Dimo Ibaga—“Saanko a Kabaelan”
1. Apay a maamak dagiti dadduma a mangitukon iti panangyadal iti Biblia?
1 Maamakka kadi a mangitukon iti panangyadal iti Biblia gapu ta iti panagriknam ket saanmo a kabaelan ti mangyadal? Dagiti matalek nga adipen ti Dios idi un-unana, kas kada Moises ken Jeremias, ket nakarikna met idi a saanda a maikari iti annongenda. (Ex. 3:10, 11; 4:10; Jer. 1:4-6) Isu a saan laeng a sika ti makarikrikna iti kasta. Kasano a maparmek ti kasta a rikna?
2. Apay a saantayo koma a limitaran ti ministeriotayo iti panangasaba sa ipabiangtayo kadagiti dadduma ti panangyadal iti Biblia?
2 Laglagipentayo a saan nga ipaaramid ni Jehova ti banag a saantayo a kabaelan nga aramiden. (Sal. 103:14) No kasta, kabaelantayo ti ‘mangaramid iti ad-adalan’ ken ‘mangisuro kadakuada.’ (Mat. 28:19, 20) Dayta a pribilehio ket saan nga impaay ni Jehova kadagiti laeng aduan kapadasan wenno nalalaing. (1 Cor. 1:26, 27) Gapuna, saantayo koma a limitaran ti ministeriotayo iti panangasaba sa ipabiangtayo kadagiti dadduma ti panangyadal iti Biblia.
3. Kasano a tultulongannatayo ni Jehova nga agbalin a kualipikado para iti trabaho a panangyadal iti Biblia?
3 Tultulongannatayo ni Jehova nga Agbalin a Kualipikado: Ni Jehova ti namagbalin kadatayo a kualipikado a mangaramid iti adalan. (2 Cor. 3:5) Babaen iti organisasionna, insuro kadatayo ni Jehova dagiti kinapudno manipud iti Biblia a saan nga ammo uray dagiti edukado a tattao ditoy lubong. (1 Cor. 2:7, 8) Impaisuratna iti Biblia dagiti pamay-an ti panangisuro ti Naindaklan a Mannursuro a ni Jesus tapno isu ti tuladentayo, ken agtultuloy a sansanayennatayo babaen ti kongregasion. Maysa pay, nangipaay ni Jehova kadagiti publikasion a tumulong kadatayo a mangyadal iti Biblia. Nangted met iti alikamen kas iti Isursuro ti Biblia, a mangilawlawag iti kinapudno iti lohikal a pamay-an ken nalaka a maawatan. Ti panangikondukta iti panagadal iti Biblia ket saan a kas karigat iti ipagaruptayo.
4. Apay a makapagtalektayo a tulongannatayo ni Jehova?
4 Naitungpal da Moises ken Jeremias dagiti annongenda babaen iti tulong ni Jehova. (Ex. 4:11, 12; Jer. 1:7, 8) Mabalintayo met a kiddawen ken Jehova a tulongannatayo. Ngamin, no mangyad-adaltayo, isursurotayo ti kinapudno maipapan ken Jehova ket makaay-ayo dayta kenkuana. (1 Juan 3:22) Gapuna, pagbalinenyo a kalat ti makiraman iti makaparagsak ken makagunggona a paset ti ministerio—ti panangyadal iti Biblia.