Suruanyo Dagidiay Nakapuy nga Agbasa
1. Ania a karit ti mabalin a pakaipasanguantayo iti ministerio?
1 Bayat a makipaspasettayo iti ministerio, maipasangotayo no dadduma iti karit a mangisuro iti kinapudno kadagiti tattao a marigatan nga agbasa. Ania ti mabalintay nga aramiden?
2. Kasanotayo nga ipakita ti panagraem kadagidiay nakapuy nga agbasa ken apay?
2 Raemenyo Ida: Ti kasasaad ti puso ti maysa a tao ti napateg ken Jehova saan a ti sekular nga edukasionna. (1 Sam. 16:7; Prov. 21:2) Ngarud, ditay tagtagibassiten dagidiay nakapuy nga agbasa. Mabalin a nalaklakada nga awaten ti tulongtayo no raemen ken anusantay ida. (1 Ped. 3:15) Ramanen dayta ti di panangpilit iti maysa a tao a basaenna ti maysa a teksto wenno parapo. Bayat nga umad-adu ti maammuanna a napateg a kinapudno a linaon ti Biblia, mabalin nga ad-adda a magagaranto a mangparang-ay iti abilidadna nga agbasa, iti kasta matagiragsakna a basaen ti Sao ti Dios “iti nababa a timek iti aldaw ken rabii.”—Sal. 1:2, 3.
3. Ania dagiti pamay-an ti panangisuro a mabalin nga usaren kadagidiay nakapuy nga agbasa?
3 Dagiti Pamay-an ti Panangisuro iti Panagadal iti Biblia: Dagiti ladawan ket nagsayaat a katulongan iti panangisuro iti kasta, matandaanan dagiti tattao dagiti maadalda. Mabalin a damagem iti estudiante no ania ti kapaliiwanna iti ladawan nga adda iti publikasion nga ad-adalenyo. Kalpasanna, mangusarka kadagiti espesipiko a saludsod a tumulong kenkuana a mangtarus no ania ti masursurona iti ladawan. Agusarka kadagiti teksto a mangitampok kadagiti espesipiko a punto ti ladawan. Mabalinmo met nga usaren dagiti ladawan kas pangrepaso iti inadalyo. Dimo kaaduen ti iyadalmo iti maymaysa a panagadal. Ipaganetgetmo ti tema ken dagiti kangrunaan a punto nga adalenyo, ken liklikam ti mangdakamat kadagiti punto a di nairaman iti material. Direkta a maibasa dagiti teksto manipud iti Biblia, ken mangibangonka kadagiti saludsod tapno sigurado a maawatan dayta ti estudiante. Daytoy ti mangparayray iti tarigagayna a mangpasayaat iti abilidadna nga agbasa ken agsukimat a bukbukod kadagiti dadduma pay a kinapudno a linaon ti Biblia.
4. Kasanotay a matulongan ti estudiantetayo a lumaing nga agbasa?
4 Dagiti Katulongan a Mangparang-ay iti Panagbasa: Dagiti nakapuy nga agbasa wenno kurang ti tiempoda nga agsursuro nga agbasa a nasayud ket mabalin a maawatan ken matandaananda a naimbag dagiti impormasion. Mabalinyo nga iparegta nga usarenda dagiti magun-odan nga audio recording dagiti publikasiontayo. No imdengan a naimbag ti maysa a tao ti pannakaibasa ti publikasion bayat a pasurotanna dayta iti kopiana, ken uray ulitenna nga isao iti nababa a timek, sumayaat ti abilidadna nga agbasa. Nalabit makatulong pay kenkuana ti broshur nga Apply Yourself to Reading and Writing. Iti dadduma a lugar, mabalin a mangyurnos met dagiti panglakayen kadagiti klase iti kongregasion mainaig iti panagbasa. Mabalin a makatulong dagitoy nga urnos tapno matulongantayo dagidiay nakapuy nga agbasa a mangtarus kadagiti “nasantuan a sursurat,” a mamagsirib kadakuada maipaay iti pannakaisalakan.—2 Tim. 3:15.