Tallo a Singasing iti Panangpasayaat iti Panangisuroyo
1. Apay nga ikagumaantayo a pasayaaten ti panangisurotayo?
1 Amin a Kristiano a ministro ket mannursuro. Mangiranranudtayo iti impormasion iti man damo a pannakisaritatayo, iti panagsarungkartayo a mangsurnad iti interes, wenno iti panangyadaltayo iti Biblia. Ken nakapatpateg ti impormasion nga isursurotayo. Isilsilnagtayo ti lawag maipapan iti “nasantuan a sursurat” a ‘mamagsirib iti maysa maipaay iti pannakaisalakan.’ (2 Tim. 3:15) Anian a naisangsangayan a pribilehio! Adtoy ti tallo a singasing iti panangpasayaat iti panangisurotayo.
2. Kasanotayo a mapasimple ti panangisurotayo?
2 Simple: No ammotayo a naimbag ti maysa a topiko, nalaka laeng a malipatantayo a narigat gayam dayta nga impormasion para iti sabali a tao. Isu a no mangyadaltayo iti Biblia, saantayo a gabsuonan iti nakaad-adu nga impormasion a saan met a kasapulan no di ket itampoktayo laeng dagiti kangrunaan a punto. Dina kayat a sawen a nasaysayaat ti panangisurom no ad-adu ti maisaom. (Prov. 10:19) Gagangay a nasayaat no dagiti laeng kangrunaan a teksto ti basaen. Kalpasanna, ipamaysatayo ti paset ti teksto a nainaig iti topiko. Ti Sermon iti Bantay a nailanad iti Mateo kapitulo 5 agingga iti 7 ket naglaon kadagiti agkakapateg a kinapudno, ngem kaskasdi a simple ti panangisuro ni Jesus ken saan a nagusar iti adu a sasao.
3. Kasano kapateg dagiti ilustrasion, ken ania a kita ti ilustrasion ti masansan a kasayaatan?
3 Ilustrasion: Dagiti ilustrasion ket makagutugot iti panunot, makatukay iti rikna, ken nalaka a matandaanan. Diyo ipapan a masapul nga agestoriakayo tapno makaipaaykayo iti nasayaat nga ilustrasion. Masansan nga ababa ken saan a komplikado dagiti ilustrasion ni Jesus. (Mat. 7:3-5; 18:2-4) Mabalin a dakkel met ti maitulong dagiti simple a ladawan a naidrowing iti papel. No agsaganakayo a naimbag, mabalin a makapanunotkayo kadagiti epektibo nga ilustrasion.
4. Kasano ti epektibo a panangusartayo kadagiti saludsod?
4 Saludsod: Dagiti saludsod pagpanunotenna ti iyad-adalanyo. Gapuna, urayenyo a sumungbat. No dagus a sungbatanyo ti saludsodyo, saanyo a maammuan no ania ti naawatan ti iyad-adalanyo. No saan nga umiso ti sungbatna, nasaysayaat no mangibangonkayo manen kadagiti saludsod a mangiturong iti umiso a sungbat, imbes nga ibagayo lattan ti umiso a sungbat. (Mat. 17:24-27) Siempre, awan ti perpekto a mannursuro. Gapuna, iparegta ti Biblia nga itultuloytayo nga asikasuen ti panangisurotayo. Ti panangaramidtayo iti dayta ket mangyeg iti manayon a gunggona kadatayo ken kadagiti dumngeg kadatayo.—1 Tim. 4:16.