Sisasagana a Mangitukon iti Panangyadal iti Biblia
1. Ania ti ramanen ti panangitungpal iti annongen nga inted kadatayo ni Jesus iti Mateo 28:19, 20?
1 Inikkannatayo ni Jesus iti annongen a ‘mangaramid iti ad-adalan ken isurotayo ida.’ (Mat. 28:19, 20) Gapuna, kayattayo ti agsagana a kanayon a mangitukon iti panangyadal iti Biblia, saan laeng nga iti maysa a Sabado wenno Domingo a nailatang para iti panangitukon iti panangyadal iti Biblia. Mabalin a makatulong dagiti sumaganad a singasing.
2. Siasino dagiti mabalintayo nga itukonan iti panangyadal iti Biblia?
2 Itukontayo: Dakdakkel ti posibilidadna a makabiroktayo iti mayadalan no masansan nga itukontayo ti panangyadal iti Biblia. (Ecl. 11:6) Napadasanyo kadin ti direkta a pamay-an? Ti maysa a kongregasion iti Estados Unidos sangsangkamaysa nga inkagumaanda nga aramiden daytoy iti makabulan. Anian a ragsakda ta nakairugida iti 42 a kabbaro a panangyadal iti Biblia! Saanyo a panunoten nga ammo dagiti interesado a masarakanyo a kayatyo nga iyadalan ida iti Biblia. Inton sarungkaranyo ida, nasayaat no itukonyo ti panangyadal iti Biblia. Saan a problema no saanda a kayat nga awaten dayta. Mabalinyo latta a parayrayen ti interesda. Pinadasyo kadin a dinamag kadagiti kaarruba, kabagian, katrabahuan, ken kaeskuelayo no kayatda ti agpayadal iti Biblia? Mabalinyo met a damagen iti iyad-adalanyo no adda gagayyem ken kakabagianna a kayatna ti agpayadal.
3. Ania nga alikamen ti makatulong iti panangirugi kadagiti panangyadal iti Biblia, ken kaano a mausartayo dayta?
3 Makatulong nga Alikamen: Makatulong iti panangirugi kadagiti panangyadal iti Biblia ti tract a Kayatmo Kadi a Maammuan ti Kinapudno? Mabalinyo nga ited daytoy kadagiti bumalay, umawatda man wenno saan iti sabali a literatura. Mabalin nga usaren daytoy no mangasabakayo iti lugar ti negosio, iti lansangan, no mangasabakayo babaen ti surat, ken no agsarungkarkayo. Mabalinyo met nga ibati daytoy kadagiti pagtaengan nga awan dagiti bumalayna. Nasayaat no mangitugotkayo iti kastoy a tract no agbibiahekayo, no aggatgatangkayo, wenno no addakayo iti pagtrabahuanyo. Ti makinlikud a panid ilawlawagna iti apagbiit ti urnos mainaig iti panangyadal iti Biblia ken iruanganna ti libro nga Isursuro ti Biblia.
4. Kasanotayo nga usaren ti tract a Kayatmo Kadi a Maammuan ti Kinapudno? iti panangirugi iti panangyadal iti Biblia?
4 Kalpasan a maipaimayo ti tract, mabalinyo a dakamaten dagiti saludsod iti umuna a panid sa isaludsodyo, “Ania kadagitoy a saludsod ti ad-adda a paginteresanyo?” Kalpasanna, usigenyo a dua ti sungbat iti mismo a tract sa basaen wenno ibagayo iti bukodyo a sasao ti nailanad iti maudi a panid, a nakailawlawagan ti urnos mainaig iti panangyadal iti Biblia. Mabalinyo nga ipakita kenkuana ti ad-adu pay nga impormasion maipapan iti dayta a topiko a masarakan iti libro nga Isursuro ti Biblia, itukonyo ti libro, sa makitulagkayo no kaanokayo nga agsubli tapno itultuloyyo ti saritaanyo.
5. Apay a rumbeng a sisasaganatayo a kanayon a mangitukon iti panangyadal iti Biblia?
5 Adda pay laeng dagiti tattao iti teritoriatayo a mayat a mangammo no ania a talaga ti isursuro ti Biblia. No kanayon a sisasaganatayo a mangitukon iti panangyadal iti Biblia, ad-adu ti gundaway a masagraptayo ti rag-o nga itden ti panangtulong kadagiti sabsabali a magna iti dalan nga agturong iti biag.—Mat. 7:13, 14.