Umdas Kadin ti Maar-aramidak?
1. Ania dagiti mabalin a pakaupayan ti maysa a matalek a Kristiano?
1 Naisaludsodyo kadin dayta iti bagbagiyo? Nalabit maup-upaykayo iti limitado a maar-aramidanyo iti ministerio gapu iti panaglakay wenno panagbaket, ikakapuy ti salun-at, wenno umad-adu a responsabilidad iti pamilia. Insurat ti maysa a kabsat a babai nga addaan iti tallo nga annak a makonkonsiensia no dadduma gapu ta maib-ibus ti panawen ken pigsana a mangas-asikaso iti kasapulan ti pamiliana, isu a limitado ti maar-aramidanna iti ministerio. Ania ti makatulong tapno natimbeng ti panangmatmattayo iti daytoy a banag?
2. Ania ti namnamaen ni Jehova kadatayo?
2 No Ania ti Namnamaen ni Jehova Kadatayo: Siempre, kayattayo amin nga adu ti magapuanantayo iti ministerio. Ngem masansan a dakkel ti nagdumaan ti kayattayo nga aramiden ken ti talaga a kabaelantayo. Ti tarigagaytayo a naan-anay a makipaset iti ministerio ipakitana a saantayo nga agpampamayan. Ditay koma liplipatan nga ammo ni Jehova ti limitasiontayo ket saanna a kiddawen ti nalablabes ngem iti kabaelantayo. (Sal. 103:13, 14) Ania ti namnamaenna kadatayo? Kayatna nga agserbitayo iti amin a kararua ken ipaaytayo kenkuana ti amin a kabaelantayo.—Col. 3:23.
3. Kasanotayo a maammuan no ania ti kabaelantayo iti ministerio?
3 Ania ti makatulong kadatayo a mangammo no ania a talaga ti kabaelantayo nga aramiden? Kiddawentayo ken Jehova a tulongannatayo a maaddaan iti realistiko a panangmatmat iti kasasaadtayo. (Sal. 26:2) Makatulong met ti maysa a nataengan iti naespirituan a gayyem a makaam-ammo unay kadatayo ken saan nga agbain a mangibaga no ania ti kasapulan a parang-ayentayo. (Prov. 27:9) Laglagipentayo met nga agbaliwbaliw ti situasion isu a nasayaat no masansan a tingitingentayo ti kasasaadtayo.—Efe. 5:10.
4. Kasanotayo koma a matmatan dagiti naibatay iti Biblia a pammaregta mainaig iti ministerio?
4 No Kasanoyo a Matmatan ti Pammaregta: Iti maysa a lumba, masansan nga agpukkaw dagiti agbuybuya. Ti panggepda ket tapno mapabileg dagiti tumataray a manggaw-at iti kalat, saan ket a mangupay. Umasping iti dayta, dagiti naibatay iti Biblia a pammaregta ken pammalagip kadagiti gimong ken kadagiti publikasiontayo tapno ‘ganetgetantayo nga ikasaba ti sao’ ket makagunggona kadatayo imbes a mangipamatmat a kurang ti maar-aramidantayo. (2 Tim. 4:2) Makapagtalektayo a no ikagkagumaantayo nga aramiden ti amin a kabaelantayo, lagipento ni Jehova ti ‘ayat ken ar-aramidtayo’ ket bendisionannatayo.—Heb. 6:10.