Gundawayam Dagiti Oportunidad a Mangisaknap iti Mensahe Maipapan iti Pagarian!
1. Ania ti masursurotayo ken ni David?
1 Saan nga impalubos ni Ari David nga awan ti maaramidanna gapu laeng iti kasasaadna. Kas pagarigan, kayat ni David ti mangibangon iti balay agpaay ken Jehova. Idi nalapdan a mangaramid iti dayta, binalbaliwan ni David dagiti kalatna ket timmulong a nangisagana kadagiti kasapulan ni Solomon a mangibangon iti templo. (1 Ar. 8:17-19; 1 Cron. 29:3-9) Imbes a ti saanna a maaramidan ti pinampanunotna, impamaysa ni David ti atensionna iti kabaelanna nga aramiden. Kasanotayo a matulad ni David bayat a mangar-aramidtayo kadagiti pamay-an a mangisaknap iti mensahe maipapan iti Pagarian?
2. Ania ti masapul a tingitingentayo?
2 Aramidem No Ania ti Kabaelam: Adu ti nangpasimple iti biagda tapno makapag-auxiliary wenno regular pioneer-da. (Mat. 6:22) Kabaelam met kadi nga aramiden dayta? Ikararag ken tingitingem ti kasasaadmo ket mabalin a matakuatam a silulukat kenka ti “dakkel a ruangan a mangiturong iti panagaramid.” No kasta, gundawayam dayta nga oportunidad!—1 Cor. 16:8, 9.
3. Ania dagiti oportunidad a mangasaba a mabalintayo a gundawayan uray no saan nga ipalubos ti kasasaadtayo ti agpayunir?
3 Ngem kasano no saan nga ipalubos ti kasasaadmo ti agpayunir? Mabalinmo a gundawayan ti dadduma pay nga oportunidad a silulukat kenka. Kas pagarigan, no adda dagiti saan a Saksi a makapulpulapolmo iti pagtrabahuam, apay a dimo kasabaan ida iti maitutop a gundaway? Wenno, no adda parikutmo iti salun-at, mabalinmo kadi a kasabaan dagiti mangas-asikaso kenka? Laglagipem nga adda probision para kadagiti limitado ti maaramidanna gapu iti panaglakay wenno panagbaket wenno gapu iti nakaro a parikut iti salun-at a mabalinda ti mangireport iti 15, 30, wenno 45 a minuto. No isuratmo ti binulan a reportmo, siguraduem nga iraman ti oras a nabusbosmo iti di pormal a panangasaba ken ti aniaman a literatura a naipaimam, agraman dagiti tract ken imbitasion iti Memorial ken kombension. Masdaawkanto nga adu gayamen ti nagapuanam no gundawayam dagiti kasla babassit nga oportunidad a mangasaba!
4. Ania ti determinasionmo?
4 Aniaman ti kasasaadtayo, gundawayantayo koma ti tunggal oportunidad a mangisaknap iti naimbag a damag. Iti kasta, makariknatayo iti pannakapnek gapu ta ammotayo nga ar-aramidentayo ti amin a kabaelantayo agpaay iti Pagarian.—Mar. 14:8; Luc. 21:2-4.