Ti Epekto Dagiti Video a Mangipaay iti Panangsaksi
1 “Di pay makapagna idi ti anakmi ngem buybuyaennan ti video. Namin-adun a nabuyana dayta. Anian a nagsayaat ti maaddaan iti alikamen a mangipasagepsep kadagiti annakmi iti panagayat ken Jehova!” Ania a video ti tuktukoyen daytoy a Kristiano a nagannak? Ti video a napauluan Noah—He Walked With God. Maysa a di Saksi nga ina, a ti anakna ket nakabuya iti daytoy a video iti sabali a pagtaengan, ti nangipatulod iti sanga nga opisina iti $90 (U.S.) a donasion ken nagkiddaw no adda sabali pay a video para kadagiti ubbing. Dagiti video nga insagana ti organisasion ni Jehova ket dakkel ti epektoda kadagiti agtutubo ken nataengan.
2 Iti Uneg ti Pamilia: Kalpasan a nabuya ti pamilia a Saksi ti video a Jehovah’s Witnesses Stand Firm Against Nazi Assault, kuna ti ina: “Inut-utobko a nagmalmalem no kasano a tinulongan ni Jehova dagiti ordinario a tattao a makapagibtur kadagiti narigat a kasasaad! Ti panangpampanunotko iti dayta ti mangipalagip kaniak a nagbassitan dagiti problemak no idilig. Ti panangbuyami iti daytoy a video a kadua dagiti annakmi ti timmulong kadakuada nga ad-adda a makakita a nasken ti panagtalek ken Jehova. Idi pinagsasaritaanmi dayta, natulonganmi dagiti annakmi a naan-anay a nakabalan a mangsango iti aniaman a pakasuotan ken pannakaidadanes a dumteng kadakuada.”
3 Iti Eskuelaan: Kas paset ti reportna, impakita ti agtutubo a Saksi ti paset ti Stand Firm a video iti klaseda. Iti naglabas, kinuna ti maestra a kagurana dagiti Saksi. Idi nabuyana ti video kinunana: “Daytoy ti nangbalbaliw a naan-anay iti panangmatmatko kadagiti Saksi ni Jehova. Ikarik nga iti sumaruno nga iyaayda iti pagtaengak, dumngegakton ken makipagadalakon kadakuada iti Biblia!” Apay a nagbalbaliw iti panangmatmatna kadatayo? Kinunana a gapu iti ‘pudno nga ayat ken kinasungdotayo.’
4 Iti Ministerio: Nakasarita ti maysa a sister ti maysa a babai a nupay adu dagiti saludsodna maipapan kadatayo ken iti patpatientayo, agkedked a mangala iti literatura. Nagsubli ti sister nga adda awitna a video a Jehovah’s Witnesses—The Organization Behind The Name sana impabuya dayta iti agassawa. Nasdaawda unay ket immanamongda a makipagadal iti Biblia. Kas resulta ti nagsayaat a panangsaksi a naipaay kadakuada, rinugiandan ti agbiag a maitunos iti pagayatan ti Dios.
5 Us-usarenyo met laeng kadi a naimbag dagiti video ti Sosiedad?