Pagtuladan a Presentasion

Panangirugi iti panangyadal iti Biblia iti umuna a Sabado iti Marso

“Simmarungkarkami iti apagbiit gapu ta adda mapasamak inton Abril 14. Dayta ti anibersario ti ipapatay ni Jesus. Addanto dagiti manglaglagip iti dayta nga okasion gapu ta ammoda a napateg ti ipapatayna. Adda met dagiti saan a makaammo iti kinapateg ti ipapatay ni Jesus. Iti panagkunayo, makagunggona ngata kadakayo ken kaniak ti ipapatay ni Jesus?” Palubosanyo a sumungbat. Ipakitayo ti artikulo a “Sungbat Dagiti Saludsod Maipapan iti Biblia” iti Marso 1 a Pagwanawanan, ken usigenyo ti material iti babaen ti umuna a saludsod ken ti uray maysa laeng kadagiti naisitar a teksto. Itukonyo dagiti magasin ken ibagayo nga agsublikayto tapno pagsaritaanyo ti sumaruno a saludsod.

Ti Pagwanawanan Marso 1

“Adu a tattao ti mangpampanunot no apay a saan pay laeng a pagpatinggaen ti Dios ti kinaawan hustisia ken panagsagaba iti lubong. Iti panagkunayo, gapu kadi ta saan a maseknan ti Dios wenno gapu ta ibilangna a pagsayaatan ti tao ti panagsagaba? [Palubosanyo a sumungbat. Kalpasanna, basaenyo ti Juan 3:16.] Uray no adu ti mangus-usar iti daytoy a teksto a mangipakita a maseknan ti Dios, saanda nga ammo no kasano a makagunggona kadakuada ti ipapatay ti anak ti Dios. Ilawlawag daytoy a magasin no kasano a ti ipapatay ni Jesus kabaelanna a pagpatinggaen ti kinaawan hustisia ken panagsagaba ditoy daga.”

Agriingkayo! Marso

“Simmarungkarkami iti apagbiit tapno ilawlawagmi ti maysa a di umiso a kapanunotan ti adu maipapan iti daytoy a teksto iti Biblia. [Basaenyo ti Genesis 1:1.] Adda dagiti mamati a ti uniberso ket naparsua idinto ta saan a patien dayta ti dadduma. Dakayo ngay? [Palubosanyo a sumungbat.] Adu ti saan a mamati iti panamarsua gapu ta isursuro dagiti lider ti relihion ti banag nga awan met iti Biblia. Ipakita daytoy a magasin ti nainkalintegan ken mapagtalkan a pannakailawlawag ti panangrugi ti uniberso.”