Us-usarem Kadi ti Libro a Pannakirinnason?
1. Kasano a nangisuro da apostol Pablo ken Jesus?
1 Inkagumaan ni apostol Pablo ti “nakirinnason . . . manipud iti Kasuratan.” (Ara. 17:2, 3; 18:19) Tinuladna ni Jesus a kanayon a nagadaw manipud iti Kasuratan ken nagusar kadagiti ilustrasion tapno maawatan dagiti agdengdengngeg kenkuana no ania ti pagayatan ti Dios. (Mat. 12:1-12) Nairanta ti libro a Pannakirinnason a tumulong kadatayo a mangaramid met iti kasta.
2. Kasanotay a mausar ti libro a Pannakirinnason iti panangisagana kadagiti epektibo nga introduksion?
2 Panangisagana Kadagiti Epektibo nga Introduksion: Naglaon ti libro a Panakirinnason Manipud iti Kasuratan kadagiti makatukay iti interes nga introduksion a masarakan iti panid 9-15. No sursuruem ti agusar iti nagduduma nga introduksion, nangruna kadagiti kanayon a maas-asak a teritoria, mabaliwbaliwam ti presentasionmo ken pagbalinennaka a nalalaing ken epektibo iti panangirugi iti saritaan. Mabalinmo a basaen a direkta iti libro ti introduksionmo nangruna no mangaskasabaka babaen ti telepono wenno no makisarsaritaka babaen ti intercom kadagiti nainget ti pannakaguardiana a pasdek.
3. Ania ti masarakan iti panid 16-24 ti libro a Pannakirinnason a makatulong kadatayo iti ministerio?
3 Panangsungbat Kadagiti Pangguped iti Saritaan: Sakbay a mapantayo iti teritoria, makatulong no saganaantayo dagiti posible a pangguped dagiti bumalay iti saritaan babaen ti panangbusbostayo iti sumagmamano a minuto a mangrepaso kadagiti singasing iti panid 16-20 no kasano a sungbatan dagita. Ti kadi dadduma kadagiti bumalay ket Budista, Hindu, Judio, wenno Muslim? No kasta, makatulong ti impormasion iti panid 21-24.
4. Kasanotay a mausar ti libro a Pannakirinnason no adda saludsod ti bumalay wenno no mangibangon iti kontrobersial a suheto?
4 Panangsungbat Kadagiti Saludsod: Matulongannatay met ti libro a Pannakirinnason no adda saludsod ti bumalay wenno no mangibangon iti kontrobersial a suheto. Mabalinmo nga ibaga kenkuana nga adda makapainteres a banag mainaig iti dayta a suheto a kayatmo nga ipakita kenkuana, sa iruarmo ti librom a Pannakirinnason. Yantangay alpabetiko ti pannakailista dagiti suheto, kitaem ti kangrunaan a paulo a pampanunotem a naglaon iti impormasion a kasapulam. Kalpasanna pabalasbasam dagiti saludsod a napuskol ti pannakaisuratna. No saanmo a masapulan a dagus ti birbirokem, kitaem ti indise iti likud. Apaman a masarakam ti maitutop nga impormasion, basaem a direkta dayta manipud iti libro. No maipapan iti espesipiko a teksto ti pagsarsaritaanyo, makatulong ti impormasion iti panid 445 iti babaen ti “Dagiti Kasuratan a Masansan Di Umisot’ Pannakaiyaplikarna.”
5. Ania ti dadduma pay a makagunggona a pakausaran ti libro a Pannakirinnason?
5 Dadduma pay a Pakausaranna: Itugtugot ti dadduma ti libroda a Pannakirinnason idiay pagtrabahuan wenno eskuelaan tapno usarenda a mangsungbat kadagiti saludsod a kas iti, ‘Apay a saanyo a ramrambakan dagiti piesta opisial?’ Natakuatan dagiti agtutubo a makatulong dagiti impormasion iti babaen ti paulo a “Panamarsua” ken “Ebolusion” no agaramidda kadagiti report idiay eskuelaan. Adda kadi masakit wenno natayan a mapanmo bisitaen? Ti impormasion iti babaen ti tema a “Pammaregta” matulongannaka a mangipaay iti liwliwa a naibatay iti Biblia. Naglaon met ti libro a Pannakirinnason kadagiti makatulong nga impormasion para kadagiti agisagsagana iti palawag ken kadagiti mangikonkondukta iti taripnong sakbay ti panangasaba.
6. Ania ti kalattayo no mangaskasabatayo?
6 No mangaskasabatayo, ti kalattayo ket saan a tapno mangabak iti argumento wenno tapno mangidatag laeng iti impormasion. Kayattayo ti makirinnason a sieepektibo manipud iti Kasuratan. No usarentayo a naimbag ti libro a Pannakirinnason, ipakpakitatayo nga agtultuloy nga as-asikasuentayo ti panangisurotayo.—1 Tim. 4:16.