No Ania ti Ibaga no Itukon Dagiti Magasin

Ti Pagwanawanan Disiembre 1

“Bayat daytoy a tiempo ti tawen, adu ti agaramid kadagiti Belen a mangiladawan iti daytoy a salaysay ti Biblia. [Basaen ti Mateo 2:1, 11.] Adda kadi madlawyo a nakaidumaan ti kunaen ti Biblia ken ti gagangay a mailadladawan a Belen? [Palubosan a sumungbat.] Ilawlawag daytoy nga artikulo no ania ti pudno a pasamak.” Itampok ti artikulo iti panid 31.

Agriingkayo! Disiembre

“Kayatko a maammuan ti kapanunotanyo maipapan iti daytoy a kinuna ni Jesus. [Basaen ti Mateo 5:3.] Yantangay nagadu ti agduduma a relihion, iti panagkunayo, napateg kadi no ania ti pilientayo tapno mapnek ti naespirituan a kasapulantayo? [Palubosan a sumungbat.] Ipakita daytoy nga artikulo no ania ti kuna ti Biblia maipapan iti panangbirok iti pudpudno a naespirituan a pannakapnek.” Itampok ti artikulo a mangrugi iti panid 12.

Ti Pagwanawanan Enero 1

“Agduduma dagiti narelihiosuan a kapanunotan maipapan iti panaginum iti arak. Iti panagkunayo, ania ngata ti panangmatmat ti Dios iti maysa a tao nga umin-inum iti arak. [Palubosan a sumungbat.] Ibaga ti Biblia a naminsan, namilagruan a pinagbalin ni Jesus nga arak ti danum. Ngem kastoy pay ti kunaen ti Biblia. [Basaen ti Proverbio 23:20a.] Ipakita daytoy a magasin no ania ti natimbeng a panangmatmat.”

Agriingkayo! Enero

“Kadagitoy narigat a tiempo, napaksuyan ken marigrigatan ti adu a tattao. Kasta met kadi ti marikriknayo? [Palubosan a sumungbat.] Kastoy ti rasonable nga ibalakad ti Biblia. [Basaen ti Eclesiastes 4:6.] Isalaysay daytoy a magasin no kasanotayo nga agbalin a balanse no maipapan iti trabaho, pamilia, ken panagaliwaksay. Mangipaay met kadagiti singasing para kadagidiay agbirbirok iti trabaho.”