Itantantanyo Kadi?
Itantantanyo kadi a suratan ti DPA (durable power of attorney) card a para kadagiti bautisado a Saksi? Yantangay “saanyo nga ammo no anianto ti biagyo inton bigat,” nakapatpateg nga ikeddeng ken ilanadyo a nasaksakbay no ania ti awatenyo a wagas ti pannakataming wenno pannakaagas no adda mapagteng nga emerhensia. (Sant. 4:14; Ara. 15:28, 29) Tapno matulongankayo a mangngeddeng, naaramid ti video a Transfusion-Alternative Health Care—Meeting Patient Needs and Rights. Buyaenyo dayta, sa nainkararagan a repasuenyo ti naadalyo babaen kadagiti sumaganad a saludsod.
(1) Apay a tingtingitingen manen dagiti dadduma a mangngagas ti panangyalison iti dara? (2) Mangted iti tallo a pagarigan ti narikut nga operasion a mabalin a maaramid nga awan ti panangyalison iti dara. (3) Apay nga adu a doktor ken siruhano iti intero a lubong ti sidadaan a mangagas kadagiti pasiente nga awan ti panangyalison iti dara? (4) Ania ti impalgak dagiti nabiit pay a surbey kadagiti ospital maipapan iti panagusar iti dara? (5) Ania dagiti peggad iti salun-at a nainaig iti panangyalison iti dara? (6) Ania ti konklusion ti adu nga eksperto maipapan iti pagimbagan dagiti panangagas nga awan ti panangyalison iti dara? (7) Ania dagiti pakaigapuan ti anemia? Agingga iti ania a madaeran dayta dagiti tattao? Ania ti mabalin nga aramiden maipapan iti dayta? (8) Kasano a mapaadu ti nalabaga a selula iti bagi ti pasiente? (9) Ania dagiti pamay-an a maus-usar tapno awan unay ti agsayasay a dara bayat ti operasion? (10) Apay a napateg kadagiti Kristiano nga ikeddengda a nasaksakbay no ania ti awatenda a panangagas a di agusar iti dara? Kasano a maaramidtayo daytoy?
Ti panangawat iti dadduma a wagas ti panangagas a naipabuya iti video ket desision ti indibidual a maibatay iti diktar ti konsiensiana a sinanay ti Biblia. Naikeddengyo kadin a silalawag no ania a wagas ti pannakataming wenno pannakaagas ti situtulok nga awatenyo para kadakayo ken kadagiti annakyo, ken sinuratanyo kadin ti DPA card-yo? Para iti kompleto a pannakailawlawag dagita a banag, repasuenyo a naimbag ti kapitulo 7 ti libro nga “Ayat ti Dios” ken dagiti reperensia a nadakamat iti dayta. Kitaenyo met ti suplemento a “Kasano ti Panangmatmatko Kadagiti Babbabassit a Kapaset ti Dara ken iti Panangagas a Pakausaran ti Mismo a Darak?” iti Enero 2007 a ruar Ti Ministeriotayo iti Pagarian. Kamaudiananna, siguraduenyo a siuumiso a nailanadyo iti DPA card dagiti napiliyo. Amin a pangngeddengyo ket nasken nga ibagayo kadagiti pannakabagiyo iti panagpaagas ken iti siasinoman a kapamiliayo a saan a Saksi.
[Kahon iti panid 2]
• Naikeddengyo kadin no ania dagiti wagas ti pannakataming ken pannakaagas nga awatenyo para kadakayo ken kadagiti annakyo?
• Adda kadi itugtugotyo a nasuratan a DPA card no kas pagarigan ta adda emerhensia?