Asino ti Ari ti Pagarian ti Dios?

• Pinili ti Dios. “Siak a mismo ti nangisaad iti ari a pinilik . . . Itedkonto dagiti nasion a kas tawidmo ket kukuamto ti intero a daga.”​—Salmo 2:6, 8.

• Agtawid iti trono ni Ari David. “Adda ubing a nayanak kadatayo, naited kadatayo ti maysa nga anak a lalaki . . . Agsaknapto ti panagturayna ken saanto nga agpatingga ti kappia, iti trono ni David ken iti pagarianna tapno tumibker.”​—Isaias 9:6, 7.

• Nayanak iti Betlehem. “O Betlehem . . . , aggapunto kenka ti mangituray . . . Makadanonto iti amin a suli ti daga ti kinatan-okna.”—Mikias 5:2, 4.

• Inlaksid dagiti tattao ken napapatay. ‘Naum-umsi, ken imbilangtayo nga awan pategna. . . . Naduyok gapu iti basoltayo; nagrigrigat gapu kadagiti bidduttayo.’—Isaias 53:3, 5.

• Napagungar ken naitan-ok. “Dinakto baybay-an iti Tanem. Dimonto ipalubos a makita daydiay napudno nga adipenmo ti abut. . . . Adda agnanayon a kinaragsak iti kannawan nga imam.”—Salmo 16:10, 11.

Ni Jesu-Kristo ti Kualipikado nga Agturay

Iti intero a pakasaritaan ti tao, maymaysa laeng ti tuktukoyen dagita a detalye, ni Jesu-Kristo. Kinapudnona, imbaga ti maysa nga anghel ken Maria nga ina ni Jesus: “Itedto kenkuana ni Jehova a Dios ti trono ni David nga amana, . . . ken saanto nga agpatingga ti Pagarianna.”​—Lucas 1:31-33.

Saan a pulos a nagbalin nga Ari ni Jesus ditoy daga. Imbes ketdi, iturayanna ti sangatauan manipud langit kas Ari ti Pagarian ti Dios. Apay a kualipikado nga Agturay? Panunotem no kasano a nailadawan ni Jesus idi adda ditoy daga.

• Ay-ayaten ni Jesus dagiti tattao. Tinulongan ni Jesus dagiti lallaki ken babbai, ubbing ken nataengan, aniaman ti kasasaadda. (Mateo 9:36; Marcos 10:16) Idi impakaasi ti maysa nga agkukutel: “No kayatmo laeng koma, mapaimbagnak,” naasian ni Jesus isu a pinaimbagna.—Marcos 1:40-42.

• Sinuruannatayo ni Jesus no kasano a maparagsak ti Dios. Kinunana: “Diyo mapaggiddan a pagserbian ti Dios ken ti Kinabaknang.” Imbagana pay a tratuentayo ti dadduma a kas iti kayattayo a pannakatrato. Naawagan dayta a prinsipio iti Nabalitokan a Bilin (Golden Rule). Malaksid iti dayta, impakitana nga interesado ti Dios iti pampanunoten ken marikriknatayo, saan laeng nga iti ar-aramidentayo. Tapno ngarud maparagsaktayo ti Dios, masapul a kontrolentayo dagiti rikriknatayo. (Mateo 5:28; 6:24; 7:12) Impaganetget ni Jesus a tapno agbalintayo a pudpudno a naragsak, masapul nga ammuentayo no ania ti kayat ti Dios nga aramidentayo ket aramidentayo dayta.—Lucas 11:28.

• Insuro ni Jesus no kasano nga ipakita ti ayat. Nabileg dagiti sasao ken aramid ni Jesus ket natukay ti puso dagiti dumdumngeg. “Nagsiddaaw ti adu a tattao iti pamay-an ti panangisurona, ta nangisuro kas maysa nga addaan autoridad.” (Mateo 7:28, 29) Insurona kadakuada: ‘Ayatenyo dagiti kabusoryo.’ Inkararaganna pay dagiti nangpapatay kenkuana: “Ama, pakawanem ida, ta saanda nga ammo ti ar-aramidenda.”—Mateo 5:44; Lucas 23:34.

Ni Jesus ti kualipikado unay ken makabael nga Agturay gapu ta nalaing a tumulong ken naasi. Ngem kaano a nangrugi nga agturay?