Adda Baro nga Alikamentayo a Mangirugi iti Panagadal iti Biblia!
1 Napeklan a Romano Katoliko ti maysa nga Amerikana. Indepensana dagiti sursuro ti simbaan. Nagperegrino pay idiay Vatican. Ngem idi kinasabaan ti maysa a Saksi ni Jehova iti pagtaenganna, immannugot nga agpayadal iti Biblia. Apay? Gapu ta kayatna a maadal ti linaon ti Biblia ken awan ti panagadal iti Biblia nga ituktukon ti simbaanda. Ania ti isurona kadatayo daytoy a kapadasan? Ipakitana a ditay ammo no asino ti posible nga umawat iti libre a panagadal iti Biblia.—Ecl. 11:6.
2 Nagpangaduakayo kadin a mangibaga kadagiti tattao a sidadaantayo a mangyadal iti Biblia iti siasinoman nga interesado? Ammo kadi ti tunggal maysa iti lugaryo nga ituktukontayo daytoy libre a panagadal? Kasanotay a masigurado nga ammoda? Babaen ti panangusar iti baro nga alikamen! Maysa daytoy a makaatrakar, innem ti panidna a tract a napauluan iti Kayatyo Kadi a Maammuan ti Ad-adu Pay Maipapan iti Biblia? Intay usigen daytoy a tract, subtema por subtema.
3 “Apay a Basaenyo ti Biblia?” Makaguyugoy dagiti rason a dinakamat ti tract. Ibagana a naglaon ti Biblia “iti naayat nga instruksion a naggapu iti Dios,” a mangipakita no kasano ti agpatulong kenkuana babaen ti kararag, ken no kasano a masagrap ti sagutna a biag nga agnanayon. (1 Tes. 2:13) Dakamaten ti tract ti nadumaduma a “kinapudno [a linaon ti Biblia] a manglawlawag,” kas koma no ania ti mapasamak no mataytayo ken no apay a nakaad-adu ti riribuk ditoy daga. Deskribirenna “dagiti nadiosan a prinsipio nga adda iti Biblia” a no mayaplikar, mangyegda iti pisikal a gunggona ken mangpatanor iti ragsak, namnama, ken dadduma pay a makaay-ayo a galad. Dakamaten ti tract ti maysa pay a makagapu a basaen ti Biblia—dagiti padto a mangipakita no ania ti agur-uray kadatayo iti masanguanan.—Apoc. 21:3, 4.
4 “Katulongan a Mangtarus iti Biblia”: Kuna ti tract: “Kasapulantay amin ti tulong a mangtarus iti Sao ti Dios.” Kalpasanna, deskribirenna ti pamay-antayo a mangyadal iti Biblia: “Gagangay a ti agtultuloy a panagadal iti Biblia ti kasayaatan. Marugian dayta babaen kadagiti pamunganayan a pannursuro.” Nupay nalawag a kunaenna a “ti Biblia ti gubuayan ti umiso nga impormasion,” espesipiko a tukoyen ti tract ti Kalikaguman a broshur kas maysa a banag a makatulong iti estudiante a “mangtarus kadagiti naisitar a Kasuratan maipapan iti nadumaduma a tema.” Mangibangon iti mamagpanunot a saludsod ti sumaganad a subtema.
5 “Kayatyo Kadi ti Mangbusbos iti Panawen iti Kada Lawas Tapno Matarusanyo ti Biblia?” Ilawlawag ti tract a mabalin nga iyurnos ti panagadal iti Biblia iti tiempo ken lugar a kombiniente iti estudiante, iti pribado a pagtaenganna man wenno iti telepono. Asino ti mabalin a makiraman iti panagadal? Sumungbat ti tract: “Ti intero a pamiliayo. Mabalin met a makipaset ti siasinoman a gagayyemyo a kayatyo nga awisen. Wenno no kayatyo, mabalin a dakayo laeng.” Kasano kaunday ti panagadal ti maysa? Kunana: “Adu ti mangituding iti maysa nga oras tapno agadalda iti Biblia iti kada lawas. No ad-adu wenno basbassit ti tiempoyo iti kada lawas, sidadaan dagiti Saksi a tumulong kadakayo.” Dayta ti napateg a banag! Sidadaantayo a makibagay iti kasasaad ti tunggal estudiante.
6 “Awis nga Agadal”: Adda kupon a mabalin a pangisuratan ti nakaawat iti tract no agkiddaw iti Kalikaguman a broshur wenno maysa nga isasarungkar tapno mailawlawag ti urnostayo a libre a panangyadal iti Biblia. De-kolor ti akkub ti Kalikaguman a broshur. Dagita ti rason no apay a maguyugoy ti tract ti ad-adu a napasnek a tattao nga umawat iti tulongtayo. Ita, ania ti kasayaatan a pamay-an a mausartayo daytoy baro nga alikamen?
7 Asino ti Mabalin a Tukonan iti Tract? Mabalin nga ipaima ti tract kadagiti tattao a makasaritatayo wenno ibati kadagiti pagtaengan nga awan nadanon a bumalay. Mabalin nga iwaras iti binalaybalay, iti lansangan, ken iti lugar ti negosio. Itukonyo kadagiti tattao, nagalada man iti literaturatayo wenno saan. Iragpinyo kadagiti magasin wenno aniaman a publikasion nga ipaima. Isigpityo no adda suratanyo. Itukonyo a patulodan dagidiay nakasabaanyo iti telepono. Kanayon a mangitugot kadagiti kopia a mabalinyo nga iwaras no mapankayo makitienda, no aglugan, ken no di pormal a mangasaba. Itedyo iti asinoman a bisitayo. Itukonyo kadagiti kabagian, kaarruba, katrabahuan, kaeskuelaan, ken dadduma pay nga am-ammoyo. Ikagumaanyo nga ipaima daytoy a tract iti amin a makasaritayo! Ania ngay ti sumaruno?
8 No Adda a Dagus ti Aginteres: Dadduma a tattao ti aginteres a dagus babaen ti panangikunada a kayatda ti agpayadal iti Biblia. Tunggal mangasaba ngarud, siguraduen nga agawit iti dua a kopia ti Kalikaguman a broshur—maysa para iti estudiante ken maysa para kadakayo. No kayat ti interesado, rugianyon ti panagadal iti dayta met laeng a kanito. Kitaenyo ti maikadua a panid, ket basaenyo ti “No Kasano nga Usaren Daytoy a Broshur.” Kalpasanna, mapankayo a dagus iti leksion 1, ket idemostrayo ti panagadal. Nalaka daytoy, saan kadi?
9 No Kasapulan ti Nakasaritayo ti Tiempo nga Agpanunot: Diyo baybayagen ti agsubli. No sarungkaranyo, siguraduenyo nga adda awityo a Kalikaguman a broshur. Ipakitayo kenkuana ti listaan dagiti linaonna iti maikadua a panid. Pagpilienyo iti suheto a paginteresanna unay. Luktanyo dayta a panid, ken pagsaritaanyo ti pinilina a leksion.
10 Panangsarungkar Kadagiti Napaimaan iti Magasin: No naipaimayo ti tract a kadua ti dadduma a magasin, mabalin a kastoy ti ibagayo no agsarungkarkayo: “Iti naudi a panagsaritata, naragsakanak a nangibati iti kopia ti Pagwanawanan a magasin. Nalabit nadlawmo a ti kompleto a paulo daytoy a magasin ket Ti Pagwanawanan Mangibumbunannag iti Pagarian ni Jehova. Kayatko nga ilawlawag ita no ania dayta a Pagarian ken no ania ti kaipapananna kadakayo ken iti pamiliayo.” Sayo luktan ti Kalikaguman a broshur iti leksion 6. Mangrugi iti umuna a parapo, basaen ken pakisaritaanyo dayta depende iti waya ti bumalay. Kalpasanna, iyurnosyo ti agsubli iti sabali nga aldaw tapno ileppas ti leksion.
11 Dikay Koma Maibusan iti Tract: Siguraduen koma ti manangaywan iti serbisio ken dagiti kakabsat a mangas-asikaso iti literatura nga adda a kanayon ti umdas a suplay ti Ammuenyo ti Biblia a tract iti kongregasion. Mangikabilkayo iti sumagmamano a tract iti bulsa wenno pitakayo, iti lugan, pagtrabahuan, eskuelaan, asideg ti ridaw ti pagtaenganyo—iti sadinoman a kombiniente a pangikabilan kadagita. Siempre, mangikabilkayo met iti bagyo tapno usarenyo kadagiti gundaway nga adda makasaritayo maipapan iti Biblia.
12 Bendisionan Koma ni Jehova ti Panagreggettayo: Ti nasayaat a kalat ti amin a Kristiano isu ti panangisuro iti kinapudno iti sabali a tao. (Mat. 28:19, 20) Adda kadi iyad-adalanyo iti Biblia? No adda, mabalin kadi nga agnayonkayo iti maysa pay a mayadalan iti linawas nga eskediulyo? No awan ti iyad-adalanyo, sigurado a kayatyo ti maaddaan. Ikararagyo ken Jehova a bendisionanna koma ti panagreggetyo a makabirok iti iyadalanyo. Sa agtignaykayo maitunos iti dayta a kararag.—1 Juan 5:14, 15.
13 Adda baro nga alikamentayo a mangirugi kadagiti panagadal! Adalenyo a naimbag dayta. Mangipaimakayo iti adu a kopia. Pagreggetanyo ti ‘agaramid iti naimbag, nga agbalin a nabaknang iti nasayaat nga ar-aramid, nga agbalin a naparabur, sisasagana a mangiranud’ iti naadalyo iti Sao ti Dios.—1 Tim. 6:18.
[Kahon iti panid 4]
DAGITI GUNDAWAY A MAIPAIMA TI TRACT
◼ Iti inaldaw a pannakisarita
◼ No adda immawat iti literaturatayo
◼ No awan ti bumalay
◼ No agsarungkar
◼ No adda makasabaan iti lansangan
◼ No mangasaba iti lugar ti negosio
◼ No di pormal a mangasaba
◼ No agsurat
◼ No nakalugan
◼ No adda bisitatayo
◼ No kapatang dagiti kabagian, kaarruba, katrabahuan, kaeskuelaan, ken dadduma pay nga am-ammo