Panangikagumaan a Mangasaba Kadagiti Lallaki
1. Ania ti naganat a panagkasapulan no iti panangasikaso kadagiti interes ti Pagarian?
1 Bayat a rumangrang-ay ti trabaho mainaig iti Pagarian kadagitoy maudi nga al-aldaw, adda naganat a panagkasapulan kadagiti mangidaulo a lallaki a kualipikado iti naespirituan. (Mar. 4:30-32; Ara. 20:28; 1 Tim. 3:1-13) Kaskasdi, iti dadduma a lugar, basbassit ti lallaki ngem kadagiti babbai nga umaw-awat iti mensahe mainaig iti Pagarian. Iti dadduma a kultura, ibilang dagiti lallaki a dagiti assawa a babbai ti addaan iti annongen a mangisuro kadagiti annakda iti maipapan iti relihion. Kasanotayo a maparegta ti ad-adu a lallaki nga agbalin a sipapanunot iti naespirituan a kasapulanda ken makidanggay kadatayo iti pudno a panagdaydayaw?
2. Ania dagiti nasayaat a resulta ti panangikagumaan da Pablo ken Pedro a mangasaba kadagiti lallaki?
2 Panangbirok Kadagiti Lallaki: No ti ulo ti pamilia ti umawat iti kinapudno, masansan a maimpluensiaanna dagiti kameng ti pamiliana a makiraman kenkuana iti nasin-aw a panagdaydayaw. Kas pagarigan, bayat a nakabalud da Pablo ken Silas, kinasabaanda ti parabantay iti pagbaludan. Nabautisaran ti lalaki ken ti intero a sangakabbalayanna. (Ara. 16:25-34) Gapu iti panangaskasaba ni Pablo idiay Corinto, “ni Crispo a mangidadaulo nga opisial iti sinagoga nagbalin a manamati iti Apo, ken kasta met ti intero a sangakabbalayanna.” (Ara. 18:8) Ni Pedro ket inusar ni Jehova a mangasaba ken Cornelio a maysa nga opisial ti buyot a nadeskribir kas “napeklan a tao ken maysa a managbuteng iti Dios.” Nabautisaran ni Cornelio agraman dagiti kabagian ken nasinged a gagayyemna.—Ara. 10:1-48.
3. Kas panangtulad ken Felipe, kasanoyo a makasabaan dagidiay “adda iti nangato a saad”?
3 Mabalin a dakkel ti epektona ti panangasaba kadagiti lallaki “nga adda iti nangato a saad.” (1 Tim. 2:1, 2) Kas pagarigan, ti anghel ni Jehova imbagana ken Felipe a makisarita iti “lalaki nga adda iti pannakabalin” a paraaywan kadagiti amin a gameng ti reyna dagiti Etiope. Nangngeg ni Felipe a ti lalaki “basbasaenna a sipipigsa [ti surat] ni Isaias a mammadto” ket inlawlawagna kenkuana ti naimbag a damag maipapan ken Jesus. Nagbalin nga adalan daytoy nga Etiope ken mabalin nga inwaragawagna ti naimbag a damag iti dalanna nga agturong iti ili a nakayanakanna. Mabalin a kinasabaanna pay ti reyna ken dagidiay adda iti korte, dagiti tattao a bassit ti posibilidadna a makasabaan.—Ara. 8:26-39.
4. Kasanotayo a maipaayan dagiti lallaki iti ad-adu a gundaway a makangngeg iti naimbag a damag?
4 No Kasano a Makasabaan ti Ad-adu a Lallaki: Yantangay masansan nga adda kadagiti pagtrabahuan dagiti lallaki kabayatan ti aldaw, mabalinyo kadi nga urnosen ti eskediulyo tapno ad-adu nga oras ti busbosenyo iti ministerio iti rabii, kadagiti ngudo ti lawas, wenno kabayatan dagiti piesta opisial? Ti regular a panangasaba kadagiti lugar ti negosio ikkannakayo iti kanayonan a gundaway a mangasaba kadagiti lallaki a manmano a madanon kadagiti pagtaenganda. Dagiti kakabsat a lallaki mabalinda met nga ikagumaan a kasabaan iti di pormal dagiti lallaki a katrabahuanda. Iti panangasaba iti binalaybalay, nangruna iti teritoria a masansan a maasak, dagiti kakabsat a lallaki mabalinda a kiddawen sagpaminsan a kasaritada ti ulo ti pamilia.
5. Ania ti rumbeng nga aramiden ti kabsat a babai no adda masarakanna a lalaki nga interesado iti mensahe maipapan iti Pagarian?
5 Ti kabsat a babai a nakasarak iti interesado a lalaki ket saan a rumbeng nga agsarungkar nga is-isuna. Mabalinna nga itugot ni lakayna wenno ti sabali pay nga agibumbunannag. Bayat a rumangrang-ay ti interesado a lalaki, gagangay a kasayaatan no ti kabsat a babai ket makisarita iti kualipikado a kabsat a lalaki tapno isun ti mangituloy a mangyadal.
6. Kasanotayo a matulad ni apostol Pablo tapno ‘magun-odtayo ti kaaduan a tattao’?
6 Mangpili Kadagiti Topiko a Paginteresan Dagiti Lallaki: Inkabilangan ni apostol Pablo dagiti dumdumngeg kenkuana ken imbagayna ti pamay-anna a mangasaba tapno ‘magun-odna ti kaaduan a tattao.’ (1 Cor. 9:19-23) Umasping iti dayta, masapul nga ikabilangantayo no ania dagiti topiko a mabalin a paginteresan dagiti lallaki a makasabaantayo ken isaganatayo dayta. Kas pagarigan, masansan a maseknan dagiti lallaki kadagiti parikut iti ekonomia, gobierno, ken iti kinatalged ti pamiliada. Mabalin nga interesadoda met iti panggep ti biag, ti masanguanan ti daga, ken no apay nga impalubos ti Dios ti panagsagaba. Ad-adda a denggenda ti ikaskasabatayo a mensahe maipapan iti Pagarian no nalaingtayo a mangibagay iti tematayo kadagiti paginteresanda.—Prov. 16:23.
7. Ania ti positibo nga epektona no ti amin a miembro ti kongregasion pakitaanda iti nasayaat a kababalin ti maysa a di manamati nga asawa nga umay makigimong?
7 Kasabaan Dagiti Di Manamati nga Assawa a Lallaki: Nupay masansan a nasayaat ti ibunga ti panangipakita dagiti kakabsattayo a babbai iti naimbag a kababalin kadagiti di manamati nga assawada, ti nasayaat a kababalin dagiti miembro ti kongregasion ket addaan met iti positibo nga epekto. (1 Ped. 3:1-4) No ti di manamati nga asawa kuyogenna ni baketna a mapan makigimong, ti nabara a panangabrasa kenkuana ti kongregasion ket maysa a nabileg a panangsaksi. Mabalin nga ipasimudaag ti kaaddana nga adda bassit panaginteresna iti kinapudno, ken mabalin a sidadaan nga agpayadal iti Biblia.
8. Ania ti mabalin nga aramiden dagiti kakabsat a lallaki tapno makasabaanda dagiti di manamati nga assawa a lallaki a saan unay nga interesado iti kinapudno?
8 Iti sabali a bangir, adda dagiti assawa a lallaki a saan unay nga interesado idi damo ngem sidadaandan a makisarita maipapan iti Biblia iti kabsat a lalaki a kapasiganda. Iti maysa a kongregasion, inyurnos dagiti kakabsat a lallaki a tunggal sarungkaranda ti maysa a pamilia a saan nga agkarelihionan, ikagumaanda a kainnestoria ti di manamati nga asawa a lalaki maipapan kadagiti banag nga ammoda a paginteresanna. Idi agangay, nagturong ti saritaanda iti maipapan iti Biblia ket ita, maysan a bautisado a Saksi. Iti sabali pay a kasasaad, adda kabsat a lalaki a nangtulong iti mannakigayyem ngem di manamati nga asawa a lalaki a mangalad iti pagtaenganda. Gapu iti dayta a personal nga interes nga impakitana, nairugi ti panangyadal iti Biblia. (Gal. 6:10; Fil. 2:4) No maysaka a Kristiano a kabsat a lalaki, apay a dimo ikagumaan a kasabaan ti maysa wenno ad-adu pay a di manamati nga assawa a lallaki?
9. Ania ti mabalin a resulta ti panangsanay kadagiti Kristiano a lallaki?
9 Panangsanay a Mangibaklay Kadagiti Annongen iti Masanguanan: Dagiti lallaki a mangipangag iti mensahe maipapan iti Pagarian ken mangragpat kadagiti pribilehio iti panagserbi ken Jehova ket mairaman kadagiti “sagut [a] tattao,” dagiti Kristiano a panglakayen a mangus-usar iti abilidad ken pigsada agpaay kadagiti kongregasion dagiti adipen ni Jehova. (Efe. 4:8; Sal. 68:18) Dagiti kasta a lallaki ket sidadaan ken sigagagar nga ipaspastoranda ti kongregasion. (1 Ped. 5:2, 3) Sigurado a maibilangda a bendision iti intero a timpuyog dagiti kakabsat!
10. Kasano a nabenepisiaran ti adu gapu iti panagregget ni Ananias a mangtulong ken Pablo?
10 Kas pagarigan, ni Saulo ket nagbalin nga “apostol iti nasnasion” nupay idaddadanesna idi dagiti Kristiano. (Roma 11:13) Nagkedked idi ti adalan a ni Ananias a mangasaba ken Saulo gapu iti daytoy. Nupay kasta, nagtulnog ni Ananias iti bilin ti Apo ket kinasaritana ti lalaki a nagbalin nga apostol Pablo. Iti panaglabas ti tawen, ti ministerio ni Pablo ginunggonaanna ti rinibu a nakangngeg iti panangaskasabana ken riniwriw pay laeng ti mabembenepisiaran kadagiti naipaltiing a suratna a nailanad iti Sao ti Dios.—Ara. 9:3-19; 2 Tim. 3:16, 17.
11. Apay a mangaramidtayo iti aniaman a kasapulan a panagbalbaliw iti panangiranud iti kinapudno kadagiti lallaki?
11 Sapay ngarud koma ta mangaramidtayo iti aniaman a kasapulan a panagbalbaliw tapno makasabaantayo dagiti lallaki. Bayat a ragragpatentayo daytoy a kalat, sigurado a bendisionan ni Jehova ti napinget a panangikagumaantayo a mangaramid iti pagayatanna ken mangasikaso kadagiti interes ti Pagarian.