Pagtuladan a Presentasion

Panangirugi iti Panagadal iti Biblia iti Umuna a Sabado iti Enero

“Patien ti dadduma a tattao a ti Biblia ket mapagtalkan a libro dagiti padto. Adda met dagiti agkuna a naglaon daytoy kadagiti saan a nalawag a padto a mabalin nga ipaulog iti adu a nagduduma a pamay-an. Ania ti makunayo?” Palubosanyo a sumungbat. Kalpasanna, ikkanyo ti bumalay iti kopia ti Enero 1 a Pagwanawanan, ken usigenyo ti material iti babaen ti umuna a subtitulo iti panid 16 ken ti uray maysa laeng a teksto. Itukonyo dagiti magasin sa ibagayo nga agsublikayto tapno pagsaritaanyo ti sumaganad a saludsod.

Ti Pagwanawanan Enero 1

“Adu ti masursurotayo manipud kadagiti natatan-ok a tattao iti historia. Umanamongkayo kadi? [Palubosanyo a sumungbat.] Daytoy a teksto ket tumukoy iti maysa a natan-ok a tao, daydiay kakaisuna a naawagan iti Biblia a ‘gayyem ti Dios.’ [Basaen ti Santiago 2:23.] Ilawlawag daytoy a magasin no apay a ni Abraham ket imbilang ti Dios a gayyemna ken no ania ti masursurotayo kenkuana.”

Agriingkayo! Enero

“Ti panagpasuksok, panagkupit, ken ti dadduma pay a kita ti panagsuitik ket gagangayen iti lubong ti negosio. Adda dagiti agkuna a ti negosio ket agkasapulan no dadduma iti panagsuitik tapno agballigida. Ania ti makunayo? [Palubosanyo a sumungbat.] Imutektekanyo daytoy a mamagpanunot a sasao. [Basaen ti Proverbio 20:17.] Ilawlawag daytoy a magasin no apay a nasayaat ti agbalin a napudno.”