Apay nga Itultuloyyo ti Mangasaba?
1 Nabayag kadin a maikaskasaba ti Pagarian iti lugaryo? (Mat. 24:14) No kasta, mabalin a maikunayo a naan-anay a nawanasen ti teritoria ti kongregasionyo. No mangasabakayo, nalabit iyaleng-aleng ti kaaduan a tattao a makasaritayo ti mensahe ti Pagarian. Nupay kasta, imutektekanyo no ania ti binigbig dagiti pudno nga adalan ni Jesus iti panid 141 ti libro a Padto ni Isaias II: “Iti dadduma a lugar, kasla bassit ti resulta ti ministerioda no idilig iti kaadu ti nabusbosda a trabaho ken pigsa. Kaskasdi, agibturda.” Ngem apay nga itultuloytayo ti mangasaba?
2 Laglagipenyo ni Jeremias: Determinadotayo koma nga agtultuloy a mangasaba, dumngeg man dagiti tattao wenno saan. Nangasaba ni Jeremias iti 40 a tawen iti isu met laeng a teritoria uray no nagbassit ti dimngeg kenkuana ken adu ti bimmusor iti mensahena. Apay a nagtultuloy ni Jeremias? Agsipud ta inaramidna ti trabaho nga imbilin ti Dios kenkuana ket ti pannakaammona no ania ti mapasamak iti masanguanan ti nangtignay kenkuana nga agtultuloy nga agsao.—Jer. 1:17; 20:9.
3 Kasta met laeng ti kasasaadtayo. ‘Imbilin [ni Jesus] a mangasabatayo kadagiti tattao ken mangipaay iti naan-anay a pangsaksi nga isu daytoy ti Maysa nga inkeddeng ti Dios nga agbalin nga ukom dagiti sibibiag ken dagiti natay.’ (Ara. 10:42) Ti mensahe nga ipakpakaammotayo kaipapananna ti biag ken patay kadagidiay dumngeg iti dayta. Maukom dagiti tattao maibatay iti iyiimdengda iti naimbag a damag. Gapuna, rebbengentayo nga aramiden a naan-anay ti naibilin kadatayo. Uray no agkedked dagiti tattao nga umimdeng, daytoy ti mangipaay kadatayo iti gundaway a mangipakita iti nauneg a panagayattayo kadakuada ken ti debosiontayo ken ni Jehova babaen ti agtultuloy a panagaramid iti rumbeng nga aramidentayo. Ngem saan la a dayta.
4 Magunggonaantayo: Ti panagaramidtayo iti pagayatan ti Dios, uray pay ania ti reaksion dagiti tattao iti teritoria, ket mangipaay kadatayo iti talna ti panunot, pannakapnek, ken ragsak, a saan a masarakan iti aniaman a pamay-an. (Sal. 40:8) Maaddaan iti pudpudno a kaipapanan ti biagtayo. No kanayon a makiramantayo iti ministerio, ad-adda a maipamaysa ti puso ken panunottayo iti namnama ken rag-o nga agbiag iti baro a lubong ti Dios. Ti panangpampanunottayo kadagitoy a kari iti Kasuratan ti mangparayray iti espiritualidadtayo ken mangpabileg iti relasiontayo ken ni Jehova.
5 Uray no ditay makita a dagus dagiti resulta ti panangasabatayo, mabalin a maitukit ti bukel ti kinapudno iti puso ti maysa a tao ket agtubonto iti naituding a tiempo ni Jehova. (Juan 6:44; 1 Cor. 3:6) Ditay ammo no mano pay ti mangipangag iti maipapan iti Pagarian babaen ti panagregget ti ili ni Jehova, iti man lugartayo wenno iti sangalubongan.
6 Nangnangruna a kasapulantayo ita nga ipangag ti bilin ni Jesus: “Agtultuloykayo a kumita, agtultuloykayo a siririing, ta saanyo nga ammo no kaano ti naituding a tiempo. Ngem ti kunaek kadakayo kunaek iti isuamin, Agtultuloykayo nga agbantay.” (Mar. 13:33, 37) Gapuna, sapay koma ta itultuloytayo amin nga iwaragawag ti naimbag a damag ti Pagarian, a pagrag-oentayo ti puso ni Jehova bayat a makiramantayo iti pannakasantipikar iti naindaklan ken nasantuan a naganna.