Tuladenyo Kadi ti Kinaregta ni Jehova ken Jesus iti Daytoy a Panawen ti Memorial?

1. Ania a naisangsangayan a panagregget ti ar-aramiden dagiti Saksi ni Jehova bayat ti panawen ti Memorial?

¹ Naregta ni Jehova a mangitungpal iti panggepna. Maipapan iti sumagmamano a bendision nga iyeg ti Pagarian ti Dios, kuna ti Isaias 9:7: “Ti mismo a regta ni Jehova ti buybuyot aramidennanto daytoy.” Umasping iti dayta, bayat ti ministeriona ditoy daga, impakita met ti Anak ti Dios ti naisangsangayan a kinaregtana iti pudno a panagdaydayaw. (Juan 2:13-17; 4:34) Iti panawen ti Memorial iti kada tawen, minilion nga agibumbunannag iti intero a lubong ti mangar-aramid iti naisangsangayan a panagregget a mangtulad iti kinaregta ni Jehova ken ni Jesus babaen ti panangpalawada iti pannakiramanda iti ministerio. Maysakanto kadi kadakuada?

2. Ti kinaregta tignayennatayo a mangaramid iti ania mangrugi inton Marso 7?

² Kampania a Panangyawis iti Memorial: Ita a tawen, mangrugi ti kampania a panangyawis iti Memorial inton Sabado, Marso 7. Iplanoyo itan ti makiraman a sireregta iti ministerio. Magagaranto la ketdi dagiti kongregasion bayat nga aktiboda a mangwanas iti teritoriada aginggat’ mabalin. Ikagumaanyo nga awisen dagiti iyad-adalanyo iti Biblia, sarsarungkaran, katrabahuan, kabagian, ken kaeskuelaan babaen ti panangtedyo iti imbitasion wenno panangusar iti jw.org.

3. Kasanotayo a mapalawa ti ministeriotayo bayat ti Marso ken Abril?

³ Panag-auxiliary Pioneer: Ti kinaregta tignayennatayo met a mangpalawa iti ministeriotayo. Awan duadua nga adunto ti ag-auxiliary pioneer iti Marso ken Abril, yantangay mabalintayo a pilien no 30 nga oras ti ragpatentayo. Bayat ti panagdaydayaw ti pamilia wenno personal a panagadalyo, ikararagyo no kasanoyo nga aramiden dayta. (Prov. 15:22) Ti kinaregtayo iti kampania matignayna ti dadduma nga agbalin met a naregta. No mangaramidkayo kadagiti panagbalbaliw tapno ad-adu ti maaramidanyo, tultuladenyo ti kinaregta ni Jesus.—Mar. 6:31-34.

4. Ania dagiti gunggona nga itden ti panangtuladtayo iti kinaregta ni Jehova ken ni Jesus?

⁴ Adu a bendision ti itden ti panangtuladtayo iti kinaregta ni Jehova ken ni Jesus iti daytoy a panawen ti Memorial. Ad-adunto pay a tattao iti teritoriatayo ti makasabaan. Makariknatayto iti rag-o ken pannakapnek nga itden ti panagserbi ken ni Jehova ken iti ragsak nga aggubuay iti panangted. (Ara. 20:35) Kapatgan iti amin, maay-ayotayo ti naregta a Diostayo ken ti Anakna.