No Apay nga Agkarasublitayo
1. Ania a saludsod ti tumaud mainaig iti trabahotayo a panangasaba?
1 Iti adu a lugar, masansan a mawanwanas ti teritoriatayo. Agkarasublitayo kadagiti isu met laeng a balay uray no mabalin nga imbagan ti bumalay nga isu ket saan nga interesado. Apay nga itultuloytayo latta a sarungkaran dagidiay saan a nangipakita iti interes?
2. Ania ti kangrunaan a makagapu no apay nga agtalinaedtayo a naganetget iti ministerio?
2 Ayat ken Jehova ken Kadagiti Tattao: Ti ayattayo ken Jehova ti kangrunaan a makagapu nga agtalinaedtayo a naganetget iti ministerio. Tignayennatayo ti pusotayo nga agtultuloy a mangisarsarita kadagiti sabsabali iti maipapan iti naindaklan a Diostayo. (Luc. 6:45) Gutugotennatayo ti ayattayo ken Jehova a mangtungpal kadagiti bilinna ken tumulong kadagiti sabsabali a mangaramid met iti kasta. (Prov. 27:11; 1 Juan 5:3) Ti panagtultuloytayo a mangitungpal iti daytoy a trabaho ket saan nga agpannuray iti reaksion dagiti tattao. Iti laksid ti pannakaidadanes dagiti Kristiano idi umuna a siglo, intultuloyda ti nangasaba nga ‘awanan sarday.’ (Ara. 5:42) Ditay koma maupay no saan a dumngeg dagiti tattao no di ket itultuloytayo latta ti mangasaba, nga ipakitatayo ti kauneg ti ayat ken debosiontayo kenni Jehova.
3. Kasano a ti ayattayo kadagiti tattao tulongannatayo nga agtultuloy a mangasaba?
3 Agtultuloy met a mangaskasabatayo gapu ta ay-ayatentayo ti kaarrubatayo. (Luc. 10:27) Saan a kayat ni Jehova a madadael ti asinoman. (2 Ped. 3:9) Uray iti teritoria a masansan a mawanas, adda latta dagiti masarakantayo nga agtarigagay nga agserbi ken Jehova. Kas pagarigan, idiay Guadeloupe, a 1 ti Saksi ni Jehova iti tunggal 56 nga umili, 214 ti nabautisaran idi napan a tawen. Ag-20,000 ti timmabuno iti Memorial, kayatna a sawen, agarup 1 iti tunggal 22 nga umili!
4. Kasano nga agbaliwbaliw ti kasasaad iti teritoria?
4 Panagbaliwbaliw ti Kasasaad iti Teritoria: Agduduma dagiti tattao a madanontayo iti teritoriatayo. No sarungkarantayo manen ti pagtaengan nga awan idi ti nangipakita iti interes, mabalin nga adda sabali a miembro ti pamilia—nalabit daydiay saan pay a nakangngeg iti mensahetayo—a mangilukat iti ridaw ken dumngeg. Wenno saan, mabalin a sabalin dagiti agnanaed ket interesadoda. Dumtengto ti panawen nga agwaywayasen dagiti nataenganen nga annak ket mabalin a sidadaanda a dumngeg iti mensahe maipapan iti Pagarian nupay bumusbusor dagiti dadakkelda.
5. Ania dagiti kasasaad a nalabit mangtignay kadagiti tattao nga aginteres iti naimbag a damag?
5 Mabalin nga agbalbaliw met dagiti tattao. Sakbay a nagbalin nga apostol, maysa idi ni Pablo a ‘managtabbaaw ken manangidadanes ken nakuspag a tao.’ (1 Tim. 1:13) Kasta met, adu nga agserserbi ken Jehova ita ti saan idi nga iteresado iti kinapudno. Baka adda pay ketdi dagidiay bumusbusor idi iti naimbag a damag. Bayat nga agbaliwbaliw ti kasasaad ditoy lubong, mabalin a dumngegton ti dadduma a bumusbusor wenno dagidiay saan nga interesado. Nalabit sidadaanton a dumngeg dagiti dadduma no makapasarda iti trahedia, kas iti ipapatay ti kameng ti pamilia, pannakaikkat iti trabaho, parikut iti kuarta, wenno sakit.
6. Apay a masapul nga itultuloytayo ti mangasaba a sigagagar?
6 Bayat nga umas-asideg ti panagpatingga daytoy a sistema ti bambanag, pumarpartak met ti trabahotayo a panangasaba ken panangisuro. (Isa. 60:22) Gapuna, itultuloytayo ti mangasaba a sigagagar ken ikagumaantayo a taginayonen ti positibo a kababalin. Mabalin a dumngeg ti sumaruno a makasaritatayo. Nasken nga itultuloytayo ti mangasaba! ‘Babaen ti panangaramidtayo iti daytoy maisalakantayto agpadpada ti bagitayo ken dagidiay agimdeng kadatayo.’—1 Tim. 4:16.