Itultuloymo ti Agannad Tapno Dika Masulisog

1-2. (a) Ania ti impakdaar ni Jesus kadagiti adalanna? (b) Apay a dagiti adalan binaybay-anda ni Jesus? (Kitaen met dagiti ladawan.)

“MAGAGARAN ti espiritu, ngem nakapuy ti lasag.”a (Mat. 26:41b) Ipakita dagita a sasao ni Jesus a maaw-awatanna ti kinaimperpektotayo. Ngem imbagana met dayta tapno pakdaarannatayo: Liklikantayo ti sobra a panagtalek iti bagi. Sumagmamano nga oras sakbay nga imbaga dagita ni Jesus, inkari dagiti adalanna a dida pulos baybay-an ti Apoda. (Mat. 26:35) Nasayaat met ketdi ti motiboda. Ngem saanda a naamiris a nalakada laeng gayam a kumapuy no maipasangodan iti narigat a situasion. Isu nga impakdaar ni Jesus kadakuada: “Itultuloyyo ti agbantay ken itultuloyyo ti agkararag, tapno saankayo a masulisog.”—Mat. 26:41a.

² Makapaladingit ta saan a nakapagtultuloy nga agbantay dagiti adalan. Idi naaresto ni Jesus, saanda kadi a pinanawan wenno nagpapanawda gapu iti butengda? Gapu ta saanda a nagtultuloy a nagannad, inaramid ketdi dagiti adalan ti imbagada a dida pulos aramiden—binaybay-anda ni Jesus.—Mat. 26:56.

3. (a) Tapno agtalinaedtayo a napudno ken Jehova, apay a masapul a liklikantayo ti sobra a panagtalek iti bagi? (b) Ania dagiti pagsasaritaantayo iti daytoy nga artikulo?

³ Masapul a ditay ipagarup a kanayon a naturedtayo a mangaramid iti umiso. Agpayso a determinadotayo a saan a mangaramid iti aniaman a mangpagura ken Jehova. Ngem imperpektotayo met, ket nalakatay laeng a masulisog nga agbasol. (Roma 5:12; 7:​21-23) Mabalin nga adda dagiti gundaway a ditay ekspektaren a masulisogtayo nga agaramid iti di umiso. Tapno agtalinaedtayo a napudno ken Jehova ken iti Anakna, masapul a surotentayo ti imbalakad ni Jesus nga itultuloytayo ti agannad tapno ditay masulisog. Matulongannatayo daytoy nga artikulo a mangaramid iti dayta. Umuna, ammuentayo dagiti situasion a masapul a pagannadantayo. Kalpasanna, pagsasaritaantayo no kasano a protektarantayo ti bagitayo iti sulisog. Kamaudiananna, pagsasaritaantayo no kasanotayo a makapagtultuloy nga agannad.

DAGITI SITUASION A MASAPUL A PAGANNADANTAYO

4-5. Apay nga itultuloytayo ti agannad uray kadagiti babassit a basol?

⁴ Uray dagiti babassit a basol mabalin a pakapuyenda ti relasiontayo ken Jehova. Mabalin met a dagita ti mangiturong kadatayo nga agaramid kadagiti nadagdagsen a basol.

⁵ Masulisogtayo amin nga agbasol. Ngem agduduma ti pagkapuyantayo. Mabalin nga adda dagiti matnag iti serioso a basol, narugit nga ar-aramid, wenno maimpluensiaan iti nailubongan a panagpampanunot. Kas pagarigan, baka lablabanan ti maysa ti tendensia nga agaramid iti seksual nga immoralidad. Mabalin nga adda met manglablaban kadagiti narugit nga ar-aramid a kas iti masturbasion wenno panagbuya iti pornograpia. Mabalin a lablabanan met ti maysa ti kinamanagpungpungtot, kinapannakkel, wenno baka marigatan nga agaramid iti umiso ta madanagan iti maibaga ti dadduma. Kas imbaga ni Santiago, “masubok ti tunggal maysa no maallukoy ken masulisog iti bukodna a tarigagay.”—Sant. 1:14.

6. No napudnotayo iti bagitayo, ania ti masapul a bigbigentayo?

⁶ Ammom kadi dagiti situasion a naglakaka a masulisog? Pakaisagmakantayo no ditay labanan dagiti pagkapuyantayo wenno no ipagaruptayo a nakabilbilegtayo isu a ditay makaaramid iti basol. (1 Juan 1:8) Laglagipem, imbaga ni Pablo a mabalin met a masulisog uray dagiti “addaan kadagiti naespirituan a kualipikasion” no dida agtultuloy nga agannad. (Gal. 6:1) Masapul nga agbalintayo a napudno iti bagitayo ken bigbigentayo nga adda dagiti situasion a nakapuytayo.—2 Cor. 13:5.

7. Ania ti ad-adda a pagannadantayo? Iyilustrar.

⁷ No ammotayon dagiti situasion a nalakatayo laeng a masulisog, ania ti masapul nga aramidentayo? Pabilgentayo ti determinasiontayo a manglaban kadagita! Kas panangyilustrar, idi tiempo ti Biblia, ti paset ti siudad a kalakaan a mastrek ket dagiti ruanganna. Isu a masapul nga adu a guardia ti mangbantay kadagita tapno maprotektaran ti siudad. Masapul met nga ad-adda nga agannadtayo kadagiti situasion nga ammotayo a nalakatayo laeng a masulisog.—1 Cor. 9:27.

NO KASANOTAYO A MAKAPAGANNAD

8-9. Ania koma ti inaramid ti agtutubo a lalaki a nadakamat iti Proverbio kapitulo 7 tapno saan a nakaaramid iti nadagsen a basol? (Proverbio 7:​8, 9, 13, 14, 21)

⁸ Kasano a maprotektarantayo ti bagitayo? Kitaentayo dagiti masursurotayo iti agtutubo a lalaki a nadakamat iti Proverbio kapitulo 7. Nakaaramid iti seksual nga immoralidad iti immoral a babai. Ibagbaga ti bersikulo 22 a “pagammuan” ta simmurot ti agtutubo a lalaki kenkuana. Ngem kas ipakita dagiti immuna a bersikulo, addan dagiti naaramidna a saan a nasayaat a desision sakbay dayta nga in-inut a nangiturong kenkuana nga agbasol.

⁹ Ania dagiti inaramid ti agtutubo a lalaki sakbay a nakaaramid iti nadagsen a basol? Umuna, idi sumipngeten, “limmabas iti asideg ti nagsulian ti kalsada nga ayan ti babai” nga immoral. Kalpasanna, napan iti balay ti babai. (Basaen ti Proverbio 7:​8, 9.) Idi nakitanan ti babai, saanen a pimmanaw. Impalubosna ketdi a bisongen ti babai. Dimngeg met iti imbaga ti babai a mapan mangyeg iti pakikappia a daton. Nalabit imbagana dayta tapno panunoten ti lalaki a saan isuna a dakes. (Basaen ti Proverbio 7:​13, 14, 21.) No saan koma nga inaramid ti agtutubo a lalaki dagita a saan a nasayaat a desision, naliklikanna koma ti sulisog ken saan a nagbasol.

10. Kasano a mabalin a makaaramid ti maysa iti kamali a kas iti agtutubo a lalaki?

¹⁰ Ipakita ti salaysay maipapan ken Solomon ti mabalin a mapasamak iti asinoman nga agdaydayaw ken Jehova. Mabalin a matnag iti nadagsen a basol ket inton agangay, ipagarupna a “pagammuan” wenno bigla a napasamak dayta. Ngem no panunotenna ti aktual a napasamak, baka makitana nga adda dagiti naaramidanna a saan a nasayaat a desision sakbay a nakaaramid iti nadagsen a basol. Baka nakigayyem kadagiti saan a mangay-ayat ken Jehova, wenno saan a maitutop iti maysa a Kristiano dagiti pinilina a paglinglingayan, linuktanna a website, wenno napnapananna a lugar. Mabalin met a saan idin nga agkarkararag, agbasbasa iti Biblia, makigimgimong, wenno mangaskasaba. Kas iti agtutubo a lalaki iti Proverbio, saan met gayam a “pagammuan” wenno bigla a nakaaramid iti basol.

11. Ania ti masapul nga aramidentayo tapno saantayo nga agbasol?

¹¹ Ania ti masursurotayo? Saan laeng a ti mismo a basol ti masapul a liklikantayo. Masapul met a liklikantayo dagiti situasion a mangiturong kadatayo nga agbasol. Kasta ti eksakto nga inlawlawag ni Solomon kalpasan la unay a dinakamatna ti napasamak iti agtutubo a lalaki ken iti immoral a babai. Maipapan iti dayta a babai, imbagana: “Dikay mapan kadagiti danana.” (Prov. 7:25) Imbagana met maipapan iti dakes a babai: “Umadayokayo kenkuana; dikay umasideg iti ruangan ti balayna.” (Prov. 5:​3, 8) Wen, saantayo a makaaramid iti basol no liklikantayo dagiti situasion a mangiturong kadatayo nga agbasol.b Mabalin a karaman kadagita dagiti situasion wenno aktibidad a saan met ketdi a dakes para kadagiti Kristiano ngem mabalin a mangsulisog wenno mangiturong kadatayo nga agaramid iti di umiso.—Mat. 5:​29, 30.

12. Ania idi ti determinasion ni Job, ken kasano a nakatulong dayta kenkuana a manglaban iti sulisog? (Job 31:1)

¹² Tapno maliklikantayo dagiti situasion a mangiturong kadatayo nga agbasol, masapul a natibker ti determinasiontayo. Kasta idi ti inaramid ni Job. ‘Nakitulag kadagiti matana’ a di pulos kumita iti sabali a babai nga addaan iti immoral a tarigagay. (Basaen ti Job 31:1.) Nakatulong ti natibker a determinasionna tapno di pulos makikamalala. Kabaelantayo met ti determinado a mangliklik iti aniaman a posible a pakasulisogantayo.

13. Apay a masapul a protektarantayo ti panagpampanunottayo? (Kitaen met dagiti ladawan.)

¹³ Masapul met a protektarantayo ti panagpampanunottayo. (Ex. 20:17) Patien ti dadduma nga awan pagdaksan ti panagpantasia kadagiti dakes a tarigagay no la ket ta saan nga aktual nga aramiden dagita ti maysa. Ngem kamali dayta a kapanunotan. No sangkapanunot ti maysa ti dakes a tarigagay, pappapigsaenna laeng ti tarigagayna. No aramidenna dayta, lallalo laeng a marigatan a manglaban iti sulisog. Siempre, adda latta dagiti gundaway a makapanunottayo iti saan a nasayaat. No mapasamak dayta, nagpateg a dagus nga iwaksitayo dagiti kasta a panagpampanunot ket suktantayo iti nasayaat. Iti kasta, saantayo a makaaramid iti nadagsen a basol ta ditay ipalpalubos nga agtubo ti dakes a kapanunotan agingga nga agbalinen dayta a napigsa a tarigagay a narigaten a labanan.—Fil. 4:8; Col. 3:2; Sant. 1:​13-15.

14. Ania pay ti makatulong kadatayo a manglaban iti sulisog?

¹⁴ Ania pay ti aramidentayo tapno maprotektarantayo ti bagitayo iti sulisog? Masapul a naan-anay a kombinsidotayo a kanayon a pagsayaatantayo ti panagtulnog kadagiti linteg ni Jehova. Mabalin nga adda dagiti gundaway a saantayo a maitunos iti kayat ti Dios ti panagpampanunot ken tarigagaytayo. Ngem no ikagumaantayo nga aramiden dayta, agbalintayo a pudpudno a naragsak.

15. Kasano a makatulong kadatayo ti nabileg a tarigagay nga agaramid iti umiso tapno malabanantayo ti sulisog?

¹⁵ Masapul a maaddaantayo iti umiso a tarigagay. No sursuruentayo a ‘guraen ti dakes ken ayaten ti naimbag,’ mapatibkertayo ti determinasiontayo a mangaramid iti umiso ken mangliklik kadagiti situasion a mangiturong kadatayo nga agbasol. (Amos 5:15) Makatulong met ti umiso a tarigagay tapno agtultuloytayo a nabileg no addatayo kadagiti makapasulisog a situasion a ditayo ninamnama wenno ditay maliklikan.

16. Kasano a makatulong dagiti naespirituan nga aktibidad tapno makapagtultuloytayo nga agannad? (Kitaen met dagiti ladawan.)

¹⁶ Kasanotayo a maaddaan iti nasayaat a tarigagay? Masapul a kanayon a busy-tayo kadagiti naespirituan nga aktibidad. No makigimgimong ken mangaskasabatayo, pabpabilgentayo ti tarigagaytayo a mangparagsak ken Jehova ken saantayo a nalaka a masulisog nga agaramid iti dakes. (Mat. 28:​19, 20; Heb. 10:​24, 25) No kanayon a basaen, adalen, ken utobentayo ti Sao ti Dios, pabpabilgentayo ti panagayattayo iti naimbag ken panangguratayo iti dakes. (Jos. 1:8; Sal. 1:​2, 3; 119:​97, 101) Laglagipem ti imbaga ni Jesus kadagiti adalanna: “Itultuloyyo ti agkararag, tapno saankayo a masulisog.” (Mat. 26:41) No mangiwayatayo iti tiempo nga agkararag iti nailangitan nga Amatayo, ik-ikkantayo iti gundaway a mangtulong kadatayo ken mangpabileg iti determinasiontayo a mangparagsak kenkuana.—Sant. 4:8.

ITULTULOYMO TI AGANNAD

17. Ania a pagkapuyan ti kanayon a linabanan ni Pedro?

¹⁷ Posible a naan-anay a malabanantayo ti dadduma a pagkapuyantayo. Ngem adda met dagiti pagkapuyantayo a mabalin a kasapulan a labanantayo iti napaut a tiempo. Kitaentayo ti napasamak ken apostol Pedro. Gapu ta nagbuteng iti tao, namitlo nga inlibakna ni Jesus. (Mat. 26:​69-75) Agparang a napagballigian daytan ni Pedro idi situtured a nangasaba iti sanguanan ti Sanhedrin. (Ara. 5:​27-29) Ngem sumagmamano a tawen kalpasanna, simmardeng a nakipangan kadagiti Gentil a Kristiano gapu ta “mabuteng kadagiti nakugit” a Judio a Kristiano. (Gal. 2:​11, 12) Nagsubli ti buteng ni Pedro. Posible a saanna pay a naan-anay a napagballigian dayta.

18. Ania ti mabalin a mapasamak iti dadduma a pagkapuyantayo?

¹⁸ Kas ken Pedro, mabalin a labanantayo manen no dadduma ti maysa a pagkapuyan nga ipagaruptayo a napagballigiantayon. Kas pagarigan, inamin ti maysa a brother: “Sangapulo a tawen a nalabanak ti agbuya iti pornograpia isu a pinanunotko a saankon a problema dayta. Ngem ti pannakaadiktok iti pornograpia ket kasla matmaturog laeng a mabalin a mariing iti aniaman nga oras.” Imbag laengen ta saan a simmuko ti brother a manglaban iti pagkapuyanna. Naamirisna a masapul nga inaldaw a pagreggetanna a labanan ti pagkapuyanna—a mabalin nga aramidenna dayta agingga a sibibiag iti daytoy a sistema ti bambanag. Iti tulong ni baketna ken dagiti panglakayen, nabileg itan ti determinasionna a saan nga agbuya iti pornograpia.

19. Ania ti aramidentayo no adda pagkapuyantayo a ditay pay napagballigian?

¹⁹ Ania iti aramidentayo iti pagkapuyan a ditay pay napagballigian tapno saannatayo nga ituggod dayta nga agbasol? Surotentayo ti imbalakad ni Jesus maipapan iti pananglaban iti sulisog: “Itultuloyyo ti agbantay.” Uray kadagiti tiempo a panagriknam ket nabilegka, itultuloymo a liklikan dagiti situasion a mabalin a pakasulisogam. (1 Cor. 10:12) Itultuloymo nga aramiden dagiti nakatulong kenka idi a manglaban iti pagkapuyam. Kuna ti Proverbio 28:14: “Naragsak ti tao a kanayon nga agbantay.”—2 Ped. 3:14.

DAGITI GUNGGONA NO ITULTULOYTAYO TI AGANNAD

20-21. (a) Ania dagiti gunggona a maawattayo no itultuloytayo ti agannad kadagiti sulisog? (b) No ikagumaantayo a labanan dagiti pagkapuyantayo, ania ti aramiden ni Jehova kadatayo? (2 Corinto 4:7)

²⁰ Masiguradotayo a pagsayaatantayo no itultuloytayo a labanan dagiti pagkapuyantayo. Mabalin nga adda ‘temporario a ragsak’ a maited ti basol, ngem naragragsaktayo nga amang no surotentayo dagiti pagalagadan ni Jehova. (Heb. 11:25; Sal. 19:8) Ngamin, nadiseniotayo a mangaramid iti pagayatanna. (Gen. 1:27) Isu a no agbiagtayo maitunos iti pagayatan ni Jehova, maaddaantayo iti nadalus a konsiensia ken agbiagtayto iti agnanayon.—1 Tim. 6:12; 2 Tim. 1:3; Jud. 20, 21.

²¹ Agpayso a “nakapuy ti lasag.” Ngem saanna a kayat a sawen nga awanen ti maaramidantayo kadagiti pagkapuyantayo. Nakasagana ni Jehova a mangipaay iti bileg a kasapulantayo. (Basaen ti 2 Corinto 4:7.) Nupay kasta, laglagipem a ti bileg nga ipaay ti Dios ket ti bileg a nalablabes ngem iti gagangay. Masapul nga usarentay nga umuna ti gagangay a bileg—ti inaldaw a panagreggettayo a manglaban kadagiti pagkapuyantayo. Responsabilidadtayo dayta. No aramidentayo ti pasettayo, masiguradotayo a sungbatan ni Jehova dagiti kararagtayo a maaddaan iti ad-adu pay a bileg no kasapulantayo dayta. (1 Cor. 10:13) Wen, iti tulong ni Jehova, maitultuloytayo ti agannad tapno ditay masulisog.