No Kasano a Tulongan Dagiti Marigatan nga Agbasa
1. Ania ti problema no isurotayo ti Biblia kadagiti marigatan nga agbasa?
1 Dagiti bumalay a marigatan nga agbasa ket mabalin nga interesado iti naespirituan a bambanag ngem agpangaduada a mangadal iti Biblia ken ti dadduma pay a libro. No ti libro nga Isursuro ti Biblia ti dagus nga itukontayo kadakuada, mabalin nga agkedkedda. Kasanotayo a matulongan ida iti naespirituan? Nagsaludsodkami kadagiti aduan iti kapadasan nga agibumbunannag iti nasurok a 20 a pagilian no ania ti ar-aramidenda. Kitaentayo dagiti singasingda.
2. Ania dagiti alikamen nga epektibo a pangtulong kadagiti marigatan nga agbasa?
2 No ti estudiante ket saan a nalaing wenno saanna nga ammo ti agbasa, mabalinyo nga usaren ti broshur a Listen to God wenno ti Umimdengka iti Dios ket Agbiagka nga Agnanayon. Ti maysa a payunir iti Estados Unidos ipakpakitana iti bumalay ti dua a broshur sa isaludsodna no ania kadagita ti kaykayatna nga adalen. Kuna ti sanga nga opisina iti Kenya nga epektibo unay dagitoy nga alikamen gapu ta iti Africa, gagangay a masursuruan dagiti tattao babaen ti panagestoria imbes nga iti saludsod ken sungbat a panagadal. Nupay nalabit kayat dagiti edukado a tattao ti agadal babaen ti panagbasa ken panagsaludsod, mabalin a saan a komportable iti dayta dagiti nababa ti adalna. No kabaelan ti estudiante ti agbasa, adu nga agibumbunannag ti mangirugi iti panagadal babaen kadagiti broshur a Naimbag a Damag Manipud iti Dios!, wenno ti Mabalinmo ti Makigayyem iti Dios!, wenno nalabit Ti Librok Dagiti Estoria ti Biblia.
3. Kasanotayo nga agbalin nga epektibo iti panangisuro kadagiti saan a makabasa?
3 Mangted iti Komendasion: Dagiti saan a makabasa ket mabalin a managbabain, ken adu ti awan ti kompiansana. Masansan a ti umuna nga addang tapno masursuruanda iti kinapudno ket ti panangtulong kadakuada nga agbalin a komportable. Nalaing ken nalaka a makasursuro ti kaaduan a saan a makabasa. Masapul a raemen ken ipaayantayo ida iti dignidad. (1 Ped. 3:15) Matignayda nga agtultuloy nga agadal no mariknada nga adda serbi dagiti panangikagumaanda ken rumangrang-ayda iti naespirituan. Gapuna, saankayo koma a naimut iti komendasion.
Dagiti saan a makabasa ket mabalin a managbabain, ken adu ti awan ti kompiansana. Masansan a ti umuna nga addang tapno masursuruanda iti kinapudno ket ti panangtulong kadakuada nga agbalin a komportable
4. Kasanotayo a maparegta nga agsagana iti panagadal dagiti marigatan nga agbasa?
4 Uray no saan a nalaing nga agbasa ti estudiante, paregtaenyo nga agsagana para iti panagadalna. Ti dadduma nga agibumbunannag iti South Africa iparparegtada kadagiti iyad-adalanda nga agpatulongda iti kapamilia wenno gayyemda a nalaing nga agbasa. Ti maysa nga agibumbunannag iti Britain ipapausarna ti librona kadagiti iyad-adalanna iti sumagmamano a parapo bayat ti panagadalda tapno makitada a nalaklaka nga amang a sapulen ti sungbat no naugedan, iti kasta, matignayda nga agsagana. Ti maysa a kabsat iti India parparegtaenna dagiti iyad-adalanna a mangkita kadagiti ladawan iti leksion nga adalenda iti sumaruno a lawas ken mennamennaenna a nasaksakbay dagita.
5. No mangyad-adaltayo, kasanotayo a maipakita ti kinaanus?
5 Agbalin a Naanus: Aniaman ti publikasion nga us-usarenyo, ipamaysayo dagiti kangrunaan a punto, ken tulonganyo dagiti iyad-adalanyo a mangtarus a naimbag kadagita. Iti damo, mabalin a nasaysayaat no 10 agingga iti 15 a minuto laeng ti panagadalyo. Saankayo a mangsaklaw iti adu unay a material, nalabit umdasen ti sumagmamano laeng a parapo. Agan-anuskayo no nabuntog nga agbasa ti iyad-adalanyo. Mabalin a matignayto a mangpasayaat iti panagbasana bayat a rumayray ti apresasionna ken ni Jehova. Tapno maaramidna dayta, nasayaat no iti damo pay laeng ket awisenyon a makigimong.
6. Kasanotayo a matulongan dagiti tattao nga agbasa?
6 Alisto a rumang-ay iti naespirituan dagiti estudiante iti Biblia no makasursuroda nga agbasa. (Sal. 1:1-3) Adu ti nakatulong kadagiti iyad-adalanda babaen ti panangusarda iti publikasion nga Apply Yourself to Reading and Writing iti sumagmamano a minuto iti ngudo ti tunggal panagadalda. No maupay ti estudiante, mabalinyo a patanoren ti kompiansana babaen ti panangdakamatyo iti sumagmamano a banag a nasursuronan. Ipanamnamayo a bendisionan ni Jehova dagiti panagreggetna, ken paregtaenyo nga ikararagna ti tulong ni Jehova. (Prov. 16:3; 1 Juan 5:14, 15) Ti dadduma nga agibumbunannag iti Britain parparegtaenda dagiti iyad-adalanda a mangipasdek kadagiti nainkalintegan ngem progresibo a kalat—nalabit panangikabesa nga umuna ti alpabeto, panangbirok ken panangbasa kadagiti napili a teksto, ken panangbasa kadagiti simple a publikasion a naibatay iti Biblia. Iti panangtulong kadagiti tattao nga agbasa, saantayo laeng a suruan ida no di ket patanorentayo ti tarigagayda a mangaramid iti dayta.
7. Apay a saantayo nga agkedked a mangipakaammo iti kinapudno kadagiti marigatan nga agbasa?
7 Saan a tagtagibassiten ni Jehova dagiti nababa ti adalna. (Job 34:19) Ti pusoda ti suksukimatenna. (1 Cron. 28:9) Gapuna, saankayo nga agkedked a mangipakaammo iti kinapudno kadagiti marigatan nga agbasa. Adu ti nagsayaat nga alikamen a mabalinyo nga usaren. Inton agangay, mayallatiwyonto ti panagadal iti libro nga Isursuro ti Biblia ken matulonganyonto a maaddaan iti naun-uneg a pannakaawat iti Kasuratan.