Salsaludsod Dagiti Agbasbasa
Idi rinugian ni Jesus ti Pangrabii ti Apo, ayan ti 70 nga adalanna nga imbaonna a mapan mangasaba? Pinanawanda kadi ni Jesus?
Ditay koma ipapan a gapu ta awan ti 70 nga adalan ni Jesus idi rinugianna ti Pangrabii ti Apo ket inlaksidna idan wenno binaybay-andan isuna. Dagiti laeng ngamin apostolna ti kayatna a makadua iti dayta nga okasion.
Ti 12 ken ti 70 ket adalan amin ni Jesus. Idi damo, nangpili ni Jesus iti 12 a lallaki kadagiti adalanna ket inawaganna ida iti apostol. (Luc. 6:12-16) Idi adda isuna idiay Galilea, “inayabanna ti Sangapulo ket Dua” ken “imbaonna ida a mangikasaba iti Pagarian ti Dios ken mangpaimbag.” (Luc. 9:1-6) Kalpasanna, idi napan idiay Judea, nangpili iti “70 a dadduma pay ket imbaonna a sagdudua.” (Luc. 9:51; 10:1) Isu nga adda dagiti pasurot ni Jesus iti nagduduma a lugar a nangikaskasaba maipapan kenkuana.
Ti tinawen a Paskua ket selselebraran idi dagiti Judio a nagbalin nga adalan ni Jesus a posible a kadua dagiti pamiliada. (Ex. 12:6-11,17-20) Ngem idi dandanin matay ni Jesus, kaduana dagiti apostolna a napan idiay Jerusalem. Ngem saanna a pinaayaban ti amin nga adalanna—manipud iti Judea, Galilea, ken Perea, tapno agkakaduada a mangselebrar iti Paskua. Nalawag ngarud a ti kayat laeng idi ni Jesus a makadua iti dayta nga okasion ket dagiti apostolna. Imbagana kadakuada: “Inur-urayko a dumteng daytoy a Paskua tapno makipanganak kadakayo sakbay nga agsagabaak.”—Luc. 22:15.
Adda ngarud nasayaat a rason no apay nga inaramid dayta ni Jesus. Ngamin, dandani isunan matay kas “ti Kordero ti Dios a mangikkat iti basol ti lubong.” (Juan 1:29) Mapasamak dayta idiay Jerusalem ta sadiay ti nabayagen a pagidatdatonanda iti daton para iti Dios. Ti kordero ti Paskua ipalagipna kadagiti Israelita nga insalakan ida ni Jehova manipud iti Egipto. Ngem dakdakkel nga amang ti maaramidan ti sakripisio ni Jesus. Dayta ti mangwayawaya iti amin a tattao manipud iti basol ken ipapatay. (1 Cor. 5:7, 8) Gapu iti sakripisio ni Jesus, ti 12 nga apostol ket nagbalin a paset ti pundasion ti kongregasion Kristiano. (Efe. 2:20-22) Makapainteres ta ti nasantuan a siudad ti Jerusalem ket addaan iti “12 a pundasion a bato” a nakaisuratan “ti 12 a nagan ti 12 nga apostol ti Kordero.” (Apoc. 21:10-14) Dagiti matalek nga apostol ket addaan iti nagpateg a papel iti pannakatungpal ti panggep ti Dios. Maawatantay ngaruden no apay a kayat idi ni Jesus a makaduana ida iti maudi a Paskua ken iti sumaruno iti dayta—ti Pangrabii ti Apo.
Saan a kadua ni Jesus ti 70 a dadduma pay nga adalanna ngem nagunggonaan latta ti amin a matalek nga adalanna iti inrugi ni Jesus—ti Pangrabii ti Apo. Amin dagidiay nga adalan, a nagbalin a Kristiano a dinutokan ti espiritu idi agangay, ket nairaman iti tulag ti pagarian a dinakamat ni Jesus kadagiti apostolna iti dayta a rabii.—Luc. 22:29, 30.