Masapul a Masibugan ti Bin-i Tapno Agtubo
1. Ania ti masapul a masibugan tapno agtubo?
1 Masapul a masibugan dagiti bin-i a naimula tapno agtubo. Kasta met laeng no maipapan kadagiti bin-i ti kinapudno a naimula iti puso dagiti tattao iti teritoriatayo. (1 Cor. 3:6) Masapul a sarungkaran ken sibugantayo dagiti piguratibo a bin-i babaen ti panangusartayo iti Sao ti Dios no kayattayo nga agramut, agtubo, ken lumangtoda.
2. Ania ti aramidentayo tapno adda panggapuantayo nga agsarungkar?
2 Agsaludsodkayo: No agsagsaganakayo iti presentasionyo, apay a saankayo a mangisagana iti makapainteres a saludsod a sungbatanyo inton sumarungkarkayo? Ibatiyo dayta a saludsod iti ngudo ti damo a pannakisaritayo, ken makitulagkayo iti bumalay no kaanokayo nga agsubli. Adu ti nakapaneknek a nagsayaat ti mangpili iti saludsod manipud iti libro nga Isursuro ti Biblia tapno maidemostra no kasano ti agadal iti Biblia.
3. Ania dagiti impormasion nga isuratyo iti rekordyo iti umuna a pannakisaritayo iti bumalay?
3 Mangaramidkayo iti Rekord: Apaman a makapagpakadakayo iti damo a pannakisaritayo iti bumalay, isuratyo ti amin a napagsaritaanyo. Isuratyo ti nagan ken adresna. Nasayaat met no isuratyo no kaanoyo a nakasarita, ania ti napagsaritaanyo, ken no ania ti naipaimayo a literatura, no adda. Imbagana kadi nga adda relihionna? Adda kadi pamiliana? Imbagana kadi dagiti paginteresan ken pakaseknanna? Makatulong kadakayo dagita nga impormasion tapno ammoyo no ania a topiko ti paginteresanna a pagsaritaanyonto. Isuratyo met no ania ti nagtulaganyo a panagsubliyo ken ti saludsod a sungbatanyonto.
4. Apay nga agan-anustayo a mangsurnad iti interes dagiti makasabaantayo?
4 Agan-anuskayo: Saan nga agsardeng ni Satanas a ‘mangikkat iti sao’ a naimula iti puso ti maysa a tao. (Mar. 4:14, 15) Gapuna, agan-anuskayo uray no saanyo a madanon ti interesado a tao iti pagtaenganda. Mabalinyo ti mangipatulod iti surat wenno mangibati iti ababa a surat iti ruanganda. Nairugi ti maysa a payunir nga iyadalan iti Biblia ti maysa a babai ngem saanna metten a nadandanon ti babai iti pagtaenganna isu a sinuratanna. Idi nadanonna met laengen iti pagtaenganna, imbaga ti babai a natukay unay ti pusona iti personal nga interes nga impakita ti kabsat kenkuana. No sibugantayo dagiti bin-i ti kinapudno, makariknatayo iti rag-o no makitatayo nga agtubo, dumakkel, ken “agbungada iti saggatlopulo ken innem a pulo ken sangagasut.”—Mar. 4:20.