Panangparang-ay iti Abilidadtayo iti Ministerio—Panangirugi iti Panangyadal iti Biblia iti Ruangan Babaen ti Broshur a Naimbag a Damag Manipud iti Dios
No Apay a Napateg: Tapno makaaramidtayo iti adalan, masapul nga agbalintayo a mannursuro iti Sao ti Dios. (Mat. 28:19, 20) No usarentayo dagiti alikamen a naited kadatayo, sieepektibo a maisurotayo ti kinapudno. Ti broshur a Naimbag a Damag Manipud iti Dios ket nadisenio a tumulong kadatayo a mangisuro iti kinapudno iti sabsabali. Kinapudnona, mabalintayo nga usaren dayta a mangirugi iti panangyadal iti Biblia iti damo a pannakisarita iti bumalay uray iti mismo a ruangan ti pagtaenganna.
Padasenyo Ita a Bulan:
Ikararagmo a maaddaanka iti tarigagay a mangyadal iti Biblia. Agpatulongka met ken Jehova a makairugi iti panangyadal iti Biblia ken agbalinka nga epektibo a mannursuro iti kinapudno.—Fil. 2:13.
Bayat ti panagdaydayaw ti pamiliayo wenno personal a panagadal, ikagumaam a kabesaduen ti presentasion. Iti kasta, naturturedka nga agsao ken makairugika iti panangyadal iti Biblia iti ruangan bayat nga addaka iti ministerio.