Itan ti Tiempo a Panangasaba!

1. Apay nga itan ti tiempo a panangasaba?

¹ “Agbutengkayo iti Dios ket idayawyo.” Babaen ti panangiwanwan dagiti anghel, maidekdeklara daytoy a mensahe “iti tunggal nasion ken tribu ken pagsasao ken ili.” Apay? ‘Agsipud ta dimtengen ti oras ti panangukom ti Dios.’ Agbibiagtayo itan iti dayta nga ‘oras ti panangukom,’ a ti kangitingitanna ket dumtengto inton madadael ti agdama a sistema ti bambanag. Napateg para kadagiti tattao a ‘dayawenda Daydiay nangaramid iti langit ken iti daga ken baybay ken kadagiti ubbog ti dandanum.’ Awanen ti sabali a trabaho a maar-aramid ita nga umasping iti kinapateg wenno kinaganat ti panangideklara iti “agnanayon a naimbag a damag.” Wen, itan ti tiempo a panangasaba!—Apoc. 14:6, 7.

2. Kasano nga ipakpakita dagiti adipen ni Jehova a bigbigbigenda ti kinaganat ti tiempo a pagbibiagantayo?

² Iti napalabas a sangapulo a tawen, nganngani 12 bilion nga oras ti nabusbos dagiti adipen ni Jehova iti panangikasaba ti Pagarian ken panangaramid iti adalan. Adu ti nangaramid kadagiti panagbalbaliw iti biagda tapno ad-adu ti tiempo a mabusbosda iti naespirituan a panagani. (Mat. 9:37, 38) Kas pagarigan, itay napan a tawen, agpromedio iti nasurok a 850,000 nga agibumbunannag ti nagpayunir iti kada bulan. Kadagiti regular pioneer, masapul a mangbusbosda iti promedio a 70 nga oras kada bulan iti trabaho a panangasaba. Kadagiti auxiliary pioneer, 50 nga oras.

3. Ania dagiti panagbalbaliw nga inaramid dagiti agibumbunannag tapno makapagpayunirda?

³ No Ania ti Kasapulan Tapno Makapagpayunir: Gapu ta ammoda a “ti tiempo a nabati ket ababan,” ikagkagumaan dagiti payunir ti agbiag a simple. (1 Cor. 7:29, 31) Kiskissayanda dagiti paggastuanda tapno basbassit ti panawenda a mangged. Kas pagarigan, adda dagidiay immakar iti babbabassit a pagtaengan. Dadduma ti nangipadawat kadagiti di napateg a sanikuada. (Mat. 6:19-21) Kaaduanna, masapul met nga isakripisioda dagiti personal a kalatda. Inaramidda amin dagitoy tapno ad-adu a tiempo ken atension ti mabusbosda iti ministerio. (Efe. 5:15, 16) Buyogen ti kinapinget, panagsakripisio, ken panagtalek ken Jehova babaen ti kararag, adu nga agibumbunannag ti nakaaramid iti praktikal nga eskediul a mangipalubos kadakuada nga agpayunir.

4. Ania dagiti praktikal nga addang a makatulong kenka a mangragpat iti kalat a kinapayunir?

⁴ Makapagpayunirka kadi? Apay a dika agsaludsod kadagiti naballigi a payunir no ania ti inaramidda? Makipagtrabahoka kadakuada iti ministerio iti tay-ak tapno mapadasam ti rag-oda. Usigem dagiti artikulo maipapan iti panagpayunir a nailanad kadagiti publikasiontayo. Mangipasdekka kadagiti praktikal a kalat nga agserbi kas pangrugiam nga agpayunir. No adda dagiti pakalappedam ita nga agpayunir, ikararagmo ken ni Jehova ken dawatem a tulongannaka a mangsolbar kadagita.—Prov. 16:3.

5. Kasano a makatulong ti panagpayunir a mangparang-ay iti abilidadtayo iti ministerio?

⁵ Dagiti Bendision ken Rag-o: Ti panagpayunir parang-ayenna ti abilidadtayo a mangusar iti Sao ti Dios ket dayta ti mangparayray iti rag-otayo. Kinuna ti maysa nga agtutubo a babai a payunir: “Mangyeg iti napaypayso a gunggona no aramatem a siuumiso ti kinapudno ti Sao ti Dios. No payunirka, kanayon nga usarem ti Biblia. Ita, no mamalaybalayak, ammokon no ania a teksto ti maitutop iti tunggal bumalay.”—2 Tim. 2:15.

6. Ania a pannakasanay ti itden ti panagpayunir?

⁶ Isuro met ti panagpayunir ti adu a napateg a paglaingan iti biag. Matulonganna dagiti agtutubo a mangusar a naimbag iti tiempoda, no kasano ti rumbeng a panaggastoda, ken no kasanoda a makilangen kadagiti sabsabali. Adu ti ad-adda a nagmataengan iti naespirituan kas resulta ti panagpayunirda. (Efe. 4:13) Kanayonanna, masansan nga addaan dagiti payunir iti naisangsangayan a pribilehio a makapasar iti tulong ken bendision ni Jehova.—Ara. 11:21; Fil. 4:11-13.

7. Kasano a makatulong ti panagpayunir a mangyadani kadatayo ken Jehova?

⁷ Nalabit maysa kadagiti kadakkelan a bendision nga itden ti panagpayunir ket tulongannatayo nga umadani ken ni Jehova. Daytoy ti mangpabileg kadatayo iti sidong dagiti pannubok. Kinuna ti maysa a kabsat a babai a nangibtur iti nakaro a rigat: “Nakatulong kaniak ti nasinged a relasion ken Jehova a napatanorko babaen ti panagpayunirko.” Kinunana pay: “Maragsakanak unay ta bayat ti kinaagkabannuagko nagserbiak ken ni Jehova iti amin a tiempo. Nausarko ti biagko iti pamay-an a diak pulos ninamnama.” (Ara. 20:35) Sapay koma ta mapasarantayo met dagiti nabaknang a gunggona bayat nga ar-aramidentayo ti kapatgan a trabahotayo a panangasaba.—Prov. 10:22.