ken maiwara dagitoy. Ngarud, no awan ti bumalay ket agibatitayo iti literatura, siguraduentayo a saan a makita dagita dagiti lumablabas wenno saan a maitayab.
13. Ania ti aramidentayo no makapungtot ti bumalay?
13 Makapungtot a Bumalay: No makapungtot ti bumalay ken madlawtayo a kayatna ti agipulong iti katalek, nasaysayaat no pumanawtayon iti dayta a kadsaaran ket agsublitayto laengen iti sabali a gundaway. Iti dadduma a kasasaad, nasaysayaat no isardengtayo pay laeng ti mangasaba iti intero a pasdek tapno maliklikan ti komprontasion iti katalek iti apartment. Uray no saan a dinakamat ti bumalay a dina kayat ti makasabaan, nasaysayaat no mainotar ti numero ti apartment ken mamarkaan iti do-not-call sa maikabil dayta nga impormasion iti territory card. Kas kadagiti dadduma pay a pagtaengan a namarkaan iti do-not-call, dagiti agindeg kadagita nga adres ket bisitaentayo latta sagpaminsan tapno maammuan no umanamongen a masarungkaran ti bumalay.
14, 15. Ania ti rumbeng nga aramidentayo no paruarendatayo ti paraaywan iti apartment?
14 No Paruarendakayo: No paruarendakayo ti katalek, guardia, paramantener, wenno ti siasinoman nga agay-aywan iti dayta nga apartment, nainsiriban nga agtungpalkayo a dagus. Aginggat’ mabalin, liklikantayo ti komprontasion a mabalin nga agresulta iti pammutbuteng wenno pannakaireporttayo iti polis. Kaaduanna a dagiti empleado iti apartment ket saan a bumusbusor kadagiti Saksi ni Jehova no di ket ar-aramidenda laeng ti trabahoda.
15 No kas pagarigan ta paruarennakayo ti paraaywan iti apartment, mabalinyo nga ilawlawag kenkuana ti gagarayo iti naalumamay ken nataktika a wagas. (1 Ped. 3:15) Apresiarentayo ti responsabilidadna a mangtaginayon iti naragsak a kasasaad ken iti kinatalged dagiti agindeg iti apartment. Nalabit palubosannakayo nga agtalinaed iti pasdek. Ngem no saan, pumanawkayo a sitatalna, a liklikanyo ti makidiskutir. No ipalubos ti kasasaad, damagenyo no mabalin ti agibati iti tunggal ruar ti literatura iti lobby. (Col. 4:6) Kanayon koma a mapakaammuan ti manangaywan iti serbisio mainaig kadagita a pasamak.
16. Ania ti aramidentayo no tumaud dagiti problema iti panangpadastayo a mangasaba kadagiti apartment?
16 Kalpasan ti sumagmamano a tiempo, nalabit mabalin manen a padasen dagiti agibumbunannag ti mangasaba a siaannad iti dayta a pasdek. Ngem no tumaud latta ti problema, masapul nga agpatulong dagiti panglakayen iti sanga nga opisina imbes a dagiti agibumbunannag ti mangiremedio lattan kadagiti bambanag. No saan a mabalin ti sumrek kadagiti apartment, mabalin a padasen dagiti agibumbunannag ti sabali a pamay-an ti panangkontak kadagiti agindeg, kas koma iti panangasaba babaen ti telepono wenno surat. Dagiti dadduma nga agibumbunannag mangasabada iti kalsada iti sango a mismo ti apartment wenno iti lawlaw ti apartment kadagiti oras iti bigat a mapan agtrabaho dagiti agindeg wenno iti rabii inton agaawidda manipud iti trabaho.
17. Apay a napateg ti panangasaba kadagiti apartment?
17 Mabiiten nga agpatingga ti agdama a dakes a sistema. Dagidiay laeng umawag iti nagan ni Jehova ti maispal. “Nupay kasta, kasano ti panangawagdanto iti daydiay a kenkuana saanda a naaddaan iti pammati? Kasta met, kasano a maaddaandanto iti pammati iti daydiay saanda a nangngeg?” (Roma 10:13, 14) Agnanaed kadagiti apartment ti adu kadagiti “siuumiso nga agannayas iti agnanayon a biag.” (Ara. 13:48) Babaen ti panagbalin a naannad ken panangtingiting a naimbag kadagiti bambanag, maidanontayo kadakuada ti naimbag a damag.