Kabaelanyo Kadi ti Sumrek iti “Dakkel a Ruangan a Mangiturong iti Panagaramid”?
1. Ania a “dakkel a ruangan a mangiturong iti panagaramid” ti silulukat kadatayo?
1 Idi naluktan ken apostol Pablo “ti maysa a dakkel a ruangan a mangiturong iti panagaramid,” sigagagar a ginundawayanna ti oportunidad a mangitandudo kadagiti interes ti Pagarian nupay adu ti bumusbusor. (1 Cor. 16:9) Ita, agarup 642,000 nga agibumbunannag iti Pagarian iti intero a lubong ti simrek iti dakkel a ruangan ti panagaramid babaen ti panag-regular pioneer.
2. Apay a nasayaat no sagpaminsan nga usigentayo ti kasasaadtayo?
2 Agbaliwbaliw ti Kasasaad: Nupay limitado ti aktibidadtayo gapu kadagiti agdama a personal a kasasaad, laglagipentayo nga agbaliwbaliw ti kasasaad. Gapuna, nasayaat no sagpaminsan a sukimatentayo ti mismo a kasasaadtayo ken saantayo nga agur-uray kadagiti nanamnam-ay a kasasaad. (Ecl. 11:4) Maysaka kadi nga agtutubo a nabiit pay a nagturpos iti haiskul? Maysaka kadi a nagannak a dandanin ageskuela ti anakna? Asidegka kadin nga agretiro iti sekular a panggedam? Dagita a panagbalbaliw mabalin nga ikkannaka iti nawaywaya a tiempo, iti kasta makapagserbika kas regular pioneer. Maysa a kabsat a babai a dati nga addaan kadagiti parikut iti salun-at ti nangikeddeng nga agpayunir idi agtawen iti 89. Apay? Gapu ta saan a nayospital iti nasurok a makatawen, nariknana a kabaelannan ti agpayunir.
3. Kasano a nakaaramid dagiti dadduma iti panagbalbaliw tapno makapagserbida kas regular pioneer?
3 Pinanggep ni Pablo a sarungkaran dagiti kakabsatna idiay Corinto. Ngem binaliwanna ti planona maipaay iti naimbag a damag. Adu a regular pioneer ita ti nangaramid kadagiti panagbalbaliw tapno makapagpayunirda. Adda met dagidiay nangpasimple iti panagbiagda nga uray la umdasen ti part-time a trabahoda tapno masuportaran ti amin a kasapulanda gapu ta bassiten ti paggastuanda. Pagragsakanda ti pribilehioda iti panagserbi. (1 Tim. 6:6-8) Adda dagiti agassawa a nangaramid kadagiti panagbalbaliw tapno ti laeng asawa a lalaki ti mangged, iti kasta makapagpayunir ti asawa a babai.
4. Ania ti mabalintayo nga aramiden no saantayo a masigurado a maragpattayo ti makalikaguman nga oras?
4 Saanyo koma a dagus a laksiden ti panagpayunir gapu ta maamakkayo a diyo maragpat ti makalikaguman nga oras. Nasurok la a dua nga oras ti busbosenyo iti inaldaw. No saanyo a masigurado a maaramidyo dayta, padasenyo ti ag-auxiliary pioneer iti maysa wenno dua a bulan nga addaan iti kalat a mangragpat iti 70 nga oras. Mapasaranyonto ti rag-o ti panagpayunir. (Sal. 34:8) Makisaritakayo kadagiti payunir. Mabalin nga adda dagiti dinaeranda a karit nga umasping iti mapaspasaranyo. (Prov. 15:22) Iyararawyo ken Jehova a bendisionanna dagiti panagreggetyo a mangpalawa iti ministerioyo.—1 Juan 5:14.
5. Apay a napateg a kalat ti panag-regular pioneer?
5 Napateg a Kalat: Mangyeg iti adu a bendision ti panagserbi kas regular pioneer. Daytoy ti mangted kadakayo iti dakdakkel a ragsak gapu iti ad-adu a panangtedyo. (Ara. 20:35) Ti panagpayunir parang-ayenna ti abilidadyo a mangusar a siuumiso iti Sao ti Dios. (2 Tim. 2:15) Mangipaay daytoy iti ad-adu a gundaway tapno mapasaranyo ti pannaranay ni Jehova. (Ara. 11:21; Fil. 4:11-13) Ti panagpayunir tulongannakayo met a mangpatanor kadagiti naespirituan a galad, kas iti panagibtur tapno ad-adda a sumingedkayo ken Jehova. (Sant. 4:8) Kabaelanyo kadi ti sumrek iti daytoy a dakkel a ruangan a mangiturong iti panagaramid ket agserbikayo kas regular a pioneer?