Kanayon a Sipapanunot iti Panagaramid iti Adalan
1. Ania ti kasapulan tapno maisalakan dagiti tattao?
1 Ipakita ti report iti 2014 a tawen serbisio ti kinaregta dagiti adipen ti Dios ken ti determinasionda a mangikasaba iti naimbag a damag iti Pagarian. (Mat. 24:14) Babaen ti panagbalaybalay, espesial a kampania a panagiwaras kadagiti tract ken imbitasion, ken ti panangasabatayo iti publiko, ad-adu itan a tattao ti pakaidandanonan ti mensahe ti Biblia. Ngem tapno maisalakan dagitoy nga indibidual, masapul a tulongantayo ida nga agbalin nga adalan ni Jesus babaen ti panangyadaltayo kadakuada iti Biblia.—1 Tim. 2:4.
2. Ania dagiti makatulong a saludsod tapno kanayon a sipapanunottayo a mangitukon iti panangyadal iti Biblia?
2 Kanayon a Sipapanunot a Mangitukon iti Panangyadal iti Biblia: No adda nakasaritayo a nangipakita iti interes, al-alaenyo kadi ti impormasion a pangkontakan kenkuana ken dagus a sublianyo a ti panggepyo ket mairugi ti panangyadal iti Biblia? Kaano ti naudi a panangidemostrayo iti panangyadal iti Biblia iti damo a pannakisaritayo? Kaano ti naudi a panangitukonyo iti panagadal iti Biblia kadagiti regular nga ik-ikkanyo iti magasin? Impabuyayo kadin dagiti video nga Apay nga Adalem ti Biblia? ken Kasano ti Panagadal iti Biblia? kadagiti katrabahuan, kaeskuelaan, kaarruba, kabagian, ken dadduma pay a makalanglangenyo? No adda dagiti mangala iti publikasion a maus-usar iti panagadal manipud iti pagidispleyan kadagiti literatura, ibagbagayo kadi kadakuada nga adda met libre a panagadal iti Biblia?
3. Ania ti kasapulan tapno naballigi a maisurotayo ti kinapudno?
3 Tulong Manipud ken Jehova ken ni Jesus: Inrugi ni Jesus ti bilinna a ‘mangaramid iti ad-adalan’ babaen ti sao nga “inkayo.” Ipaspasimudaag ni Jesus a kasapulantayo ti panangikagumaan ken panagtignay. Nupay kasta, saannatayo a baybay-an no di ket inkarina nga isu ket adda kadatayo. (Mat. 28:19, 20) Kanayonanna, ipapaay ni Jehova ti nasantuan nga espirituna kasta met dagiti alikamen ken pannakasanay a kasapulantayo a mangisuro iti kinapudno kadagiti tattao. (Zac. 4:6; 2 Cor. 4:7) Mabalintayo nga ikararag ‘agpadpada ti tarigagay ken panagtignay’ a makiraman iti daytoy nakapatpateg a trabaho.—Fil. 2:13.
4. Apay a masapul a kanayon a sipapanunottayo iti panagaramid iti adalan?
4 Mangyeg iti napalalo a ragsak ti panangikasabatayo iti naimbag a damag. Ngem ad-adda pay ti ragsaktayo no maisurotayo ti kinapudno iti maysa a tao ken matulongantayo a makikadua iti “dalan nga agturong iti biag.” (Mat. 7:14; 1 Tes. 2:19, 20) Napatpateg pay, no kanayon a sipapanunottayo iti panagaramid iti adalan, maparagsaktayo ni Jehova ta “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.”—2 Ped. 3:9.