Matulonganyo Kadi ti Di Manamati nga Asawa a Mangammo iti Kinapudno?
1. Apay a saan laeng a dagiti Kristiano a di manamati ti asawana ti interesado a tumulong kadagiti assawada a mangawat iti kinapudno?
1 Adda kadi kakongregasionyo a di manamati ti asawana? No adda, sigurado a kayat dagitoy nga agibumbunannag a makadua dagiti assawada iti pudno a panagdaydayaw. Uray ti intero a kongregasion kayatda met a mapasamak dayta, ta kas iti Dios, tarigagayanda nga ‘amin a kita ti tattao dumtengda iti umiso a pannakaammo iti kinapudno.’ (1 Tim. 2:4) Kasanotayo a matulongan dagiti di manamati nga assawa a mangammo iti kinapudno?
2. Kasano a makatulong ti pannakaawat tapno matulongantayo ti di manamati nga asawa?
2 Umuna, ikagumaantayo a tarusan ti panangmatmat ti di manamati nga asawa. Ipatpateg ti adu a di manamati nga assawa ti pamiliada ken ikagkagumaanda ti agbalin a nasayaat nga asawa ken nagannak. Nalabit napasnekda kadagiti narelihiosuan a patpatienda a naiduma kadatayo. Mabalin a bassit laeng ti ammoda maipapan kadagiti Saksi ni Jehova malaksid iti imbaga dagiti bumusbusor a gagayyemda nga awan ti ammona maipapan kadatayo. Adda met dagidiay agsakit ti nakemna gapu iti tiempo nga ipapaay ti asawada para iti panagdaydayaw imbes a kaduada koma ti pamiliada. Matulongannatayo ti pannakaawat tapno makalangentayo a siaayat ken sidadayaw dagiti di manamati ken tapno saantayo nga agnerbios no kasarsaritatayo ida.—Prov. 16:20-23.
3. Ania ti mabalin a kasayaatan a pamay-an tapno maiturongtayo iti kinapudno ti di manamati nga asawa?
3 Personal nga Interes: Iti damo, mabalin a ti kasayaatan a pamay-an tapno maiturongtayo iti kinapudno ti di manamati nga asawa ket babaen ti tigtignaytayo, saan a ti pannakisarita maipapan iti Biblia. (1 Ped. 3:1, 2) Napateg ti panangipakita iti personal nga interes iti daytoy a banag. Dagiti kakabsat a babbai iti kongregasion mabalinda nga ipakita ti pannakaseknanda iti di manamati nga asawa a babai, ket dagiti kakabsat a lallaki aramidenda met dayta iti di manamati nga asawa a lalaki. Kasano?
4. Kasanotayo a maipakita ti personal nga interes?
4 No saanyo pay nga am-ammo ti di manamati nga asawa, nalabit ibagayo iti Kristiano nga asawa a kayatyo a maam-ammo ti asawana. Saankayo a maupay no nalamiis ti pannakilangen kadakayo ti di manamati nga asawa. No gayyemen ken pakitaantayo iti personal nga interes, mabalin a maay-ayonto kadagiti Saksi ni Jehova. (Roma 12:20) Adda dagiti nataengan a Kristiano a nangawis iti di manamati nga asawa ken ti pamiliana a makipangrabii kadakuada tapno makapagiinnammo ken makapaggiginnayyemda. Saan a dagiti naespirituan a banag ti nakaipamaysaan ti saritaanda no di ket dagiti paginteresan ti di manamati nga asawa. No ti di manamati ket maisingednan ti riknana, nalabit mabalinen a pagsasaritaan dagiti naespirituan a bambanag. Wenno mabalin a patganna ti awistayo a tumabuno iti maysa kadagiti gimongtayo tapno maammuanna no ania ti masursuro ti asawana, nangruna ta adda am-ammonan iti kongregasion. Uray no saan pay a nakasagana a mangsukimat iti kinapudno, mabalintayo a komendaran gapu iti panangsuportana iti manamati nga asawana.
5. Kasano a matulongan dagiti panglakayen ti di manamati nga asawa?
5 Dagiti panglakayen ti nangnangruna a tumulong kadagiti di manamati nga asawa ken siputanda dagiti gundaway a mabalinda a kasabaan. Ti di manamati a saan a mayat a makisarita maipapan iti Biblia ket mabalin a dumngeg iti Nainkasuratan a pammaregta no nayospital wenno no adda nakaro a sakitna. No adda nakalkaldaang a pasamak iti biagda, kas iti ipapatay ti maysa a kameng ti pamilia, mabalin nga awisen dagiti panglakayen ti di manamati nga asawa a dumngeg iti ipaayda a pangliwliwa iti pamilia.
6. Ania dagiti rasontayo a mangtulong kadagiti di manamati nga assawa?
6 Panunotenyo ti rag-o ti Kristiano nga asawa no maiturong iti kinapudno ti asawana! Ti kasta a naragsak a pasamak ket mangipaay met iti dakkel a rag-o ken Jehova, kadagiti anghel, ken iti kongregasion. (Luc. 15:7, 10) Ngem uray no saan a dumngeg iti damo ti di manamati nga asawa, adda latta rasontayo nga agrag-o gapu ta ti agtultuloy a panangikagumaantayo ket ap-apresiaren ni Jehova ta “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.”—2 Ped. 3:9.
[Blurb iti panid 6]
Iti damo, mabalin a ti kasayaatan a pamay-an tapno maiturongtayo iti kinapudno ti di manamati nga asawa ket babaen ti tigtignaytayo, saan a ti pannakisarita maipapan iti Biblia