Mangisuro iti Simple a Pamay-an

1. Ania ti maysa a napateg nga aspeto ti nalawag ken epektibo a panangisuro?

¹ Tapno epektibo ti panangisurotayo, nasken a simple dayta a kas iti panangisuro ti Naindaklan a Mannursuro, a ni Jesus. Sumayaat ngarud ti ‘arte ti panangisurotayo’ no usigentayo ti wagas ti panangisurona.—2 Tim. 4:2; Juan 13:13.

2. Ania ti ramanen ti simple a panangisuro, ken ania dagiti epekto ti kasta a wagas ti panangisuro?

² Agusar iti Simple a Sasao: Naglaon ti Sermon iti Bantay iti dadduma kadagiti agkakapateg a kinapudno a sinao ti tao, ngem simple ti pannakayebkas amin dagita. (Mat., kap. 5-7) Ti bunggoy a dumdumngeg ken Jesus ‘nagsiddaaw unay iti wagas ti panangisurona.’ Dagiti opisial a naibaon a mangaresto kenkuana ket natignay a mangikuna: “Awan pay a pulos sabali a tao a nagsao iti kastoy.” (Mat. 7:28, 29; Juan 7:46) Saan a masapul nga agusartayo kadagiti nalabor a sasao, nauneg nga ebkas, wenno detalyado nga ilustrasion tapno naan-anay a makombinsirtayo ti dadduma iti kinapudno. Mailawlawagtayo a naimbag ti kinapudno babaen kadagiti pamiliar a termino.

3. Apay nga agannayas ti dadduma a mangipaay iti adu nga impormasion kadagiti agdengdengngeg kadakuada, ken kasano a maliklikan dayta?

³ Ikeddeng ti Kaadu ti Impormasion nga Usaren: Inkabilangan ni Jesus dagiti agdengdengngeg kenkuana iti panangikeddengna iti kaadu ti impormasion nga iyallatiwna iti tunggal panagpalawagna. (Juan 16:12) Nasken nga ammotayo no ania nga impormasion ti kasapulan dagiti kasarsaritatayo, nangruna no dagiti kabagian, kabbaro nga interesado, wenno ubbing ti kaskasabaantayo. Ditay koma ida gabsuonan iti impormasion uray no agparang nga umim-imdengda. Dagidiay talaga nga interesado itultuloyda ti gumun-od iti pannakaammo maipapan iti pudno a Dios a ni Jehova.—Juan 17:3; 1 Cor. 3:6.

4. Apay a dagiti kangrunaan a punto ti ipaganetgettayo imbes a dagiti detalye?

⁴ Ipaganetget Dagiti Kangrunaan a Punto: Saan a pinagbalin ni Jesus a komplikado ti isursurona babaen iti adu unay nga impormasion. Idi kinunana nga “amin dagidiay adda kadagiti pakalaglagipan a tanem . . . rummuarda,” saan pay idi a kasapulan nga ilawlawagna ti dua a pagtungpalan dagidiay mapagungar. (Juan 5:28, 29) No mangyad-adaltayo iti Biblia, ipaganetgettayo koma dagiti kangrunaan a punto ket liklikantayo ti manginayon kadagiti di kasapulan nga impormasion.

5. Ania a bendision ti itden ti panangisuro iti simple a pamay-an?

⁵ Anian a yamantayo ta simple ti panangisuro ni Jehova iti amin a kasapulan a maammuantayo! (Mat. 11:25) Ikagumaantayo koma ti mangisuro iti simple a pamay-an ket tagiragsakentayo ti rag-o nga itden ti nabunga a ministerio.