Ipatpategnaka ti Dios
NAGLAON ti Biblia kadagiti kasayaatan a balakad gapu ta naggapu dayta iti Dios. Saan a libro iti medisina ti Biblia, ngem mangted kadagiti makatulong a pamay-an tapno makayatayo dagiti makapaupay a situasion, nagulo a taray ti panunot, nasaem a rikrikna, ken makapaliday a problema iti pisikal ken mental a salun-at.
Kapatgan iti amin, ipaspasigurado ti Biblia a ti Namarsua kadatayo, ni Jehova Dios,a adayo a mas maawatanna ti pampanunot ken rikriknatayo ngem iti asinoman. Magagaran a tumulong kadatayo aniaman a problema ti pakaipasanguantayo. Kas pagarigan, kitaem ti dua a makaliwliwa a teksto iti Biblia:
“Asideg ni Jehova kadagiti nasaktan ti pusoda; isalakanna dagidiay nadudog ti espirituda.”—SALMO 34:18.
“Siak, ni Jehova a Diosmo, ig-iggamak ti kannawan nga imam, Daydiay mangibagbaga kenka, ‘Dika agbuteng. Tulongankanto.’”—ISAIAS 41:13.
Kasanonatayo a tultulongan ni Jehova a mangsango kadagiti problematayo iti mental a salun-at? Kas maammuamto kadagiti sumarsaruno nga artikulo, ipakpakita ni Jehova iti adu a pamay-an a talaga nga ipatpategnatayo.
a Jehova ti nagan ti Dios.—Salmo 83:18.