No Ania ti Ibaga No Itukon Dagiti Magasin

Ti Pagwanawanan Nobiembre 1

“Agparang nga umad-adu ita ti parikut dagiti pamilia. Ania ngata ti epektona kadagiti pamilia no ikagumaan dagiti miembrona a tuladen daytoy a kababalin ni Jesus? [Basaen ti Mateo 20:28 sa palubosanyo a sumungbat.] Ilawlawag daytoy nga artikulo ti lima a banag a masursuro dagiti pamilia iti ulidan ni Jesus.” Itampokyo ti artikulo a mangrugi iti panid 16.

Agriingkayo! Nobiembre

“Para kadakayo, ti kadi relihion im-impluensiaanna dagiti tattao nga agbalin a naayat ken mannakikappia, wenno mananggura ken naranggas? [Palubosanyo a sumungbat.] Agparang nga adu ti saan a mangyap-aplikar kadagitoy a sasao ni Jesus. [Basaen ti Mateo 5:44, 45.] Sungbatan daytoy nga artikulo ti saludsod a, Posible kadi nga ayatem dagiti kabusormo?” Itampokyo ti artikulo a mangrugi iti panid 10.

Ti Pagwanawanan Disiembre 1

“Iti panagkunayo, dumtengto ngata ti aldaw a pagpatinggaen ti Dios ti panagsagaba ditoy lubong? [Palubosanyo a sumungbat.] Imutektekanyo daytoy a kari ti Biblia a mangted kadatayo iti namnama. [Basaenyo ti maysa a teksto iti kahon iti panid 7.] Ilawlawag daytoy a magasin no kaano ken kasano a pagpatinggaen ti Dios ti amin a panagsagaba kas sagudayen ti Biblia.”

Agriingkayo! Disiembre

“Adda dagiti agkuna a naparsua ti uniberso, idinto ta patien dagiti dadduma a naiparna laeng dayta ken awan ti nalawag a panggepna. Ania ti makunayo? [Palubosanyo a sumungbat.] Imutektekanyo ti kuna ti Biblia. [Basaen ti Hebreo 3:4.] Ipaay daytoy a magasin ti lohikal a pannakailawlawag ti nagtaudan ken panggep ti uniberso.”