Gubat ken Panaglalaban—Maapektarantayo Amin

Mabalin a bigla a mapasamak ti gubat ken naranggas a panaglalaban kadagiti natalna a lugar. Kasta met, uray kadagiti lugar nga adayo iti gubat, posible a maapektaran latta dagiti tattao. Ken uray nabayagen a nalpas ti panaglalaban, agpaut ti epekto dagita. Kitaentayo ti dadduma a pagarigan.

• 

  Panagkurang iti makan. Sigun iti World Food Programme, “ti panaglalaban ti kangrunaan latta a rason iti bisin. Ngamin, 70 a porsiento kadagiti agbisbisin iti intero a lubong ket aggigian kadagiti lugar nga apektado iti gubat ken panaglalaban.”

• 

  Problema iti pisikal ken mental a salun-at. Uray kadagiti lugar a saan pay a nangrugi ti gubat, mabalin a permin a mais-stress ken madandanagan dagiti tattao. Ngem kadagiti lugar a mapaspasamaken ti gubat, saan laeng a madangran iti pisikal dagiti tattao. Posible a maaddaanda pay kadagiti problema iti mental a salun-at. Ket makapaladingit ta kaaduanna a saanda a maipapaayan iti pannakaagas a kasapulanda.

• 

  Inkapilitan a panangpanaw iti balay. Sigun iti United Nations High Commissioner for Refugees, manipud idi Septiembre 2023, nasuroken a 114 a milion a tattao iti intero a lubong ti kapilitan a nangpanaw iti balayda. Ti kangrunaan a rason iti dayta ket ti gubat ken naranggas a panaglalaban.

• 

  Kinarigat ti biag. Gapu iti gubat, kaaduanna a rumigat ti biag dagiti tattao gapu ta ngumina dagiti magatang. Mapasamak dayta no ti pondo ti gobierno para iti pannakaaywan ti salun-at ken edukasion dagiti tattao ket maipan iti pondo para iti militar. Dakkel met ti magastos iti panagibangon manen kadagiti dinadael ti gubat.

• 

  Pannakadadael ti aglawlaw. Agrigat dagiti tattao no madadael ti daga a paggigiananda. Posible nga agsakitda pay gapu iti narugit a danum ken angin ken kontaminado a daga. Ken uray nabayagen a nalpas ti gubat, mabalin a madangran wenno matay dagiti tattao gapu kadagiti naikali a bomba.