Mabalinmo a Paregtaen ti Di Aktibo a Kristiano

Inton Martes, Abril 11, adu a di aktibo a Kristiano ti umatender iti Memorial. Inrugida ti nagtaray iti lumba ti biag ngem bimmannayatda gapu iti agduduma a rason, a dadduma kadagita ti naibaga iti broshur nga Agsublika ken Jehova. (Heb 12:1) Ngem dagiti di aktibo ket napateg latta ken Jehova, ti nanggatang kadakuada babaen iti dara ti Anakna. (Ara 20:28; 1Pe 1:18, 19) Kasano a matulongantayo ida nga agsubli iti kongregasion?

Kas iti pastor a mangikagkagumaan a mangbirok iti karnero a napukaw ken naisina iti arban, siaanep a birbiroken dagiti panglakayen dagiti di aktibo a Kristiano. (Lu 15:4-7) Makita iti dayta ti naayat a panangaywan ni Jehova. (Jer 23:3, 4) Saan la a dagiti panglakayen ti mabalin a mangparegta kadagiti di aktibo no di ket amintayo. Dagiti panagreggettayo a mangipakita iti kinaimbag ken pannakipagrikna ket makaay-ayo ken Jehova ken mangyeg iti bendision. (Pr 19:17; Ara 20:35) Gapuna, panunotem no asino ti mabalinmo a paregtaen, ken aramidem a dagus dayta!

BUYAEN TI VIDEO A PAREGTAENYO DAGITI DI AKTIBO, SA PAGSASARITAAN DAGITOY A SALUDSOD:

• Ania ti inaramid ni Abbey idi nakasaritana ti maysa a Saksi a dina am-ammo?

• Apay a masapul nga asitgantayo dagiti panglakayen no pampanunotentayo a tulongan ti maysa a di aktibo?

• Kasano a nagsagana ni Abbey iti maikadua a panangbisitana ken Laura?

• Kasano nga impakita ni Abbey ti determinasion, anus, ken ayatna bayat nga ikagkagumaanna a paregtaen ni Laura?

• Ania ti maadaltayo iti ilustrasion ni Jesus iti Lucas 15:8-10?

• Ania dagiti bendision a resulta ti panagtitinnulong dagiti kakabsat a mangtulong ken Laura?