No Kasano a Maparang-ay ti Abilidad a Makirinnason
1 Ti maysa a depinasion ti sao a “rason” ket “pannakisarita iti sabali tapno impluensiaan ti tigtignay wenno kapanunotanna.” Tapno maparang-ay ti kinaepektiboyo iti ministerio, nasken a parang-ayenyo ti abilidad a makirinnason kadagidiay makasaritayo. (Ara. 17:2-4) Ngem kasanoyo a maparang-ay daytoy a laing?
2 Mangrugi Dayta iti Panagmennamenna: Iti panangadalyo kadagiti kinapudno iti Biblia, makitayonto a makatulong ti panangutob iti material. No addada punto a kasla medio narikut, iwayaanyo ti agsukimat ken mangpanunot kadagiti sungbat. Ikagumaanyo a tarusan a silalawag saan laeng a dagiti naipaay nga eksplanasion no di pay ket dagiti Nainkasuratan a rason no apay a kasdiay ti pannakailawlawagda.
3 Karaman ti Panagsagana Para iti Ministerio: Panunotenyo no kasanoyo nga ilawlawag ti kinapudno iti nadumaduma a kita ti tattao. Mangparnuaykayo iti mamagpanunot a saludsod a mangtukay iti interes. Ammuen no kasanoyo nga isinggalut ti Nainkasuratan a punto ken irasonan dayta. Panunotenyo a nasakbay dagiti mabalin a tumaud nga argumento, ket utobenyo no kasano nga ilawlawag dagita. Mangsarak iti kasayaatan a punto manipud iti tukon a publikasion.
4 Surotenyo ti Ulidan ni Jesus: Impaay ni Jesus ti kasayaatan nga ulidan ti epektibo a pannakirinnason manipud iti Kasuratan. Tapno maammuanyo no kasano ti panangisurona, usigenyo ti salaysay a masarakan iti Lucas 10:25-37. Imutektekanyo daytoy a pamay-an: (1) Iturongyo ti atension iti Kasuratan no sungbatanyo ti salsaludsod dagiti tattao. (2) Paregtaenyo ida nga agsao, ket komendaranyo ida no nasayaat dagiti komentoda. (3) Siguraduenyo nga adda kanayon a panagkanaig ti saludsod ken ti Kasuratan. (4) Mangusar iti makaguyugoy nga ilustrasion tapno sigurado a matarusan ti pudpudno a kaipapanan ti sungbat.—Kitaenyo ti Marso 1, 1986, a Pagwanawanan, panid 27-8, parapo 8-10.
5 Usaren ti Alikamen a Naited Kadatayo: Naipablaak ti Panakirinnason Manipud Kadagiti Kasuratan kas libro a para iti tay-ak ti ministerio. Dagiti introduksion, sungbat kadagiti posible a panggupedda iti panagsasarita, ken dagiti punto a pakirinnason a linaonna tulongandatayo a mangparang-ay iti abilidad a makirinnason. Ti libro a Panakirinnason ket napateg nga alikamen a kanayon koma nga itugottayo iti serbisio ken ditay bumdeng a mangusar no makisaritatayo maipapan iti Biblia. Repasuen ti panid 7-8 ti libro tapno makitayo no kasano ti kasayaatan a panangusar iti dayta.
6 Ad-adda a lumaingkayo a mangasaba ken mangisuro no maparang-ay ti abilidadyo a makirinnason. Mangibunga daytoy kadagiti nabaknang a bendision kadakayo ken kadagidiay makasaritayo iti ministerio.