Agbirok nga Umuna Sakbay a Mangasaba

1. Apay a dagiti teritoria a naituding iti kongregasion nga adda kadagiti lugar nga agus-usar iti nagduduma a lenguahe ket nabingaybingay sigun iti lenguahe?

¹ Idi Pentecostes 33 C.E., kalpasan nga immawat dagiti adalan ni Jesus iti nasantuan nga espiritu, “nangrugida nga agsao iti nagduduma a pagsasao” kadagiti tattao nga adda sadiay a naggapu kadagiti adayo a paset ti daga. (Ara. 2:4) Kas resultana, agarup 3,000 ti nabautisaran. Makapainteres ta adda maysa a lenguahe nga agpapada nga ammo ti kaaduan kadagiti bisita—mabalin a Hebreo wenno Griego. Kaskasdi, kayat ni Jehova a maikasaba ti naimbag a damag maipapan iti Pagarian iti nakayanakanda a pagsasao. Awan duadua a ti maysa a makagapu ket ad-adda nga ipangag dagiti tattao ti naimbag a damag no mangngegda dayta iti bukodda a pagsasao. Isu nga ita, dagiti teritoria a naituding iti kongregasion nga adda kadagiti lugar nga agus-usar iti nagduduma a lenguahe ket nabingaybingay sigun iti lenguahe. (Organisado, p. 107, par. 1-2) Awan ti naituding a teritoria dagiti grupo a ganggannaet ti pagsasaona, ngem mabalinda a kasabaan dagidiay agsasao iti lenguaheda nga agnanaed iti teritoria ti mangsupsuporta a kongregasion ken dadduma pay a kabangibang a kongregasion.

2. (a) Ania ti trabaho a panagbirok, ken pangaramidan iti daytoy? (b) Kasano a makapagtitinnulong dagiti kongregasion a mangasaba iti teritoria a nagduduma ti lenguahena? (c) Ania ti aramidentayo no adda masarakantayo nga interesado a sabali ti lenguahena?

² No agnanaedkayo iti lugar a maymaysa ti lenguahena, mabalinyo ti mangasaba iti tunggal balay. Ngem sabali ti kasasaad no agnanaedkayo iti siudad nga agus-usar iti nagduduma a lenguahe. Mabalin a mangaskasaba met iti dayta a lugar dagiti kongregasion a sabali ti lenguahena. Nupay dagiti kongregasion ket mabalin a mangted iti impormasion maipapan kadagiti nasarakanda nga agsasao iti lenguaheyo, ti kongregasion wenno grupoyo ti nangnangruna a makinresponsabilidad a mangbirok kadagiti tattao a kasabaanyo. (Kitaenyo ti kahon nga “Agtitinnulongkayo.”) Gapuna, masapul a makiramankayo iti trabaho a panagbirok, nga agsaludsodkayo tapno mabirokanyo dagiti tattao nga agsasao iti maysa nga espesipiko a lenguahe. Kasano a maaramid daytoy?

3. Ania dagiti ikabilangan ti kongregasion wenno grupo iti panangikeddeng no sadino ken kasano kapaut ti panawen a busbosenda iti panagbirok?

³ Panangorganisar iti Trabaho a Panagbirok: Ti panawen a busbosenyo iti trabaho a panagbirok kadagiti lugar a nagduduma ti lenguahena ket agdepende iti lokal a kasasaad. Kas pagarigan, mano ti agsasao sadiay iti kasta a lenguahe? Mano ti agibumbunannag? Mano ti adres a nailistan ti kongregasion wenno grupo? Saan a kasapulan nga agpapada ti kapaut ti panawen a busbosen ti kongregasion nga agbirok iti tunggal lugar, no di ket mabalinda nga ipamaysa ti agbirok kadagiti lugar nga ad-adu ti matataona a sakup ti teritoriada ken kadagiti lugar a saan unay nga adayo. Nupay kasta, napateg ti pannakaadda ti naurnos ken organisado a panagbirok tapno ad-adu ti maaddaan iti oportunidad nga umawag iti nagan ni Jehova.—Roma 10:13, 14.

4. (a) Kasano nga organisaren ti trabaho a panagbirok? (b) Ania ti sumagmamano a pamay-an ti panangbirok kadagiti tattao nga agsasao iti lenguaheyo?

⁴ Tapno saan a maulit-ulit ti panagbirok, masapul nga organisaren ken imatonan ti bagi dagiti panglakayen, nangnangruna ti manangaywan iti serbisio, ti trabaho a panagbirok. (1 Cor. 9:26) Kadagiti grupo a ganggannaet ti pagsasaona, mabalin nga adda mangidaulo a kualipikado a kabsat, nasaysayaat no panglakayen wenno ministerial nga adipen, a pinili ti bagi dagiti panglakayen ti kongregasion a mangsupsuporta iti grupo. Adu a kongregasion ken grupo ti addaan iti sistematiko nga urnos a mangaramid iti damo a panagbirok, a nalabit agusarda iti directory wenno Internet a mangilista iti nagan a gagangay iti dayta a lenguahe. Kalpasanna, irugidan ti trabaho a panagbirok babaen ti iyaawag iti telepono wenno panagbisita tapno maikeddeng no ania nga adres ti mairaman iti teritoria. No praktikal, mabalin nga iyurnos ti bagi dagiti panglakayen ti kongregasion a mangsupsuporta iti grupo a sagpaminsan a makiraman ti intero a kongregasion iti trabaho a panagbirok.—Kitaenyo ti kahon a “No Kasano a Biroken Dagidiay Agsasao iti Lenguaheyo.”

5. (a) Ania ti sumagmamano a singasing kadagiti agibumbunannag a makiramraman iti trabaho a panagbirok? (b) Iti panagbiroktayo, ania ti mabalintayo nga ibaga kadagiti tattao?

⁵ Rumbeng a nalawag no ania ti panggeptayo tunggal makiramantayo iti trabaho a panagbirok. Yantangay daytoy a trabaho ket paset ti ministerio, masapul nga agkawestayo kas ministro. Nakatulong iti adu ti panagensayo iti presentasion ken panagsao iti lenguahe nga usarenda bayat ti panagbirokda tapno agtalinaedda a naganaygay ken lumaingda nga agsao iti lenguahe. Mabalintayo nga ireport ti oras a mabusbostayo iti panagbirok ngem saan a maireport ti oras a mabusbos iti panangisagana iti mapa ti teritoria ken listaan. No adda masarakantayo nga agsasao iti kasta a lenguahe, ikagumaantayo nga iranud ti naimbag a damag sa ibagatayo a dagus iti manangaywan iti serbisio wenno iti dinutokanna tapno mairaman daytoy iti rekord ti teritoria. Aramidentayo daytoy uray no saan nga interesado ti tao. Nupay napateg ti trabaho a panagbirok, rumbeng a balanse ken makiramantayo iti amin a benneg ti ministerio.—Kitaenyo ti kahon a “No Ania ti Ibaga iti Trabaho a Panagbirok.”

6. Ania dagiti karit iti panagbirok kadagiti tuleng?

⁶ Panagbirok Kadagiti Tuleng: Sabali ti rigat ti panagbirok kadagiti tuleng ken agkalikagum iti kinapinget ken anus. Ti tuleng ket saan a maam-ammo babaen ti ispeling ti nagan, itsura, wenno panagkawkawesna. Malaksid iti dayta, mabalin a naannad dagiti kapamilia ken gagayyemna isu nga agkedkedda a mangted iti impormasion kadagiti agibumbunannag nga agsalsaludsod. Dagiti sumaganad a singasing iti panagbirok kadagiti tuleng ket mabalin a makatulong met iti panagbirok kadagiti saan a tuleng.

7. (a) Ania ti mabalin nga isaludsod kadagiti kabalbalayan iti panagbirok kadagiti tuleng? (b) Kasanotayo a maikkat ti panagduadua ti bumalay?

⁷ Nagballigi dagiti kongregasion ken grupo ti sign-language iti panagsalsaludsodda kadagiti kabalbalayan. Nalabit adda am-ammo ti bumalay a kaarruba, katrabahuan, wenno kaeskuelaanna nga agus-usar iti sign language. Mabalin nga adda nakitana a karatula iti kalsada a mangipakita nga adda dagiti ubbing a tuleng iti dayta a lugar. Nalabit adda kabagianna a tuleng. Laglagipenyo a mabalin a pagduaduaan dagiti dadduma ti panggep ti ibibisitayo. Ngem dakkel ti maaramidanyo tapno saan a mabuteng ti bumalay babaen ti panagbalinyo a mannakigayyem ken no ti panagilawlawagyo ket ababa, napudno, ken nadayaw. Adda met dagiti naaddaan iti nasayaat a resulta babaen ti panangipakitada iti Biblia wenno ti dadduma a DVD bayat ti panagsaludsodda iti bumalay no adda am-ammona a tuleng. Kalpasanna, ibagada a kayatda nga iranud ti namnama a naibatay iti Biblia kadagiti kasta a tattao. No agkedked ti bumalay a mangipaay iti impormasion, mabalin a kayatna nga awaten ti address card wenno ti imbitasion iti gimong ti kongregasion sa itedna iti tuleng a kabagian wenno gayyemna.

8. Kasano a makatulong ti kabangibang a kongregasion iti sign-language a kongregasion?

⁸ Maysa wenno dua nga aldaw iti tawen, mabalin nga awisen ti sign-language a kongregasion ti kabangibangna a kongregasion a sabali ti lenguahena a tumulong kadakuada nga agbirok iti tuleng kadagiti ili wenno siudad a sakup ti teritoriada. Ti taripnong sakbay ti panangasaba nga idauluan ti sign language a kongregasion ramanenna dagiti instruksion para iti daytoy a trabaho ken demostrasion. Adda maysa nga agibumbunannag iti sign-language a kongregasion a kumuyog iti tunggal grupo ken maikkanda iti mapa ti lugar a pagbirokanda.

9. Kasano a maaramid ti trabaho a panagbirok iti lugar a pagtataripnongan, paglinglingayan, wenno pakaipapaayan kadagiti makatulong a serbisio a para kadagiti tuleng?

⁹ Mabalin met ti agbirok kadagiti lugar a pagtataripnongan ken paglinglingayan wenno pakaipapaayan dagiti makatulong a serbisio a para kadagiti tuleng. Masapul nga agkawes ti agibumbunannag iti maitutop iti situasion. Nasaysayaat no maysa wenno dua a tao ti kasaritayo ken agbalinkayo a nataktika imbes a kasaritayo ti intero a grupo. No nasayaat ti resulta ti pannakisaritayo, mabalinyo nga alaen ti numero ti telepono ken adresda.

10. Kasano nga agbirok dagiti agibumbunannag kadagiti lugar ti negosio?

¹⁰ Ti sabali pay a pamay-an ket ti panagusar iti mapa a mangipakita kadagiti lugar ti negosio sa sumarungkarkayo iti maitutop a tiempo. Adda dagiti mapa a mangipakita kadagiti paggasolinaan. Ti dadduma met a mapa ipakitana ti ayan dagiti dry cleaner, laundry shop, restawran, hotel, wenno sabali pay a kita ti negosio. No ti tunggal mapa ket addaan iti isu met laeng a kita ti negosio, mabalin a maysa laeng a presentasion ti usaren dagiti agibumbunannag tapno masanay ken lumaingda iti dayta. Kas pagarigan, yantangay adda dagiti tuleng nga agdagdagus met kadagiti hotel, mabalintayo nga ilawlawag iti apagbiit ti trabahotayo iti desk clerk sa iyawattayo ti pakete nga addaan iti DVD ken imbitasion iti gimong ti kongregasion tapno itedna kadagiti guest-da a tuleng. Iti dadduma a negosio mabalintayo a saludsoden no adda trabahador wenno regular a kostumerda nga agus-usar iti sign language. No adda eskuelaan para kadagiti tuleng iti teritoria, mabalintayo ti mangitukon kadagiti DVD a publikasiontayo para iti librariada.

11. Apay a napateg a paset ti ministerio ti trabaho a panagbirok?

¹¹ Napateg a Trabaho: Dakkel a trabaho ti panangbirok kadagiti tattao nga agsasao iti lenguaheyo. Malaksid iti dayta, adda dagiti lugar a nagalisto nga agbaliw ti kasasaad gapu ta masukansukat dagiti tattao nga agnanaed sadiay, isu a narigat a taginayonen ti umiso a rekord. Nupay kasta, iti umad-adu a lugar, ti trabaho a panagbirok ket nagpateg nga aspeto ti ministerio. Saan a mangidumduma ni Jehova, a nangited kadatayo iti annongen a mangasaba. (Ara. 10:34) “Ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:3, 4) Sapay koma ta makitinnulongtayo ngarud ken ni Jehova ken iti tunggal maysa iti panangbirok kadagiti tattao iti amin a lenguahe nga addaan iti “nasayaat ken naimbag a puso.”—Luc. 8:15.

[Kahon iti panid 5]

Agtitinnulongkayo

No kasapulan ti kongregasion wenno grupo ti tulong nga agbirok kadagiti agsasao iti lenguaheda a mabalinda a kasabaan, ti manangaywan iti serbisio mabalinna ti makiuman kadagiti panglakayen kadagiti kabangibangda a kongregasion nga agus-usar iti sabali a pagsasao. Nasaysayaat a makiumankayo kadagiti kongregasion a saan unay nga adayo wenno kadagiti aduan iti agibumbunannag a makapagsao iti lenguaheyo. Dagiti napakaammuan a kongregasion ibagada kadagiti agibumbunannag a no makasarakda iti tao nga agsasao iti kasta a lenguahe, masapul nga isuratda ti adresna sa itedda iti manangaywan iti serbisio tapno maited iti nagpatulong a kongregasion wenno grupo. Dagiti manangaywan iti serbisio kadagiti kongregasion a karaman iti daytoy ket mangaramid iti urnos a pabor iti amin—no kasanoda a wanasen ti teritoria ken iturongda dagiti interesado kadagiti maitutop a kongregasion wenno grupo.

No adda masarakan dagiti agibumbunannag a talaga nga interesado nga agsasao iti sabali a lenguahe (wenno tuleng), dagus a suratanda ti porma a Please Follow Up (S-43) sa itedda iti sekretario ti kongregasion. Iti kasta, dagus nga umawat iti naespirituan a tulong dayta a tao.—Kitaenyo ti km 5/11 p. 3.

[Kahon iti panid 6]

No Kasano a Biroken Dagidiay Agsasao iti Lenguaheyo

• Agsaludsodkayo kadagiti dadduma—dagiti mayad-adalan iti Biblia, kapamilia, katrabahuan, ken dadduma pay.

• Agusarkayo iti telephone directory a mangbirok kadagiti nagan a gagangay iti maysa a lenguahe. Mabalin met ti agusar iti direktorio manipud iti Internet wenno dagiti kompania ti telepono a nakailistaan dagiti nagan sigun ti adresda.

• Sitataktika nga agsaludsodkayo kadagiti lugar a mangmangted iti serbisio publiko kas iti libraria, opisina ti gobierno, ken eskuelaan.

• Kitaenyo iti pagiwarnak no adda dagiti anunsio maipapan kadagiti aktibidad ti publiko nga inyurnos ti komunidad nga agus-usar iti ganggannaet a lenguahe.

• Sarungkaranyo dagiti pagtagilakuan ken negosio a kanayon a papanan dagiti tattao a ganggannaet ti lenguahena.

• Dumawatkayo iti permiso kadagiti mangimatmaton wenno mangay-aywan sakbay a mangiplastarkayo iti lamisaan a pangikabilanyo iti literatura kadagiti lugar ti negosio, unibersidad, wenno paradaan a masansan a pappapanan dagiti tattao nga agsasao iti sabali a lenguahe.

• No ipalubos ti linteg iti pagilianyo, gumatangkayo iti commercial directory wenno program ti kompiuter nga agbirok kadagiti site iti Internet a mabalin a luktan ti publiko.

[Kahon iti panid 7]

No Ania ti Ibaga iti Trabaho a Panagbirok

Mapukaw ti panagduadua no nainggayyeman, napasnek, ken direkta ti pannakisaritayo. Masansan a makatulong no mangipakitakayo nga umuna iti literatura iti lenguahe ti tao a birbirokenyo.

Kalpasan ti panangkablaawyo, mabalinyo nga ibaga: “Agbirbirokkami kadagiti agsasao iti ______ tapno mairanudmi kadakuada ti namnama nga isursuro ti Biblia. Adda kadi am-ammoyo a mabalinmi a kasarita?”

No agbirbirokkayo kadagiti tuleng, mabalinyo nga ibaga: “Naimbag nga aldawyo. Adda kayatko nga ipakita kadakayo. [Luktanyo ti portable video player, sa ipabuyayo ti New World Translation—On DVD.] Maysa daytoy a benneg ti Biblia iti American Sign Language. Malaksid iti Biblia, addaankami iti dadduma pay a video a nairanta a tumulong kadagiti tuleng a maaddaan iti nasinged a relasion iti Dios. Libre dagitoy. Adda kadi am-ammoyo a tuleng wenno adda depekto ti panagdengngegna nga agus-usar iti sign language?” No awan ti ammo ti bumalay, mabalinyo ti mangdakamat kadagiti lugar a mabalin nga adda nakitana a tuleng, kas iti pagtrabahuan, eskuelaan, wenno iti lugarda.