Ammom Kadi Dagiti Pagpiliam?
Umad-adun dagiti ospital iti intero a lubong nga agop-opera nga awan ti agsayasay a dara. Ammom kadi no ania dagiti pagpiliam no maipapan kadagiti pamay-an ti panangagas nga awan ti agsayasay a dara? Masapul nga ammom dagita tapno makaaramidka kadagiti nainsiriban a desision mainaig iti pamay-an ti pannakaagas ken pannakaopera. Buyaem ti video a No Blood—Medicine Meets the Challenge. Kalpasanna, nainkararagan a repasuem dagiti naadalmo babaen kadagiti sumaganad a saludsod.—Palagip: Gapu ta naglaon ti video kadagiti ababa nga eksena ti panagopera, nasken a tingitingen dagiti nagannak no ipabuyada daytoy a video kadagiti ubbing.
(1) Ania ti kangrunaan a makagapu no apay nga agkedked dagiti Saksi ni Jehova nga agpayalison iti dara? (2) Ania ti tarigagayan dagiti Saksi ni Jehova no maipapan iti pannakaaywan ti salun-atda? (3) Ania ti kalintegan dagiti pasiente? (4) Apay a nainkalintegan ti panangpili kadagiti sandi ti panangyalison iti dara ken ti panangipakita a maseknanka iti pannakaaywan ti salun-atmo? (5) No nakaro ti panagsayasay ti dara, ania ti dua a naganat a pamay-an nga aramiden dagiti doktor? (6) Ania dagiti uppat a prinsipio a masapul a masurot no iti panangusar kadagiti sandi ti panangyalison iti dara? (7) Ania ti mabalin nga aramiden dagiti doktor tapno (a) bassit ti agsayasay a dara, (b) saan a bumassit ti bilang dagiti nalabaga a selula ti dara, (c) pumartak ti pannakapataud ti dara, ken (d) maisubli ti normal a kaadu ti dara iti bagi ti pasiente? (8) Ilawlawagmo ti pamay-an ti panangagas a maaw-awagan kas (a) hemodilution ken (b) cell salvage. (9) Ania dagiti rumbeng a mailawlawag kenka maipapan iti aniaman a sandi ti panangyalison iti dara? (10) Mabalin kadi ti mangaramid kadagiti narikut nga operasion uray no awan ti mayalison a dara? (11) Ania dagiti makagunggona a panagrang-ay iti tay-ak ti medisina?
Ti panangawat iti dadduma kadagiti wagas ti panangagas a naipabuya iti video ket desision ti indibidual a maibatay iti diktar ti konsiensiana a sinanay ti Biblia. Naikeddengmo kadin no ania a pamay-an ti panangagas ken panangopera ti situtulok nga awatem a para kenka ken kadagiti annakmo ken nasuratam kadin ti DPA card-mo? Para iti kompleto a pannakausig dagitoy a bambanag, repasuem a naimbag ti “Salsaludsod Dagiti Agbasbasa” iti Hunio 15, 2004, ken Oktubre 15, 2000 a ruar Ti Pagwanawanan. Kalpasanna, tapno makaaramidka iti personal a desision no ania ti awatem wenno pagkedkedam a pamay-an ti panangagas, usarem dagiti work sheet iti suplemento ti Enero 2007 a Ti Ministeriotayo iti Pagarian a “Kasano ti Panangmatmatko Kadagiti Babbabassit a Kapaset ti Dara ken iti Panangagas a Pakausaran ti Mismo a Darak?” Kamaudiananna, siguraduem nga isurat iti DPA card-mo dagiti napilim a pamay-an ti panangagas. Amin a pangngeddengmo ket masapul nga ibagam kadagiti napilim a pannakabagi iti panagpaagas ken iti siasinoman a saan a Saksi a kameng ti pamiliayo.