Agsagsaganaka Kadi Para iti Memorial?

Nakapatpategto ti maudi a Paskua ni Jesus. Dandanin ti ipapatayna, isu nga implanona a kaduana dagiti apostolna iti pannangan iti Paskua. Irugina met ti Pangrabii ti Apo a tinawento a maselebraran. Isu nga imbaonna da Pedro ken Juan nga isaganada ti kuarto a pagselebraranda. (Lu 22:7-13; kitaen ti ladawan iti akkub.) Ipalagip daytoy kadatayo a masapul nga agsaganatayo para iti Memorial inton Marso 27. Mabalin nga addan dagiti urnos a naaramid ti kongregasion para iti ispiker, dagiti emblema, ken dadduma pay. Ngem ania ti aramiden ti tunggal maysa kadatayo tapno makapagsagana para iti Memorial?

Isaganam ti pusom. Basaem ken utobem dagiti nayeskediul a panagbasa iti Biblia iti Memorial. Makita ti eskediul iti Panangsukimat iti Kasuratan iti Inaldaw. Adda iti Apendise B12 ti rebisado a Baro a Lubong a Patarus ti Nasantuan a Kasuratan ti mas detalyado nga eskediul. (Kitaem met ti Abril 2020 a Workbook iti Gimong a Panagbiag ken Ministerio.) Mabalin nga agbirok dagiti pamilia iti material a mangilawlawag iti kinapateg ti subbot nga adalenda iti panagdaydayaw ti pamiliada iti Watch Tower Publications Index wenno iti Giya iti Panagsukimat Para Kadagiti Saksi ni Jehova.

Awisen ti dadduma nga umatender. Makiramanka iti intero a kampania iti panagiwaras iti imbitasion. Panunotem dagiti mabalinmo nga awisen, kas kadagiti sarsarungkaram, dati nga iyad-adalam, am-ammom, ken kabagiam. Siguraduen koma dagiti panglakayen nga awisenda dagiti di aktibo. Tandaanam a no adda iti sabali a lugar ti inawismo, mabalinmo a kitaen ti oras ken lokasion ti Memorial iti paggigiananna babaen ti panangi-click-mo iti tab a MAIPAPAN KADAKAMI iti ngato ti home page ti jw.org/ilo sa pilien ti “Memorial.”

Ania pay ti mabalin nga aramidentayo tapno makapagsagana?