Kasano ti Pannakangngegda?
1. Apay a saan a kaskarina ti mangasaba, ngem apay nga agporsegitayo?
1 Gapu ta umad-adanin ti aldaw ni Jehova, masapul a sigaganat a tulongantayo ti adu a tattao a manggun-od iti umiso a pannakaammo maipapan iti Dios ken iti panggepna iti sangatauan. (Juan 17:3; 2 Ped. 3:9, 10) Ngem mabalin a saan a kaskarina ti tumulong no dadduma gapu ta adu ti mangyaleng-aleng wenno manguy-uyaw kadatayo no mapantayo mangasaba. (2 Ped. 3:3, 4) Kaskasdi, adu ti panggapuantayo a mamati nga adda pay laeng dagiti mayat nga umawat iti naimbag a damag iti teritoriatayo no mangngeganda dayta. Ngem kasano a mangngeganda dayta no awan ti mangasaba?—Roma 10:14, 15.
2. Kasano a makaparegta kadatayo ti ulidan ni apostol Pablo?
2 Panangsaranget iti Ibubusor: Yantangay adda pay laeng dagiti mayat a dumngeg iti mensahe maipapan iti Pagarian, ditay maupay a mangasaba. Ti Filipos ti umuna a siudad idiay Europa a nakangngeg iti naimbag a damag nga inkaskasaba ni apostol Pablo. Idi siuulbod a napabasolda ken Silas, napangpang-or ken naibaludda sadiay. (Ara. 16:16-24) Ngem iti laksid dayta a nasaem a kapadasan, saan a nagbuteng wenno simmardeng ni Pablo a nangasaba. Idi napan idiay Tesalonica, ti maikadua a siudad a sinarungkaranna kas misionero, isu ket ‘nagurnong iti tured babaen iti Dios.’ (1 Tes. 2:2) Saan kadi a ti ulidan ni Pablo pabilgennatayo a ‘di sumuko’ iti ministeriotayo?—Gal. 6:9.
3. Ania ti mabalin a mamagbalbaliw kadagidiay dati a saan nga interesado?
3 Iti unos ti adu a tawen, adu a tattao ti saan idi a mangipangpangag iti mensahetayo ngem nagbalbaliw itan ti panangmatmatda. Nalabit a maigapu dayta iti panagsuek ti ekonomia, panagsakit, ipupusay ti maysa a miembro ti pamilia, wenno dagiti makapadanag a damdamag iti lubong. (1 Cor. 7:31) Dagiti dadduma nga addaan kadagiti bumusbusor a nagannak ket nagbalinen a nataengan ken interesadoda itan a dumngeg. No agtultuloytayo a mangasaba, maikkan dagita a tattao iti gundaway nga “umawag iti nagan ni Jehova” sakbay a maladaw ti amin.—Roma 10:13.
4. Ania ti mangtignay kadatayo nga agtultuloy iti ministeriotayo nga “awan sarday”?
4 “Awan Sarday”: Ti ayattayo iti Dios ken kadagiti kaarrubatayo ti mangtignay kadatayo nga agtultuloy nga “awan sarday” a mangasaba ken mangaramid iti adalan, kas iti inaramid dagiti apostol idi umuna a siglo. (Ara. 5:42) Adu ita ti “agsensennaay ken umas-asug gapu iti amin a nakarimrimon a bambanag” a mapaspasamak. (Ezeq. 9:4) Anian a namnama ken bang-ar ti itden ti naimbag a damag kadagiti mangipangag iti dayta! Nupay di kayat ti kaaduan a tattao ti dumngeg, ipatalged kadatayo ti Kasuratan a maay-ayo ni Jehova kadagiti panagreggettayo.—Heb. 13:15, 16.