Dagiti Makatulong a Feature ti Agbiagka a Naragsak iti Agnanayon!

Magusgustuam kadi nga usaren dagiti video ken dagiti mamagpanunot a saludsod iti libro nga Agbiagka a Naragsak iti Agnanayon!? Dagiti ngay feature a “Kuna ti Dadduma,” “Padasem Daytoy,” ken “Agdiskobreka Pay”? Ania ti dadduma pay a feature a mabalin a makatulong iti pannakiramanmo iti trabaho a panagaramid iti adalan?—Mt 28:19, 20.

Media: No kaykayatmo nga usaren ti nayimprenta a libro a mangyadal iti Biblia, kasanom a makita a dagus ti amin a video ken media iti maymaysa a lugar? Iti elektroniko a kopia ti libro, piliem ti maysa kadagiti uppat a kangrunaan a seksion. Iti baba ti amin a paulo ti leksion, mabalinmo a pilien ti amin a media para iti dayta a seksion. (Kitaen ti ladawan 1.)

Setting a “Printed Edition”: No agus-usarka iti gadyet iti panangyadalmo, mabalin a makatulong ti sagpaminsan a panangusarmo iti setting a “Printed Edition.” Bayat a nakalukat ti ad-adalenyo a leksion, i-tap-mo ti tallo a dot iti toolbar iti makinngato a paset ti panid sa piliem ti “Printed Edition.” Mabalin a makatulong daytoy a layout tapno nalawag iti panunotmo no ania ti koneksion ti material a pagsarsaritaanyo iti pakabuklan a tema dayta a leksion. Tapno makasublika iti digital edition, i-tap-mo manen ti tallo a dot sa piliem ti “Digital Edition.”

“Nakasaganaak Kadin?”: Ipakita dagiti kahon iti dandani pagpatinggaan ti libro dagiti kangrunaan a kualipikasion para iti panangasaba a kadua ti kongregasion ken panagpabautisar. (Kitaen ti ladawan 2.)

Dagiti Endnote: Makita ditoy dagiti kanayonan a pannakailawlawag maipapan kadagiti espesipiko ken importante a topiko. Iti digital a bersion, adda dagiti link iti baba ti tunggal endnote a mangisubli kenka iti parapo a nagsardengam iti leksion. (Kitaen ti ladawan 2.)