Ag-auxiliary Pioneer-ka Kadi?
1. Apay a ti panawen ti Memorial ket nagsayaat a panawen iti panangpalawa iti ministeriotayo?
1 Ti panawen ti Memorial ket nagsayaat a panawen iti panangpalawa iti ministeriotayo. Panawen daytoy tapno utobentayo ti naindaklan nga ayat ni Jehova gapu iti panangipaayna iti Anakna kas subbot. (Juan 3:16) Agliplippias ti pusotayo iti panagyaman, ket daytoy ti mangparayray iti tarigagaytayo a mangibaga kadagiti sabsabali iti maipapan ken ni Jehova ken iti ar-aramidenna agpaay iti sangatauan. (Isa. 12:4, 5; Luc. 6:45) Panawen met daytoy tapno tagiragsakentayo ti espesial a kampania a mangawis kadagiti am-ammotayo ken kadagiti tattao iti teritoriatayo a tumabuno iti Memorial. Kalpasanna, ikagumaantayo a parayrayen ti interes dagiti tumabuno. Palawaem kadi ti ministeriom babaen ti panag-auxiliary pioneer-mo inton Marso, Abril, wenno Mayo?
2. Apay a ti Marso ket nagsayaat a bulan para iti panag-auxiliary pioneer?
2 Pagbalinen nga Espesial a Bulan ti Marso: Ti Marso ket nangnangruna a nagsayaat a bulan para iti panag-auxiliary pioneer. Mabalin nga agpili dagidiay agpayunir no 30 wenno 50 nga oras ti ragpatenda. No mairana ti ibibisita ti manangaywan iti sirkito kabayatan ti Marso, mabalin a tabunuan dagiti auxiliary pioneer ti intero a miting dagiti regular ken special pioneer. No idilig kadagiti napalabas a tawen, ti kampania a panagiwaras kadagiti imbitasion iti Memorial, a maangay iti Martes, Marso 26, 2013, ket at-atiddogen ta mangrugi dayta iti Marso 1. Malaksid iti dayta, lima ti Sabado ken Domingo iti Marso. Gapuna, apay a dimo panunoten no mabalinmo ti ag-auxiliary pioneer ket pagbalinem daytoy nga espesial a bulan iti tawen?
3. Ania dagiti mabalintayo nga aramiden tapno ad-adu ti panawentayo a makiraman iti ministerio?
3 Agplano Itan: Itan ti panawen tapno adalem ti iskediulmo ken kitaem no ania dagiti panagbalbaliw a nasken nga aramidem tapno makapagpayunirka. Napateg ti panagtitinnulongyo a sangapamiliaan, isu a bayat ti Panagdaydayaw ti Pamilia, pagsasaritaanyo no ania dagiti kalatyo ken agaramidkayo iti iskediul. (Prov. 15:22) Saanka a maupay no saanka a makapagpayunir. Mabalinmo kadi a baliwan ti iskediulmo tapno napapaut ti panawenmo a mangasaba kadagiti aldaw a rummuarka? Mabalinmo kadi a nayonan iti maysa nga aldaw ti pannakiramanmo iti ministerio kabayatan ti lawas?
4. Ania dagiti pagsayaatan ti panangpalawa iti aktibidadtayo iti Marso, Abril, ken Mayo?
4 Bayat a palawaentayo ti aktibidadtayo iti Marso, Abril, ken Mayo, rumayray met ti rag-o ken pannakapnek nga itden ti panagserbitayo ken Jehova ken iti panangtulong kadagiti sabsabali. (Juan 4:34; Ara. 20:35) Kangrunaan iti amin, ti panagsakripisiotayo ket mangyeg iti rag-o ken Jehova.—Prov. 27:11.