Ad-adu nga Oportunidad a Mangidaydayaw ken ni Jehova
1. Ania ti baro nga urnos a tumulong kadatayo a ‘mangidaydayaw ken Jehova iti kasta unay’?
1 Idi Marso, naaramid ti baro nga urnos a mabalin nga ag-auxiliary pioneer dagiti agibumbunannag uray 30 nga oras laeng ti ragpatenda iti Marso ken Abril ken iti bulan a regular nga ibibisita ti manangaywan iti sirkito. No ti ibibisita ti manangaywan iti sirkito ket saklawenna ti dua a bulan, mabalin a pilien ti agibumbunannag no ania kadagita a bulan ti panag-auxiliary pioneer-na a 30 nga oras laeng ti maikalikagum a ragpatenna. Mabalin a tabunuan dagiti auxiliary pioneer ti intero a miting dagiti regular ken special pioneer. Kayatna a sawen nga uray no saantay a kabaelan a ragpaten ti maikalikagum a 50 nga oras, mabalintayo latta nga ‘idaydayaw ni Jehova iti kasta unay’ kas auxiliary pioneer iti aginggat’ uppat a daras iti makatawen a 30 nga oras laeng ti ragpaten!—Sal. 109:30; 119:171.
2. Ania dagiti matagiragsak dagiti auxiliary pioneer kabayatan ti ibibisita ti manangaywan iti sirkito?
2 Kabayatan ti Ibibisita ti Manangaywan iti Sirkito: Ad-adu itan ti makapag-auxiliary pioneer kabayatan ti ibibisita ti manangaywan iti sirkito ken matagiragsakda ti panagpipinnabileg babaen iti pannakikaduada kenkuana iti ministerio. (Roma 1:11, 12) Mabalin nga adu kadagiti auxiliary pioneer ti agbakasion iti trabaho iti dayta a lawas tapno makaduada iti ministerio ti manangaywan iti sirkito. Dagiti agtrabtrabaho iti Lunes agingga iti Biernes mabalinda a kiddawen iti manangaywan iti sirkito a makikaduadanto kenkuana iti Sabado wenno Domingo. Maysa pay, maparegta la ketdi dagiti auxiliary pioneer gapu ta matabunuanda ti miting dagiti regular ken special pioneer!
3. Apay a nagsayaat ti ag-auxiliary pioneer iti panawen ti Memorial?
3 Kabayatan ti Marso ken Abril: Dagiti nag-auxiliary pioneer iti maysa a bulan iti panawen ti Memorial a nangikeddeng a 30 nga oras ti ragpatenda ket mabalindan a doblien ti ‘sakripisio ti panagdaydayawda’! (Heb. 13:15) Nagsayaat a bulan ti Marso ken Abril a mangpalawa iti ministeriotayo kas auxiliary pioneer. Kadagita a bulan iti tunggal tawen a makiramramantayo iti kampania nga agawis kadagiti tumabuno iti Memorial. Maysa pay, gapu ta adu ti mangpalawa iti ministerioda iti panawen ti Memorial, agduduma a kakabsat ti makaduatayo iti ministerio. Kalpasan ti Memorial, sarungkarantayo dagiti interesado a timmabuno ken paregtaentayo ida a tumabuno iti espesial a palawag publiko. Ti kadi pusom tignayennaka a mangaprobetsar iti daytoy kanayonan a gundaway nga ag-auxiliary pioneer?—Luc. 6:45.