Apay Nga Agkarasublitayo?
1 Naisaludsodyo kadin dayta, nalabit bayat nga agsagsaganakayo a mapan mangasaba? Maulit-ulit a trabahuentay ti teritoriatayo iti tinawen. Am-ammodatayon dagiti adu a bumalay ket dida kayat ti dumngeg kadatayo. Dagiti dadduma iparupada nga ibaga a ditayto agsubsublin. Manmano laeng ti mangipangag. Gapuna maikanatad ti saludsod: “Apay nga agkarasublitayo?” Usigenyo dagiti sumaganad a rason.
2 Umuna iti amin, naibilin kadatayo nga itultuloytayo nga ikasaba ti mensahe ti Pagarian agingga nga umay ti panungpalan. (Mat. 24:14; 28:19, 20) Inyimtuod ni mammadto nga Isaias no kasano kabayag ti panagtultuloyna a mangasaba. Ti sungbat nga inawatna ket nailanad iti Isaias 6:11. Awan duadua—naibilin kenkuana nga itultuloyna ti agsubli a mangidanon iti mensahe ti Dios. Kasta met ita, nupay dida mangipangag, namnamaen ni Jehova nga itultuloytayo a sarungkaran dagiti tattao iti teritoriatayo. (Ezeq. 3:10, 11) Sagrado daytoy nga annongen a naitalek kadatayo.—1 Cor. 9:17.
3 Ti sabali pay a makagapu iti panagsublisublitayo ket, daytoy ti mangipaay kadatayo iti gundaway a mangipakita iti kinauneg ti debosiontayo ken Jehova. (1 Juan 5:3) Maysa pay, no pampanunotentayo ti masanguanan ti sangatauan, kasano a maituredtayo a di pakdaaran dagiti padatayo a tattao? (2 Tim. 4:2; Sant. 2:8) Ti kinamatalektayo a mangitungpal iti annongentayo mangipaay kadakuada iti maulit-ulit a gundaway a mangipangag iti mensahe ti Dios, tapno didanto maibaga a saanda a napakdaaran.—Ezeq. 5:13.
4 Mainayon pay, ditay pulos ammo no kaanonto nga agbalbaliw ti puso ti sumagmamano a tattao. Mabalin a matignayda gapu iti panagbalbaliw ti kasasaadda, trahedia iti pamiliada, wenno kadagiti kasasaad ti lubong a pakaseknanda. Mainayon pay, ti maibagatayo mabalin a mangtignay kadakuada a mangipangag. (Ecl. 9:11; 1 Cor. 7:31) Kasta met, umakar dagiti tattao. Mabalin a makasaraktayo kadagiti kabbaro nga agindeg iti teritoriatayo a mangipangag iti naimbag a damag.
5 Itultuloytayo kadi ti agsubli? Wen! Ipaayannatayo ti Kasuratan iti nawadwad a rason iti panagtultuloy nga agsubli. Inton malpasen ti trabaho a panangasaba, bendisionannatayonto ni Jehova iti agtultuloy a panagreggettayo iti ministerio, ket bendisionannanto dagidiay nangipangag kadatayo.—1 Tim. 4:16.