No Kasano a Danonen ti Puso Dagiti Sursuruantayo
1. Ania ti epekto ti pannursuro ni Jesus iti puso dagiti dimngeg kenkuana?
1 Dinanon ni Jesu-Kristo ti puso dagiti dimngeg kenkuana. Iti naminsan, ‘rimmayray’ ti puso dagiti adalanna apaman a nailawlawagna a naimbag ti Kasuratan. (Luc. 24:32) Gapu ta masapul a naimpusuan ti panagtulnog iti Dios, kasanotayo ngarud a gutugoten ti rikna dagidiay sursuruantayo tapno matignayda nga agbalbaliw?—Roma 6:17.
2. Ania ti maitulong ti kinataktika ken pannakaawat tapno madanon ti puso ti maysa a tao?
2 Agbalin a Nataktika ken Mannakaawat: Saan a magutugot nga agtignay ti adu a tattao iti basta panangibaga kadakuada no ania ti umiso ken dakes. Kinaagpaysuanna, no atakarentayo dagiti patpatienda babaen iti adu a teksto iti Biblia, mabalin a didanton kayat ti makisarita kadatayo. Tapno magutugottayo ti maysa a tao, masapul a maawatantayo nga umuna no apay a kasta ti patpatien ken tigtignayna. Makatulong ti kinataktika ken mamagpanunot a saludsod tapno mayebkasna ti kapanunotanna. (Prov. 20:5) Iti kasta, makapilitayo iti impormasion manipud iti Sao ti Dios a mangtignay iti pusona. Isu a masapul nga ipakitatayo ti personal nga interes ken kinaanus. (Prov. 25:15) Laglagipentayo a saan nga agpapada ti naespirituan a panagrang-ay ti tunggal indibidual. Palubosanyo a ti nasantuan nga espiritu ni Jehova ti mangimpluensia iti pampanunot ken tigtignayda.—Mar. 4:26-29.
3. Kasanotayo a matulongan dagidiay sursuruantayo a mangpatanor kadagiti nasayaat a galad?
3 Tulongan Ida a Mangpatanor Kadagiti Nasayaat a Galad: Makatulong kadagiti sursuruantayo dagiti salaysay iti Biblia a mangipakita iti kinaimbag ken ayat ni Jehova tapno mapatanorda dagiti nasayaat a galad. Mabalintayo nga usaren dagiti teksto a kas iti Salmo 139:1-4 wenno Lucas 12:6, 7 tapno maipakitatayo ti kadakkel ti personal nga interes ti Dios iti tunggal maysa kadatayo. No maapresiar dagitoy a tattao ti di kaikarian a kinamanangngaasi ni Jehova, bumileg ti ayat ken debosionda kenkuana. (Roma 5:6-8; 1 Juan 4:19) Maysa pay, no maadalda a ti konduktada ket adda epektona ken Jehova, matignayda nga agbiag maitunos iti pakaidayawan ken pakaay-aywan ti Dios.—Sal. 78:40, 41; Prov. 23:15.
4. No mangisurotayo kadagiti tattao iti ministerio, kasanotayo a maipakita ti panagraem iti wayawaya ti maysa a tao nga agpili?
4 Saan a pilpiliten ni Jehova ti siasinoman nga agtulnog kadagiti bilinna. Imbes ketdi, gutgutugotenna dagiti tattao babaen ti panangipakitana iti pagsayaatan ti panangsurot iti balakadna. (Isa. 48:17, 18) Matuladtayo ni Jehova no isurotayo dagiti tattao iti pamay-an a makatulong kadakuada a mangaramid iti bukodda a desision. No maamirisda nga adda masapul a balbaliwanda iti biagda, mangyeg dayta iti manayon a resulta. (Roma 12:2) Ad-adda pay a sumingedda ken Jehova, ti “manangsukimat kadagiti puso.”—Prov. 17:3.