Agsursuro Kadagiti Aduan Kapadasan nga Agibumbunannag
Ipatpategtayo unay dagiti aduan kapadasan nga agibumbunannag iti kongregasion. Sumagmamano kadakuada ti simamatalek nga agserserbi ken Jehova iti adun a tawen. Mabalin a dadduma ti nabiit pay a nasanay nga agbalin a mas epektibo iti ministerio. Nakita dagitoy nga agibumbunannag no kasano nga inwanwan ni Jesus ti kongregasion Kristiano kadagitoy maudi nga al-aldaw babaen ti panagsaknap ti trabaho a panangasaba ken panangaramid iti adalan. (Mat. 28:19, 20) Immawatda iti “pannakabalin a nalablabes ngem ti gagangay” no maipasangoda kadagiti karit ken pakasuotan gapu ta makiramramanda iti ministerio. (2 Cor. 4:7) Adu ti masursurotayo kadagitoy a nasuboken nga agibumbunannag. No adda gundawayda, maragsakanda a mangiranud iti sabsabali kadagiti nasursuroda. (Sal. 71:18) Gapuna, gundawayantayo koma ti makasursuro kadakuada. Kasano?
Iti Ministerio. Kasapulan a masanay dagiti kabbaro wenno bassit pay ti kapadasanna nga agibumbunannag tapno agbalinda nga epektibo iti ministerio. Dakkel ti maitulong ti panangpaliiwda kadagiti nataengan iti naespirituan no kasanoda nga itungtungpal ti ministerioda. (Kitaenyo ti Pebrero 15, 2015 a Pagwanawanan, ti artikulo nga “Itultuloymo ti Regtam iti Ministerio,” maikatlo a parapo iti subtitulo a “Tulongam Dagiti Kabbaro.”) Kasanoka a nabenepisiaran iti pannakikaduam kadakuada iti ministerio?
Mabalin kadi a makitulagka iti aduan kapadasan nga agibumbunannag nga agkaduakayo iti ministerio? No masakit ti agibumbunannag, mabalin a sagpaminsan nga iti pagtaenganna ti pagadalanyo iti maysa kadagiti iyad-adalam iti Biblia. Kalpasan ti panagadal, damagem iti agibumbunannag no ania dagiti napaliiwna ken no ania ti maibalakadna.
Makilangen Kadakuada: Am-ammuenyo a naimbag dagiti aduan kapadasan nga agibumbunannag babaen ti pannakilangen kadakuada. Awisenyo ti maysa kadakuada iti panagdaydayaw ti pamiliayo ken damagenyo dagiti kapadasanna. No masakit ti agibumbunannag, mayurnosyo kadi nga iti pagtaenganna ti pakaaramidan ti panagdaydayaw ti pamiliayo? Ammuenyo no kasano a naammuanna ti kinapudno. Ania dagiti bendision a naawatna? Ania dagiti nakitana a panagrang-ay? Ania dagiti tinagiragsakna iti panagserbina ken Jehova?
Agbalintayo koma a mannakaawat iti kabaelan ken maipaay a tulong dagiti aduan kapadasan a kakabsat. Kas kadatayo, nagduduma ti paglainganda iti ministerio. (Roma 12:6-8) Dadduma ti nataenganen ken daytoy ti mabalin a manglimitar iti kaadu ti tiempoda a makilangen kadatayo. Nupay kasta, adu ti masursurotayo kadakuada gapu kadagiti kapadasanda bayat a simamatalek nga agserserbida ken Jehova.